U Čykaha 5 traŭnia pamierła hramadskaja dziajačka Viera Ramuk. Jana na dva miesiacy pieražyła svajho muža Vitaŭta Ramuka, jakoha nie stała 9 sakavika.
Viera Ramuk naradziłasia 6 vieraśnia 1931 h. u Sabarach (siońnia Dokšycki rajon Viciebskaj vobłaści, a tady – uschodnija kresy) va ŭnijackaj siamji Stefana Žyźnieŭskaha i Jeŭdakii Hapanionak. Baćka byŭ kraŭcom, maci – chatniaj haspadyniaj. Siamja mieła 12 hiektaraŭ ziamli, čatyry karovy, dva kani, dziesiać aviečak.
Vučyłasia ŭ polskaj, zatym – paśla dałučeńnia Zachodniaj Biełarusi – savieckaj škole. Sa školnych hadoŭ zapomniła nastupnaje: «Saviet, saviet, daj kanfiet» – musili kazać dzieci – i cukierki źjaŭlalisia (nastaŭnica padkidvała). Potym jana zahadvała kazać: «Boh, daj piroh». Kolki dzieci ni kazali, nijakaha piraha nie źjalałasia. «Ot, – reziumavała nastaŭnica, – značyć, nijakaha Boha niama».
Žyźnieŭskija byli siarod tych, kaho «płanavali» vysłać u Sibir.
Vysyłku pryznačyli na kaniec červienia.
Potym była niamieckaja akupacyja, jakaja ŭ tych miaścinach była dapoŭniena niebiaśpiekaj paciarpieć ad pałka Hil-Radzivonava ci litoŭskich karnikaŭ.
U 1944 h. Žyźnieŭskija ŭciakli na Zachad. U 1949 h. pierajechali ŭ ZŠA, paśla niadoŭhaha pobytu ŭ Ńju-Jorku pierabralisia ŭ štat Ilinojs, u horad Pieoryja.
Tut Viera Žyźnieŭskaja skončyła ŭniviersitet i paznajomiłasia ź Vitaŭtam Ramukom, u 1956 h. jany pažanilisia. U 1963-m pierabralisia ŭ Čykaha. Hramadskaje žyćcio tut u 1960-ja kipieła. Niekalki arhanizacyj, ažno dźvie biełaruskija carkvy – pravasłaŭnaja i ŭnijackaja parafija Chrysta Zbaŭcy.
Aktyvistami i ruchavikami hetaj parafii byli i Ramuki.
U 1984 h. Viera Ramuk jak pradstaŭnička biełaruskaj delehacyi była zaprošana ŭ Vašynhton na Tydzień paniavolenych narodaŭ. U Biełym domie i paznajomiłasia z prezidentam Rejhanam i navat, nabraŭšysia advahi, paprasiła razam sfatahrafavacca.
Da apošniaha času Viera Ramuk žyva cikavalisia padziejami ŭ Biełarusi, była padpisčycaj «Našaj Nivy». Ale žadańnie žyć padarvała śmierć muža 9 sakavika 2010 hoda. Šmat pieražyła ŭ svaim žyćci, a heta pieražyć nie zmahła.
Viera Ramuk admoviłasia prymać leki.
Viera i Vitaŭt Ramuki.