U Biełarusi adznačajecca siezonny ŭzdym zachvorvańnia na vostryja kišečnyja infiekcyi: rotavirusnyja hastraenteryty i salmanieloznyja infiekcyi.
Jak paviedamiła doktar‑epidemijołah Respublikanskaha centra hihijeny, epidemijałohii i hramadskaha zdaroŭja Viktoryja Zujeva, u mai ŭ krainie byli adznačany 403 vypadki salmanieloznych infiekcyj i 449 vypadkaŭ rotavirusnych hastraenterytaŭ. Pavodle jaje słoŭ, u ciopły čas hoda ŭzbudžalniki kišečnych infiekcyj lahčej zachoŭvajucca i razmnažajucca na charčovych praduktach, pradmietach damašniaha ŭžytku, u vadzie adkrytych vadajomaŭ. Ryzyka zaražeńnia asabliva vialikaja dla tych, chto padarožničaje ciahnikom, dzie nieabchodna dbajna vykonvać praviły asabistaj hihijeny.
Pieršyja simptomy vostrych kišečnych infiekcyj: pavyšeńnie tempieratury cieła, młosnaść, irvota, časty vadki stuł. Pry ich źjaŭleńni śpiecyjalist rekamienduje źviartacca pa miedycynskuju dapamohu. Pavodle słoŭ Zujevaj, samalačeńnie moža pryvieści da raźvićcia ŭskładnieńniaŭ, raspaŭsiudžvańnia infiekcyi. Chvoraje dzicia nieabchodna izalavać ad inšych dziaciej. Pry nieabchodnaści tych, chto zaraziŭsia na vostruju kišečnuju infiekcyju, špitalizujuć u stacyjanar.
U cełym epidemičnaje stanovišča ŭ Biełarusi pa vostrych kišečnych infiekcyjach charaktaryzujecca jak stabilnaja. Za apošnija piać hadoŭ rehistravalisia adzinkavyja vypadki brušnoha tyfu, zachvorvańnie na bakteryjalnuju dyzienteryju źniziłasia ŭ 10 razoŭ, virusny hiepatyt A — u 8 razoŭ. Razam z tym, štohod vostrymi kišečnymi infiekcyjami zaražajucca ad 10 da 16 tysiač biełarusaŭ, ź ich bolš za 70% — dzieci.
