Padčas raspaŭsiudu zvarotu Ŭładzimira Niaklajeva da abituryjentaŭ byli zatrymanyja aktyvisty kampanii «Havary praŭdu». Na dadzieny momant viadoma pra zatrymańni hrup vałancioraŭ u troch univiersitetach u Minsku: BDU, BDEU, MDŁU. U časie aśviatleńnie akcyi kala BDU byli zatrymanyja taksama dva žurnalisty.
Pa słovach adnaho z aktyvistaŭ kampanii Michasia Paškieviča, supracoŭniki biaśpieki ŭniviersitetu admovilisia patłumačyć, pavodle jakoha jurydyčnaha dakumienta ŭ VNU nielha było razdać ulotki sa zvarotam paeta da moładzi.
Supracoŭniki biaśpieki ŭ svaju čarhu paličyli heta parušeńniem pravaparadku i vyklikali milicyju. Jak paviedamlajuć zatrymanyja pa telefonach, ich źbirajucca advieźci ŭ Zavodski, Maskoŭski i Frunzienski RUUS adpaviedna.
— Zatrymańnie dziaŭčyny-žurnalistki było možna nazvać brutalnym. Nieviadoma, ci zastałasia cełaj technika, — raspavioŭ adzin ź siabroŭ kampanii «Havary praŭdu» Jury Alejnik. Pa jaho słovach, u Minsku siońnia aktyvisty «Havary praŭdu!» paśpieli razdać kala troch tysiač ulotak sa zvarotam lidera kampanii Ŭładzimira Niaklajeva da moładzi.
Zvarot Niaklajeva da moładzi ŭtrymlivaŭ u sabie pažadańni pravilnaha vybaru pravilnych daroh i razdavaŭsia abituryjentam-2010 pierad druhim testavańniem, što idzie pa ŭsioj krainie.
Ulotki sa zvarotam majuć razdavać siońnia ŭ šmatlikich VNU Biełarusi: va ŭsich abłasnych haradach, Połacku, Baranavičach, Horkach. Aproč zhadanych minskich univiersitetaŭ, akcyja prajšła ŭ BNTU i Technałahičnym univiersitecie.
