U Hienieralnuju prakuraturu Biełarusi pa pošcie pastupiŭ aryhinał zapytu ab vydačy zrynutaha prezidenta Kyrhyzstana Kurmanbieka Bakijeva i materyjały ŭ dačynieńni da jaho, paviedamili ŭ Hienprakuratury.
gPavodle słoŭ surazmoŭcy ahienctva, materyjały na 18 staronkach ciapier vyvučajucca. Nahadajem, kopija zapytu pastupiła z Kyrhyzstana pa faksie 11 maja.
Kurmanbiek Bakijeŭ znachodzicca ŭ Biełarusi z 19 krasavika. 4 maja kiraŭnik časovaha ŭrada Kyrhyzstana Roza Atunbajeva padpisała dekret ab pazbaŭleńni jaho prezidenckaj niedatykalnaści. U dekrecie havorycca, što «Bakijeŭ dapuściŭ rasstreł mirnych hramadzian i tym samym sam pazbaviŭ siabie statusu eks‑prezidenta i niedatykalnaści».
U toj ža dzień prezident Biełarusi zajaviŭ, što nie źbirajecca vydavać Bakijeva novym uładam Kyrhyzstana. «Da mianie nichto aficyjna nie źviartaŭsia, — skazaŭ Alaksandr Łukašenka. — Ale adrazu chaču aficyjna zajavić: hetyja zvaroty buduć daremnyja i źnievažalnyja dla časovaha ŭrada. Prezident Kyrhyzstana znachodzicca pad abaronaj biełaruskaj dziaržavy i prezidenta. Nie treba hetak zvanamu časovamu ŭradu źviartacca z patrabavańniem vydać Bakijeva. Kamu vydać? Ci zachaču ja jašče razmaŭlać z tym, chto siońnia kiruje ŭ Kirhizii».
11 maja Atunbajeva zajaviła, što časovy ŭrad maje namier dabivacca ekstradycyi Bakijeva. «Siońnia kiraŭnik Biełarusi Alaksandr Łukašenka ŭziaŭ pad svaju apieku Kurmanbieka Bakijeva. Chaču skazać, što padobnyja dziejańni paharšajuć palityčnuju situacyju ŭ samoj Biełarusi, dzie zaraz aktyŭna pračynajecca apazicyja. Jana žorstka vystupaje suprać palityki Łukašenki. Ja dumaju, što jon sam vinavaty ŭ situacyi, jakaja skłałasia», — cytuje Atunbajevu kyrhyzskaje infarmahienctva 24.kg.
Raniej, kamientujučy BiełaPAN mahčymaści ekstradycyi Bakijeva, krynica ŭ pravaachoŭnych orhanach paličyła, što hetaje pytańnie budzie vyrašacca nie ŭ ahulnakryminalnaj, a ŭ palityčnaj płoskaści. Pavodle słoŭ ekśpierta, u ahulnakryminalnaj praktycy na terytoryi SND pytańnie ab ekstradycyi vyrašajecca na padstavie Minskaj kanviencyi 1993 hoda ab pravavoj dapamozie i pravavych adnosinach pa hramadzianskich, siamiejnych i kryminalnych spravach. Kali hramadzianin jakoj‑niebudź dziaržavy ŭčyniŭ na jaho terytoryi złačynstva i schavaŭsia ŭ Biełarusi, to biełaruskija ŭłady abaviazanyja vydać jaho boku, jaki robić zapyt.
U toj ža čas u adpaviednaści ź mižnarodnymi normami i nacyjanalnym zakanadaŭstvam Biełaruś nie vydaje svaich hramadzian. Nie vydać abvinavačanaha Minsk moža taksama ŭ vypadku davańnia jamu palityčnaha prytułku — dziaržava biare čałavieka pad svaju apieku, i jamu niama nieabchodnaści navat ustupać u biełaruskaje hramadzianstva.
Nahadajem, na pres‑kanfierencyi ŭ Minsku Bakijeŭ zajaviŭ, što nie maje namieru prasić palityčnaha prytułku.
