Praktyčna lubaja praca pa haspadarcy abo na dačnym učastku nie abychodzicca biez drapin abo stremak. Što nieabchodna mieć pad rukoj dla zalečvańnia takich drobnych traŭmaŭ?]
Byccam by sapraŭdy drobiaź, ale tym nie mienš treba svoječasova i ŭmieła akazać sabie dapamohu. Stremku varta jak maha chutčej dastać, a ranku (jak i drapinu) pramyć marhancoŭkaj albo śpirtavym rastvoram bornaj kisłaty i prypiačy zialonkaj.
Lepš za ŭsio vymać stremku zvyčajnaj ihołkaj, prapalenaj na ahni abo apracavanaj toj ža zialonkaj (a kali jaje niama pad rukoj, to choć by adekałonam abo duchami).
Kali stremka zajšła hłyboka pad skuru, možna vostrym končykam ihołki, apracavanym tymi ž srodkami, aściarožna raśsiačy tonki słoj skury, a zatym vyciahnuć inšarodnaje cieła. Dla vydaleńnia kavałačka mietaličnaha drotu, jaki trapiŭ pad skuru, možna prymianić mietad vyciskańnia: źbirajučy skuru ŭ składki, namacać abodva kancy drotu i naciskam dastać jaho vonki. Paśla vydaleńnia stremki ściśnicie navakolnyja tkanki da źjaŭleńnia kropielki kryvi — jana pramyje ranku ad mahčymaj infiekcyi. Zatym nakładzicie na ranku kavałačak bakterycydnaha lejkapłastyra, binta abo vatku, zmočanuju jodam, zialonkaj abo śpirtam.
Kali ŭtvaryŭsia naryŭ. Pryhatujcie maź: 1 st. ł. miodu źmiašać z 1 č. ł. pšaničnaj muki i raściortaj piečanaj cybulinaj. Maź prykładzicie da naryva i zamacujcie paviazkaj. Kali ŭ vas niama miodu, prosta prykładzicie da naryva piečanuju cybulinu. Nadziarycie na tarcy syry čyrvony burak, pakładzicie na bint i pryviažycie (abo pryklejcie lejkapłastyram) da naryva — jon razydziecca albo chutka «vyśpieje».
Kali naryŭ uźnik na palcy, dałoni abo na padešvie stupni, to patrymajcie ich u haračaj (37,5–38 hradusaŭ) mylnaj vadzie (lepš vykarystać haspadarčaje myła) abo ŭ haračaj vadzie z sodaj (1 č. ł. na šklanku vady) na praciahu 20 chvilin. Kali naryŭ prarvie, pramyjcie ranku rastvoram marhancu abo bornaha śpirtu, a potym jašče 2 dni prykładajcie kampres z rastvoru sody (1 č. ł. na šklanku vady), kab vyciahnuć reštki hnoju.
Čym apracoŭvać ranu?
Zrazumieła, lepš nie davodzić spravu da nahnajeńnia, tamu nie zabyvajcie dezynfikavać paškodžanyja miescy choć by sokam tryputniku abo sokam pałynu (4 razy na dzień). Akramia taho, dla papiaredžańnia nahnajeńnia navat paśla drobiaznaj drapiny nie zabyvajcie pra pravilnuju hihijenu cieła, a taksama pra ŭmacavańnie imunitetu. U hetym vam dapamohuć ahulnaŭmacavalnyja nastoi z traŭ, jakija ačyščajuć kroŭ, — šałfieju, miaty i anisu: źmiašajcie hetyja travy ŭ roŭnych praporcyjach, zavarycie 2 č. ł. sumiesi 1 šklankaj kipieniu, nastojvajcie 20 chvilin, pracadzicie, dadajcie miod abo cukar. Picie pa 1 šklancy, nievialikimi hłytkami, za 30 chvilin da jady, 3–4 razy na dzień.
