Pra heta «Našaj Nivie» aficyjna paviedamiŭ pieršy namieśnik hiendyrektara RUP «Minsk Kryštal» Siarhiej Maškoŭ.
Na etykietcy harełki «Hajdukievič» u naźvie zavodu nie chapaje adnoj litary.
21 žniŭnia ŭ Minsku adbyŭsia źjezd Libieralna-demakratyčnaj partyi. Udzielniki kanhresu i jaho hości atrymali ŭ padarunak partret lidera partyi Siarhieja Hajdukieviča, a taksama plašku harełki «Hajdukievič». Na etykietcy źmieščanaja vyjava palityka na stylizavanym hierbie prodkaŭ Hajdukieviča. Nad hierbam mieścicca nadpis «Biełaruskaja šlachta», pad hierbam — «Honar i hodnaść». «Paradak u krainie. Dabrabyt u domie». Nakryŭka plaški maje firmovy łahatyp minskaha harełačnaha zavodu «Kryštal» (adziny nadpis pa-biełarusku). Na etykietcy ŭ samym nizie paznačana: RUP «Minsk Kristał» (z adnym «ł»). Hetaja akaličnaść pryciahvaje ŭvahu tym, što aficyjnaja nazva minskaha zavoda pa-rasijsku pišacca praz dva «ł». Na źjeździe Hajdukievič kazaŭ, što harełka sapraŭdnaja, vyrablenaja na «Kryštali» i «navat z akcyznaj markaj».
Pa tłumačeńni my źviarnulisia da namieśnika pieršaha namieśnika hiendyrektara RUP «Minsk Kryštal» Siarhieja Maškova.
«Mahu adrazu aficyjna zajavić, što da hetaj harełki naš zavod nie maje nijakaha dačynieńnia. My nie atrymlivali ad ŁDP nijakich zajavak i ničoha nie vyrablali».Siarhiej Anatolevič dadaŭ, što nie vyklučaje vykarystańnia firmovaj plaški pradpryjemstva. «Heta ž prosta — nabyŭ u kramie našu pradukcyju, źniaŭ našu etykietku, nakleiŭ svaju. Akcyz i firmovaja nakryŭka zastajucca na miescy».
Spadar Maškoŭ patłumačyŭ, što adbyvajecca ŭ vypadkach, kali chtości padrablaje ich pradukcyju. «My pišam hetaj arhanizacyi papiaredžańnie z patrabavańniem spynić niezakonnyja dziejańni i, u vypadku čaho, vyklikajem u sud».
Pra hety kankretny vypadak jon zaznačyŭ: kali fakt vykarystańnia našaha łahatypa paćvierdzicca, budziem raźbiracca z parušalnikami.
Lider ŁDP Siarhiej Hajdukievič ad kamientaroŭ admoviŭsia.
