Ad traŭnia 2010 h. fotahalereja ZNJaTA, dobra viadomaja biełaruskim fatohrafam, prypyniła vystavačnuju dziejnaść.
«Kinavideaprakat» atrymaŭ rekamiendacyju ad Minharvykankama, pavodle jakoj praktyka praviadzieńnia kulturnych mierapryjemstvaŭ z pryvatnaj inicyjatyvaj pavinna być spynienaja. U pieršuju čarhu «pad razdaču» trapiła fotahalereja ZNJaTA.
«Kiraŭnictva «Kinavideaprakata» pierastrachoŭvajecca. Jany bajacca vystavaŭ. Im niezrazumieła, što heta za vystavy. A ŭ nas chutka vybary, voś i vyrašyli zabaranić usio.Niahledziačy, a toje, što ZNJaTA ad samaha pačatku zajaŭlali ab niezaanhažavanaści ŭ palityku. Navat na svaim forumie my zaŭsiody staralisia paźbiahać abmierkavańnia palityčnych tem», — raspavioŭ «NN» kiraŭnik fotahalerei Siarhiej Michalenka. Jon taksama dadaŭ, što niaŭpeŭnieny ŭ adnaŭleńni vystavačnaj dziejnaści i paśla vybaraŭ.
Kiraŭnik adździeła infarmacyi i rekłamy «Kinavideaprakata» Natalla Patapienka ŭ razmovie z «NN» spasłałasia na rašeńnie kinateatra, jakija vystavy ładzić, a jakija nie.
«Jany sami pravodziać vystavy. I na travień niešta tam zapłanavana», — adznačyła spadarynia Natalla. Dadaŭšy, što ničoha ab fotahalerei ZNJaTA jana nie viedaje.
Pieršaja vystava pad brendam fotahalerei adkryłasia ŭ červieni 2007 hoda. Za minułyja try hady było pradstaŭlena bolš za 40 prajektaŭ roznaha farmatu. U tym liku piersanalnyja i kalektyŭnyja vystavy, tematyčnyja i ekśpierymientalnyja. Usio heta stała mahčyma dziakujučy padtrymcy, akazanaj kiraŭnictvam staličnaha kinateatra «Centralny» i Centra Videa u «Stalicy».
Z vosieni hetaha hoda ŭ płanach halerei byli mižnarodnyja prajekty, abnaŭleńnie vystavačnaha abstalavańnia i ceły šerah tvorčych sustreč ź biełaruskimi i zamiežnymi aŭtarami.
Halereja ZNJaTA pradoŭžyć vystaŭlać pracy fatohrafaŭ, bo pieršapačatkova była praduhledžanaja mahčymaść praviadzieńnia vystaŭ na luboj placoŭcy. Adnak, kali mienavita amatary fatahrafii ŭbačać novy prajekt halerei, na siońniašni dzień nieviadoma.
Zaraz ZNJaTA funkcyjanuje ŭ anłajn režymie.
