25-27 červienia. Muzyčny fest na litoŭska-biełaruskim pamiežžy Be2gether. La vioski Narviliški možna budzie pačuć suśvietnaviadomyja hurty — Skunk Anansie, «Empire Of The Sun» (Aŭstralija), Roots Manuva, «Hajdamaki» (Ukraina), Casiokids (Narviehija), Bauchklang (Aŭstryja), «Rubl» sa Šnuravym (Rasija).
Z usich troch Be2gether'aŭ sioletni — samy biełaruski. Biełaruś na fiestyvali pradstaviać ažno 4 hurty: CherryVata, Open Space, Akute i, viadoma, Lavon Volski z prajektam na słovy kłasičnych paetaŭ «Biełaja jabłynia hromu». A taksama biełaruskija paviljony, dzie možna budzie nabyć knihi i atrybutyku. A taksama paetyčnyja vystupy-pierformansy biełaruskich litarataraŭ.
Słohan Be2gether'a — «Muzyka adčyniaje miežy» užo šmat chto čytaje jak «muzyka daje vizu ŭ Jeŭropu», bo ŭładalnikam kvitka vydajecca darmavaja litoŭskaja viza na 5 dzion. Ale arhanizatary papiaredžvajuć, što pamiežniki buduć staranna praviarać najaŭnaść zvarotnaha kvitka — tak što paśla miažy ni na jakija mory nie zbočvajem i prastujem u Narviliški. Padać dakumienty na vizu možna da 17 červienia. Cana kvitkoŭ — 250 tys. rubloŭ, ale kali vy znojdziecie troch siabroŭ, to 185 tysiač.
25-27 červienia. U tyja samyja dni na terytoryi letapisnaj Litvy, ale ŭžo na terytoryi Respubliki Biełaruś adbudziecca 5-ty fest siaredniaviečnaj kultury «Navahradski zamak — 2010». Sioleta fest pryśviečany 600-hodździu Hrunvaldskaj bitvy. U prahramie: teatralizavanyja šeści na čale ź Vitaŭtam i Jahajłam u atačeńni śvity i pradstaŭnikoŭ rycarskich kłubaŭ. Konny i rycarski turnir la ŭznožža Zamkavaj hary: łučniki, vieršniki, miečniki. I, viadoma, fest siaredniaviečnaj muzyki. Na desiert — tradycyjny šturm kryžakami navahradskaha zamka. Bolšaja častka mierapryjemstvaŭ — biaspłatnaja.
26 červienia. Fest elektronnaj muzyki Global Gathering Freedom Music. Znoŭ ža ŭ tyja samyja dni — lehiendarny jak na Biełaruś fiestyval adbudziecca na aeradromie «Baravaja», la minskaj kalcavoj. Na volnym pavietry možna budzie patančyć pad suśvietnuju supierzorku dy-džeja David Guetta, dy-džeja John Digweed'a, i niepaŭtornaha John'a. Arhanizataram padałosia hetych traich zamała: jany dadali Sander van Doorn'a, Music Paul Thomas'a i Eston'a. Hałoŭna, kab nie pajšoŭ doždž.
16-18 lipienia. U lasach Biełastoččyny festyval muzyki maładoj Biełarusi «Basovišča-2010», moža, i projdzie biez NRM, «Kramy» i «Niejra Dziubiela», adnak tamaka buduć «Trojca», «Hurzuf» i «Adys Abieba» dy šerah inšych. Upieršyniu płanujuć pryniać udzieł «Lapis Trubiackoj». Fest darmavy (chiba treba raskašelicca na miesca pad namiot). Tut hałoŭnaja zadača — zdabyć vizu ŭ Polšču.
15-18 lipienia. Śviatkavańni, pryśviečanyja 600-hodździu Hrunvaldskaj bitvy. Taksama Polšča, taksama zadarma i taksama pasiarod hołaha pola. Ale jakoha! La Dubroŭna (Hrunvalda, Žalhirysa) adznačać jubilej pieramohi biełaruska-litoŭska-polskaha vojska nad Teŭtonskim ordenam. Teatralizavanyja šou z udziełam Jahajły i mahistra fon Junhiniena z konnymi charuhvami, rycarskim turniram, fajer-šou, kancertami siaredniaviečnaj i narodnaj muzyki i zbudavany horad ramieśnikaŭ. I viadoma 17 lipienia a 14.00 — hrandyjoznaja inscenizacyja viekapomnaj siečy, jakaja, darečy, nie abydziecca bieź biełaruskich charuhvaŭ pad «Pahoniaj». Razam čakajuć prybyćcio kala 5 tysiač rycaraŭ (nahadajem, u sapraŭdnaj bitvie ŭdzielničała ŭsiaho tolki ŭ 12 razoŭ bolš).
11-16 žniŭnia. Fest Sziget. Na vyśpie pasiarod Budapieštu adbudziecca adzin z najvialikšych muzyčnych festaŭ śvietu. Hałoŭnuju scenu akupujuć muzyki z Iron Maiden, Faithless, 30 Seconds to Mars, Kasabian, i naš «Lapis Trubiackoj». Patančyć ža možna budzie na Party Arena: Infected Mushroom, Gotan Project, DJ Shadow, Simian Mobile Disco, Calvin Harris and Breakestra feat. My lubim i cenim hety fest za muzyku, ale nie tolki: «Sihiet» hanarycca svaimi teatralnymi scenami. Sioleta buduć vystupać vandroŭnyja cyrki, kitajskaje ahniavoje šou i teatr tanca. Šeść dzion naviednikaŭ čakaje biehanina pamiž scenami, ale jana vartaja hetych vysiłkaŭ. Košty 130-200 jeŭraŭ. Viza ŭ Vienhryju patrebnaja.
21-23 žniŭnia. Fest Be Free — 2010 u Čarnihavie. Naprykancy žniŭnia ŭ Čarnihavie projdzie štohadovy muzyčny fest. Sioleta jon budzie trochdzionnym. Arhanizatary ŭličyli letašni vopyt i takim čynam chočuć vyrašyć prablemu viartańnia ŭ Biełaruś udzielnikaŭ festu i jaho haściej. Svoj udzieł u feście ŭžo padćvierdzili IQ-48, Krama i Neuro Dubel. Pieramovy ź inšymi biełaruskimi i jan tolki hurtami praciahvajucca.
Jak i «Basovišča» fest u Čarnihavie biaspłatny.
