27 červienia siabry Kanservatyŭna‑Chryścijanskaj Partyi — BNF praviali štohadovyja memaryjalnyja mierapryjemstvy pamiaci achviaraŭ rasiejskaha hienacydu ŭ horadzie Červieni (były Ihumień) Mienskaj vobłaści.
Vialikaja hrupa siabroŭ Partyi prybyła ź Mienska, Baranavičaŭ i Słucka i raspačała mierapryjemstvy kala budynka byłoj Ihumienskaj turmy, dzie rasiejskija akupanty viaźnili i katavali biełaruskich patryjotaŭ jašče ŭ 19‑m stahodździ. Praz turmu prašli paŭstancy Kastusia Kalinoŭskaha, adradžency kanca 19‑ha — pačatku 20‑ha stahodździa. Maskoŭskija akupanty savieckaha peryjadu zrabili turmu vyspaj Archipiełaha HUŁAHa.
Tut katavali i viaźnili biełarusaŭ na praciahu 1917‑41 hadoŭ.
U hetaj viaźnicy katy NKVD trymali viaźniaŭ apošniuju noč pierad rasstrełam 26 červienia 1941 h., paśla taho, jak pryhnali ich ź mienskaj turmy.
Na nastupny dzień jany pahnali kalonu viaźniaŭ pa šašy ŭ bok Rasiei i niepadalok ad Červienia adkryli ahoń pa ludziach. Było zabita bolš za paŭtary tysiačy ludziej, tolki niamnohija zdoleli ŭciačy i vyratavacca. Złačynstva maskoŭskaha zachopnika nakłałasia na złačynstva niamieckaha zachopnika našaj ziamli.
Frontaŭcy prajšli šlacham biełaruskich pakutnikaŭ pad nacyjanalnymi Bieł‑Čyrvona‑Biełymi Ściahami, transparantam «Ihumien. 26 červienia 1941 hoda.
Na mahiłach achviaraŭ byli ŭskładzieny vianki i kvietki, zapaleny śviečki. Ludzi zaśpiavali himn «Mahutny Boža». Pierad hramadoj vystupili sp. Jury Bieleńki, vykanaŭca abaviazkaŭ u Biełarusi staršyni Biełaruskaha Narodnaha Frontu «Adradžeńnie» i KCHP‑BNF, sp. Siarhiej Papkoŭ, namieśnik staršyni Frontu i Partyi, sp. Aleś Čacholski, adkazny sakratar Frontu i Partyi, Valery Bujvał, sakratar Frontu i Partyi.
U hramadzie było šmat maładych ludziej i padletkaŭ, jakija ŭpieršyniu pabyli na miescy Ihumienskaj trahiedyi. Moładź razam z starejšymi śpiavała patryjatyčnyja pieśni i vajarskija himny. Naprykancy mierapryjemstva hramada zaśpiavała himn «Mahutny Boža».
