Navahrudak hatovy da praviadzieńnia fiestyvalu siaredniaviečnaj kultury. Pra heta zajavili na pres-kanfierencyi čynoŭniki Navahrudskaha rajvykankama.
Mer horada Anatol Kułak zapeŭniŭ, što pryniać i raźmiaścić zmohuć usich. I pytańnie z žytłom, jakoje paŭstavała na raniejšych festach, sioleta vyrašana. Za 1,5 km ad horada adviedziena placoŭka, na jakoj možna budzie pastavić namiot. Dajezd da placoŭki arhanizujecca na haradskim aŭtobusie, jaki budzie kursavać bieśpierapynna.
Spynicca možna i ŭ hatelach Navahrudka. Ale pakojaŭ u ich niašmat. Kala 400-500 miescaŭ budzie vydzielena ŭ miascovych internatach. Zdać svaje kvatery rychtujucca i žychary horada.
Zahadčyk adździeła kultury Navahrudskaha rajvykankama Alaksandr Karačan źviarnuŭ uvahu na finansavy bok arhanizacyi śviata. Pa jaho słovach, kali pieršyja festy prachodzili tolki na entuzijaźmie rycarskich kłubaŭ, to ciapier jany kamiercyjalizavalisia. I heta prynosić dadatkovyja vydatki.
Ahułam ža śviata budzie kaštavać dziaržavie kala 250 młn. rubloŭ.
Ale čynoŭniki spadziajucca chacia b 40 pracentaŭ ad hetaj sumy viarnuć u biudžet za košt płatnych vystupleńniaŭ padčas festu.
Usie dziejańni śviata buduć prachodzić na čatyroch placoŭkach. Na hałoŭnuju, na Zamkavaj hary, uvachod abmiažujuć. Maksimalnaja kolkaść ludziej, jakaja zmoža tam znachodzicca, tolki 1200 čałaviek.
Što da muzykaŭ, jakija prymuć udzieł u fiestyvali, to
zaprošany rasijski ansambl Drolls.
Siarod biełaruskich vykanaŭcaŭ nazyvajucca Gloria, «Nahual», «Javaryna», Alaksandra i Kanstancin, «Pałac».
Čakajecca ŭdzieł rycarskich kłubaŭ z Hiermanii, Słavakii, Čechii, Ukrainy, Rasii, Łatvii, Litvy.
U navahrudskim kinateatry dva fiestyvalnyja dni buduć demanstravać histaryčnyja filmy. Viadoma, što
pakažuć «Kryžakoŭ», źniatych pa adnajmiennaj knizie Hienryka Siankieviča.
Fest siaredniaviečnaj kulury «Navahrudski zamak-2010» projdzie 26-27 červienia ŭ piaty raz. Sioleta jon pryśviečany 600-hodździu Hrunvaldskaj bitvy. Z padrabiaznaj prahramaj fiestyvalu možna paznajomicca tut.
