Uładzimir Baradač: Hetaja ŭłada razumieje tolki siłu intervju 17

Pałkoŭnik śpiecnaza i krytyk Łukašenki Uładzimir Baradač hatovy zastacca ŭ emihracyi.

U siaredzinie 1990-ch pałkoŭnik Uładzimir Baradač byŭ lehiendarnaj asobaj. Były kiraŭnik marjinahorskaha śpiecnaza ŭdzielničaŭ u vajennym kanflikcie ŭ Armienii. Jon byŭ adnym sa stvaralnikaŭ Biełaruskaha zhurtavańnia vajskoŭcaŭ. U 1996-m Baradač vystupiŭ na baku Kanstytucyi, suprać Łukašenki.

Nie tak daŭno pałkoŭnik staŭ hierojem pieradačy NTV «Chrosny baćka», dzie krajnie rezka vykazaŭsia ab dziejnym kiraŭniku dziaržavy. Try tydni ad momantu pakazu filma Baradač znachodziŭsia za miežami krainy. Ciapier jon dumaje, ci varta viartacca ŭvohule.

«Naša Niva»: Sapraŭdy, źbirajeciesia zastacca ŭ Hiermanii?

Uładzimir Baradač: Dumaju nad hetym. Takaja situacyja ŭ mianie skłałasia, albo sadzicca ŭ turmu, albo zastavacca tut. Za čas adsutnaści ŭ Biełarusi na majoj kvatery prajšoŭ niesankcyjanavany pieratrus. Niešta šukali. Dumaju, što lubyja dakumienty, jakija datyčać Sajuza aficeraŭ. Jon usio ž isnuje. Jość hrupa maich tavaryšaŭ, jakija nie admoviacca ad svaich pierakanańniaŭ. Jość nieabchodnaja kolkaść ludziej, jakija ŭ peŭnych abstavinach mahli b paŭpłyvać na rašeńnie tych ci inšych pa¬dziej. Ciapier samych aktyŭnych z nas pasprabujuć izalavać ad udziełu ŭ vybarach i najpierš paślavybarčych padziejaŭ. Bo 

vybaraŭ niama. Adziny mietad baraćby ŭ siońniašnich umovach — siłavy cisk. Inšyja mietady na režym nie paŭpłyvajuć.

«NN»: Ale ž Vy nie z pužlivych ludziej.

UB: Dla mianie heta składanaje maralnaje pytańnie. Što ja zmahu zrabić za dva-try hady, praviedzienyja ŭ turmie? Mnie zdajecca, što bolš karyści dla ajčyny i škody dla režymu ja mahu prynieści na svabodzie. Važnaje pytańnie: z kim iści na vybary? Biez padtrymki, bieź finansavańnia navat hrupa surjoznych ludziej nie zmoža padrychtavać ludziej. Chto dapamoža? Zachad, Rasija? Užo pierapoŭniena čaša strachu ŭnutry krainy, navat siarod mužnych ludziej. Biez abhruntavanaj siły z hetym režymam zmahacca niemahčyma.

Razumieju, što zastacca na Zachadzie — heta faktyčna zdacca. U mianie niama strachu. Ja prosta chaču dabicca niejkaha vyniku.

«NN»: A sami nie dumali ŭdzielničać u vybarach?

UB: Toj parad prezidentaŭ, što jość ciapier, užo razdražniaje publiku. Iści na vybary dla mianie było b niemaralna. Apazicyi važna abjadnacca, kab pakazać usiu nielehitymnaść Łukašenki, kab z hetym zhadzilisia i Rasija, i Zachad. Ludzi, jakija adchilać Łukašenku ad ułady, buduć hierojami.

«NN»: U vas jość spadziavańni na dapamohu Rasii?

UB:

Skinuć hety režym možna tolki z padtrymkaj Rasii. Zachad choča pravieści pieramieny bolš maralnymi pryncypami. Była dobraja sproba ŭciahnuć Biełaruś va «Uschodniaje partniorstva», ale heta vielmi tonki šlach i nie z prezidentam Łukašenkam.

Rasija ŭ dadzienaj situacyi — asnoŭny hulec. Z Rasijaj možna damovicca. Nam budzie mała tolki ŭłasnaj rašučaści, treba dapamoha i zvonku.

«NN»: Dumajecie, Vam pomściać za ŭdzieł u «Chrosnym baćku»?

UB: Tam była pakazanaja tolki maleńkaja častka z zapisanaha, zusim nieistotnaja. Bolš surjoznyja rečy, mahčyma, pakažuć u nastupnych častkach, a moža ŭvohule nie pakažuć. Darečy, niadaŭna ad majho imia sfalsifikavali zvarot, dzie nas faktyčna zrabili sajuźnikami Łukašenki. Naš zvarot byŭ vielmi rezki. Ni pra jakoje supracoŭnictva z režymam havorka nie išła.

***

Uładzimir Baradač

nar. u 1951 hodzie ŭ vioscy Nača (Krupski rajon). Skončyŭ minskuju Suvoraŭskuju i razanskuju Desantnuju (fakultet «Śpiecnaz») vučelni. U 1981–1983 vajavaŭ u Afhanistanie. Kamandavaŭ Marjinahorskaj bryhadaj śpiecnaza. Zvolniŭsia ŭ zapas u 1993. Viadomaść atrymaŭ u 1996 padčas procistajańnia Łukašenki ź Viarchoŭnym Savietam. U Baradaču bačyli mahčymyha kiraŭnika vajskovaha pieravarotu.

Hutaryŭ Źmicier Pankaviec

Chočaš padzialicca važnaj infarmacyjaj ananimna i kanfidencyjna? Pišycie redaktaru «Našaj Nivy» ŭ TH