Rasija moža sarvać tranzit vieniesuelskaj nafty praz terytoryju Ukrainy ŭ Biełaruś, pišuć «Ekanamičnyja viestki» (Kijeŭ). Padstavaj dla takoj zdahadki staŭ toj fakt, što Minsku i Kijevu pakul nie ŭdajecca ŭzhadnić niuansy tranzitnych damoŭlenaściaŭ.
Jak paviedamlałasia raniej, u kancy minułaha tydnia Biełaruś i Ukraina płanavali padpisać mižuradavaje pahadnieńnie ab tranzicie vieniesuelskaj nafty praz Ukrainu ŭ Biełaruś. «Padpisańnie pahadnieńnia budzie spryjać realizacyi ahulnych intaresaŭ dźviuch dziaržaŭ pa raźvićci ŭzajemavyhadnaha supracoŭnictva ŭ naftavaj halinie», — adznačałasia ŭ
Adnak 9 lipienia ŭkrainskaje viedamstva paviedamiła, što dakumienty ŭsio jašče znachodziacca ŭ pracy i pieramovy pa prajekcie pahadnieńnia vyrašana praciahnuć.
Na dumku ekśpiertaŭ «Ekanamičnych viestak», adnoj z pryčyn takoha rašeńnia moža być nieabchodnaść uličyć pazicyju treciaha boku — Rasii.
«Vykarystańnie naftapravoda Adesa — Brody dla ažyćciaŭleńnia pastavak vieniesuelskaj nafty ŭ Biełaruś technična mahčymaje, adnak dla realizacyi takoha varyjantu nieabchodnaja palityčnaja vola jak z ukrainskaha boku, tak i z boku inšych udzielnikaŭ prajekta»,— cytuje vydańnie prezidenta Kijeŭskaha mižnarodnaha enierhakłuba Alaksandra Tadzijčuka. Havorka ŭ dadzienym vypadku idzie ab Rasii, udakładniŭ jon.
U ciapierašni čas naftapravod Adesa — Brody zadziejničany rasijskaj kampanijaj «Transnafta» ŭ reviersnym režymie. Analityki nie vyklučajuć, što
Rasija moža zapracivicca jaho zapusku ŭ aviersnym nakirunku pa palityčnych mierkavańniach. A ŭličvajučy toje, što adnosiny Ukrainy z Rasijaj pačali naładžvacca, možna vykazać zdahadku, što Kijeŭ naŭrad ci zachoča ich psavać.
U Minpałenierha Ukrainy zapeŭnivajuć, što klučavyja pytańni ab umovach tranzitu vieniesuelskaj nafty Biełaruś i Ukraina «praktyčna ŭzhadnili». «Zastalisia niaznačnyja niuansy», — paviedamiła «Ekanamičnym viestkam» krynica ŭ paliŭnym viedamstvie.
Nahadajem, što da kanca hetaha hoda Biełaruś płanuje zakupić u Vieniesueły 4 młn. ton nafty, a ŭ 2011 hodzie — 10 młn. ton.
Minpałenierha Ukrainy nieadnarazova zajaŭlała, što Ukraina maje techničnyja mahčymaści dla pryjomu nafty ŭ čarnamorskich partach i dalejšaj jaje transparciroŭki na biełaruskuju terytoryju pa naftapravodzie Adesa — Brody, ale pry ŭmovie, što štohadovy abjom impartavanaj nafty dasiahnie 10 młn. ton i pastaŭki buduć ažyćciaŭlacca na stałaj asnovie. Jak tłumačać u Kijevie, mienavita taki abjom tranzitu dazvolić zabiaśpiečyć rentabielnuju pracu naftapravoda ŭ aviersnym režymie.
Što tyčycca vyhod Biełarusi, to, pa raźlikach ŭkrainskich ekśpiertaŭ, zadziejničańnie naftapravoda Adesa — Brody ŭ aviersnym režymie skarocić vydatki na transparciroŭku nafty na Mazyrski NPZ amal udvaja.
