Da 2014 hoda ŭ stalicy paŭstanie šeść novych čatyroch- i piacizorkavych hatelaŭ. U ich liku elitnyja Radisson Olympis, Hyatt Regency… Najbujniejšyja mižnarodnyja karparacyi hatovyja pryjści na biełaruski rynak pasłuh. Ale z kim jany buduć kankuravać? Z hatelami Samoha. Mnohija elitnyja haścinicy Minska naležać Kiraŭnictvu spravaŭ prezidenta.
Budučy «Kiempinski» kala cyrka.
Prezidencki numar u «Kraŭn Płazie».
Samy darahi hatel stalicy, «Jeŭropa», naležyć harvykankamu.
Budučy «Redysan» nasuprać Drazdoŭ.
Budučy «Chajat» na Navavilenskaj.
Aby-kamu hateli nie addaduć
Pa padlikach, u Biełarusi pracuje 297 hatelaŭ i hatelnych kompleksaŭ. Ź ich municypalnymi źjaŭlajecca amal pałova — 130 zbudavańniaŭ, pieravažna ŭ rajcentrach. Ale nasamreč dola dziaržavy našmat bolšaja. Svaje viedamasnyja hateli maje bolšaść ministerstvaŭ. Peŭnaja dola naležyć i ŭłasna Administracyi prezidenta.
Naprykład,
supierdarahi hatel «Minsk» na płoščy Niezaležnaści naležyć mienavita Kiraŭnictvu spravaŭ prezidenta.
U Ministerstvie žyllova-kamunalnaj haspadarki isnuje płan pryvatyzacyi kamunalnych hatelaŭ. Ale prahrama datyčycca vyklučna rehijonaŭ. Minskija hateli nie pradajucca.
Da liku kamunalnych u stalicy adnosiacca tolki prybytkovyja elitnyja «Jeŭropa» i «Viktoryja».
Najlepšyja zornyja hateli
«Zornaść» hatelaŭ u našaj krainie rehulujecca DASTam, ahulnym dla ŭsich krain SND. Jon adroźnivajecca ad mižnarodnych paramietraŭ kolkaściu pasłuh dla VIP-klijentaŭ. Naprykład, amierykancy i jeŭrapiejcy pierakananyja, što 5*-ja hateli musiać mieć basiejny i viertalotnyja placoŭki. Biełarusi takoje i nie śniłasia.
Piacizorkavych hatelaŭ u Biełarusi ŭsiaho dva. Heta minskija «Jeŭropa» i Crowne Plaza («Kraŭn Płaza»).
Jak užo zaznačałasia raniej, «Jeŭropa» znachodzicca ŭ municypalnaj ułasnaści. Adkryty paśla rekanstrukcyi ŭ 2007 hodzie, hatel adrazu ž vyjšaŭ na samaakupnaść. Jašče b! Samy prościeńki adnamiascovy numar kaštuje 265 jeŭra za noč. A voś za prezidencki luks treba zapłacić jak minimum 1105 jeŭra.
Crowne Plaza — adzin ź niešmatlikich hatelaŭ, što naležać zamiežnikam. Jaho ŭładalnik — turak Sudzi Azkan.«NN» pisała pra jaho jak ułaśnika elitnaha kazino, u jakim kožny naviednik tracić jak minimum tysiaču dalaraŭ, i jahonuju žonku-biełarusku. Biznesoviec uznačalvaje suśvietnuju karparacyju Princess International Group. Minskaje budaŭnictva kaštavała jamu $34 miljony. Hatel adčyniŭ svaje dźviery ŭ 2008 hodzie. Samy tanny numar kaštuje 204 jeŭra za noč.
Siertyfikat čatyrochzorkavych hatelaŭ u krainie majuć minskija «Viktoryja», «Minsk» i viciebskaja «Łučosa».
«Łučosa» — najlepšy hatelny kompleks za miežami stalicy. Jaho pabudavali viciebskija ŭłady ŭ 2004 hodzie, pieradusim dla haściej «Słavianskaha bazara».
Municypalnaja «Viktoryja» adkryłasia ŭ Minsku ŭ 2007 hodzie. Jana choć i naležyć staličnym uładam, ale ciesna źviazanaja z Rasijaj. Picierskija biznesoŭcy majuć tam pamiaškańni pad kazino. Za minuły hod čysty prybytak hatela skłaŭ $1,75 miljona. Pry hetym jaho možna ličyć biudžetnym u paraŭnańni z astatnimi. Košt numaroŭ pačynajecca «ŭsiaho» sa 135 jeŭra.
«Minsk», jakim vałodaje ŭpraŭleńnie spravami prezidenta Biełarusi, letaś zarabiŭ bolš — $2,5 miljona. Numary kaštujuć ad 145 jeŭra. Paśla rekanstrukcyi jon adkryŭsia ŭ 2002 hodzie.
Sieradniaki
Hieahrafija šasnaccaci trochzorkavych hatelaŭ šyrejšaja. Jany pradstaŭlenyja ŭ kožnaj z abłaściej. Bolš za ŭsio, zrazumieła, u Minsku. Ale pryvatnych siarod ich vobmal. Adzin z takich, ścipły, maje Minski mižnarodny adukacyjny centr (IBB).
Kiraŭnictva spravaŭ prezidenta vałodaje adrazu dvuma — «Płanietaj» i «Jubilejnym».«Siličy» i try hateli Nacyjanalnaha parku «Biełaviežskaja pušča» naležać dziaržavie, a «Naftan» — adnajmiennamu navapołackamu pradpryjemstvu.
Žłobinskaja «Słavinasport» naležyć zamiežnamu pradpryjemstvu «Juniviest-M», jakoje zajmajecca pastaŭkami i pierapracoŭkaj nafty. Taksama kampanija maje intaresy na rynku nieruchomaści Biełarusi.
Lidski «Kantynient» maje va ŭłasnaści kampanija «Lipłast-SPB» na čale ź miascovym biznesoŭcam Iharam Ryškievičam. Pradpryjemstva zajmajecca vypuskam vyrabaŭ z škłapłastyka. Praŭda, kažuć, što hrošy na hatel vydzieliŭ nie jon, a jahony brat, uładalnik łakafarbavaha zavoda ŭ Pieciarburhu.
Pa ŭzroŭni kamfortu da trochzorkavych hatelaŭ adnosiać i hrodzienski «Siamaška». Im vałodaje niadaŭna pastaŭleny staršynia praŭładnaha Sajuza palakaŭ Stanisłaŭ Siamaška.Ale jahonaja haścinica pakul što nie prajšła siertyfikacyi.
Pierśpiektyŭnyja prajekty
Kankretnyja płany pa budaŭnictvie elitnych hatelaŭ majucca adrazu ŭ niekalkich inviestaraŭ. Najbolšy rozhałas nabyŭ prajekt suśvietnaj karparacyi Kempinski. Hramadskaja dumka ŭsio ž «vyniesła» budynak z Kastryčnickaj płoščy ŭ rajon cyrka. Najbolšy pakiet akcyj kampanii naležyć Biuro nieruchomaści Tajłanda.
Hyatt Regency pavinien byŭ źjavicca ŭ rajonie vulicy Navavilenskaj u Minsku ŭžo letaś. Amierykanskaja karparacyja Global Hyatt Corporation maje hateli ŭ 45 krainach śvietu. Na čale arhanizacyi staić siamja čykahskich miljarderaŭ Pryckieraŭ.
U nastupnym hodzie ŭ Biełaruś pryjdzie i jašče adna amierykanskaja sietka, Radisson. Hrošy na hety hatel, tym nie mienš, daje rasijski inviestar. Kampanija hatovaja pabudavać u dadatak da haścinicy jašče i štab-kvateru Nacyjanalnaha alimpijskaha kamiteta.
Paśla rekanstrukcyi stanie piacizorkavaj i haścinica «Kastryčnickaja». Jana źmienić nazvu na salidnaje «Prezident-hatel». Nazva adpaviadaje ŭładalniku. Hatel mieścicca ŭ susiednim budynku z Administracyjaj prezidenta i naležyć Kiraŭnictvu spravaŭ prezidenta Biełarusi.
