Jeŭrapiejskaja fiederacyja žurnalistaŭ 6 vieraśnia nakiravała listy na imia prezidenta Biełarusi Alaksandra Łukašenki, ministra ŭnutranych spraŭ Anatola Kulašova i hienieralnaha prakurora Ryhora Vasileviča z nahody hibieli žurnalista Aleha Biabienina.
«My skrajnie zaniepakojeny atmaśfieraj strachu i zapužvańnia žurnalistaŭ u Biełarusi i zaklikajem ułady krainy zrabić usio, kab harantavać hruntoŭnaje rasśledavańnie spravy i spynić praktyku biespakaranaści dla tych, chto napadaje na žurnalistaŭ», — havorycca ŭ listach, jakija padpisaŭ hienieralny sakratar Jeŭrapiejskaj fiederacyi žurnalistaŭ Ejdan Uajt.
Akramia padazronych abstavin hibieli Aleha Biabienina, JEFŽ uzhadvaje ŭ svaich listach i pahrozy, jakija atrymała šef-redaktarka haziety «Narodnaja vola» Śviatłana Kalinkina. «My źviartajem vašu asablivuju ŭvahu na toj fakt, što papiarednija hučnyja spravy, datyčnyja hibieli biełaruskich žurnalistaŭ, nie dali dakładnych adkazaŭ nakont ich losu. U hetym šerahu stajać spravy Dźmitryja Zavadskaha, jaki źnik na šlachu da minskaha aeraporta 7 lipienia 2000 hoda, i Vieraniki Čarkasavaj, žorstka zabitaj u svajoj kvatery 20 kastryčnika 2004 hoda», — uzhadvajecca ŭ listach JEFŽ.
Pradstaŭnica ABSIE pa pytańniach svabody ŚMI Dunia Mijatavič taksama vykazała siońnia svaju zaniepakojenaść z nahody śmierci Aleha Biabienina i zaklikała ŭłady pravieści ŭvažlivaje i niezaležnaje rasśledavańnie. «Śmierć Biabienina źjaŭlajecca vialikaj strataj dla biełaruskaj žurnalistyki. Jaho bajavy veb-sajt zastajecca adnym ź niešmatlikich niaŭradavych krynic infarmacyi, i supracoŭniki sajtu rabilisia abjektami praciahłaha administratyŭnaha cisku», — zajaviła Mijatavič.
«Ja vitaju namier Hienieralnaj prakuratury pravieści rasśledavańnie inšych mahčymych viersij hibieli žurnalista, niahledziačy na papiaredniuju vysnovu, što žurnalist skončyŭ žyćcio samahubstvam. Ja zaklikaju biełaruskija ŭłady pravieści niezaležnaje rasśledavańnie hetaj trahičnaj śmierci. Heta asabliva važna, kab paźbiehnuć abvastreńnia cisku na biełaruskija ŚMI, jaki mohuć vyklikać pytańni pra jaho śmierć»,— havorycca ŭ zajavie.
Zaniepakojenaść hibiellu žurnalista vykazała taksama arhanizacyja «Indeks cenzury» (Index on Censorship). «Ludzi ŭ Minsku vielmi niervujucca, asabliva blizkija Aleha, — adznačyŭ menedžer pa hramadskich spravach arhanizacyi Majk Charys, jaki mieŭ sustrecca z Aleham hetymi dniami ŭ Biełarusi. — U apošnija miesiacy jon byŭ vielmi zaniepakojeny pytańniami biaśpieki jaho kaleh-pravaabaroncaŭ i apasaŭsia viartańnia atmaśfiery 1997–1999 hadoŭ, kali pry padazronych abstavinach źnikli šmat dysidentaŭ, a sam Aleh ledźvie nie byŭ zabity. Nie paźniej za luty nastupnaha hoda ŭ Biełarusi majuć adbycca prezidenckija vybary… Hetaja śmierć stała sapraŭdnym šokam dla hramadzianskaj supolnaści ŭsioj Biełarusi...»
