Dramaturh Andrej Kurejčyk, zvolnieny z Univiersiteta kultury paśla rezanansnaha intervju apazicyjnym ŚMI, praciahnie vykładčyckuju pracu. Pra heta paviedamili ŭ Ministerstvie kultury.
Nahadajem, miesiac tamu viadomy scenaryst i dramaturh Andrej Kurejčyk u intervju apazicyjnym vydańniam vykazaŭ ździŭleńnie z nahody pieraśledu aktyvistaŭ hramadzianskaj kampanii "Havary praŭdu" i vykazaŭsia ŭ padtrymku paeta Uładzimira Niaklajeva. Paśla publikacyi hutarki, pa słovach Kurejčyka, na kafiedru teatralnaj tvorčaści pryjšło rasparadžeńnie "źvierchu" nie praciahvać ź im kantrakt. Na kafiedry nieaficyjna paćvierdzili, što zvalnieńnie maje palityčny charaktar.
U znak pratestu Andrej Kurejčyk admoviŭsia prymać ispyty i nieadkładna razarvaŭ usie kantakty z Univiersitetam kultury.
"Mianie zaprasili vykładać na pieršy kurs dramaturhaŭ i scenarystaŭ hod tamu jak adzinaha dziejnaha śpiecyjalista ŭ halinie vialikaha kino, jaki na stałaj asnovie pracuje na rynkach Rasii i ZŠA. Maja zarpłata składaje niešta kala 100 tysiač rubloŭ, ja traciŭ ŭ dziesiatki razoŭ bolš na avijabilety, bo časta ja śpiecyjalna prylataŭ z Maskvy, kab pravieści zaniatki. Ja pracavaŭ tolki z adnoj metaj -- vyraścić novaje pakaleńnie prafiesijnych aŭtaraŭ, -- Andrej Kurejčyk paviedamiŭ tady TUT.BY. -- Hetyja ludzi nie dumajuć pra studentaŭ. Nie dumajuć pra adradžeńnie ajčynnaha teatra i kino. Nie dumajuć, što vykładać hetyja dyscypliny, dy jašče za hetyja hrošy, niama kamu! U ich u vačach tolki adno - strach! Ci mahčyma takoje ŭ lubym prystojnym univiersitecie cyvilizavanaha śvietu? Ja dumaju, nichto nie maje prava dyktavać mnie, kamu i jak davać intervju i što ŭ ich kazać".
Paśla ŭmiašalnictva pradstaŭnikoŭ Ministerstva kultury kanfliktnaja situacyja była vyrašanaja, i Andrej Kurejčyk praciahnie pracu sa studentami.
U dadzieny momant dramaturh znachodzicca ŭ Maskvie, adnak užo painfarmavany ab adnaŭleńni na pasadzie i zhodny viarnucca da vykładčyckaj dziejnaści ŭ vieraśni.
