«U Biełarusi zachoŭvajucca sur'znyja prablemy», — kanstatuje pres-słužba Biełaha domu.
Prezident ZŠA Barak Abama padoŭžyŭ na hod sankcyi ŭ dačynieńni da šerahu słužbovych asobaŭ Biełarusi, paviedamlaje pres-słužba Biełaha doma.
«Niahledziačy na vyzvaleńnie biełaruskich palityčnych źniavolenych vosieńniu 2008 hoda i vysiłki ZŠA, nakiravanyja na sadziejničańnie praviadzieńniu ŭ Biełarusi dalejšych reformaŭ pa demakratyzacyi, zachavańnia pravoŭ čałavieka i viaršenstva zakona, surjoznyja prablemy zachoŭvajucca», — adznačajecca ŭ dakumiencie.
«Dziejańni i palityka šerahu členaŭ urada Biełarusi i inšych dziaržaŭnych čynoŭnikaŭ praciahvajuć pradstaŭlać ekstraardynarnuju pahrozu nacyjanalnaj biaśpiecy i zamiežnaj palitycy ZŠA. Takim čynam, sankcyi ŭ dačynieńni da biełaruskich dziaržaŭnych čynoŭnikaŭ, jakija byli pryniatyja 16 červienia 2006 hoda, pavinny praciahvać dziejničać i paśla 16 červienia 2010», — cytuje dakumient pres-słužba Biełaha doma.
U červieni 2006 hoda prezident ZŠA Džordž Buš padpisaŭ ukaz ab finansavych sankcyjach u dačynieńni da Alaksandra Łukašenki i jašče dzieviaci biełaruskich słužbovych asobaŭ, «adkaznych za padryŭ demakratyčnych pracesaŭ i instytutaŭ, parušeńnie pravoŭ čałavieka, dziaržaŭnuju karupcyju». Ukaz błakuje ŭłasnaść i prava biełaruskich čynoŭnikaŭ na ŭłasnaść u ZŠA, rachunki i mahčymaść finansavych apieracyj. Amierykanskim kampanijam i pryvatnym asobam zabaroniena zaklučać ździełki z nazvanymi słužbovymi asobami.
U śpis, jaki prykładajecca da ŭkazu, akramia Alaksandra Łukašenki ŭvajšli jaho syn Viktar Łukašenka, namieśnik kiraŭnika Administracyi prezidenta Natalla Piatkievič, ministr justycyi Viktar Hałavanaŭ, staršynia Biełdziaržteleradyjokampanii Alaksandr Zimoŭski, eks-staršynia KDB Ściapan Sucharenka, były dziaržsakratar Savieta biaśpieki Viktar Šejman, eks- kamandzir ZACHR Dźmitryj Paŭličenka, były ministr unutranych spraŭ Uładzimir Navumaŭ, kiraŭnik Centrvybarkama Lidzija Jarmošyna.
Akramia taho, u sakaviku 2006 hoda, paśla vybaraŭ prezidenta Biełarusi, ZŠA dałučylisia da śpisu nieŭjaznych Jeŭrasajuza i ŭviali zabaronu na ŭjezd na svaju terytoryju 30 biełaruskich čynoŭnikaŭ, u tym liku prezidenta Łukašenki.
