Jeŭrapiejskaja mapa – sastarełaja i niełahičnaja. Voś jak jana musić vyhladać
Ludzi, jakim nadakučyli susiedzi, mohuć pierajechać u inšy rajon. A krainy nie mohuć. Ale dapuścim, što było b, kali b jany mahli. Kali mapu Jeŭropy pierabudavać, žyćcio stanie bolš łahičnym i pryjaznym.
Vialikabrytanija, jakaja paśla ŭsieahulnych vybaraŭ budzie vymušanaja zirnuć u vočy žachlivamu dziaržaŭnamu biudžetu, pavinnaja nablizicca da krain Paŭdniovaj Jeŭropy, jakija apynulisia ŭ anałahičnym stanoviščy. Jaje treba adbuksavać da Azorskich astravoŭ. (Kali daroha budzie z kałdobinami, źjavicca dobraja mahčymaść raźmiaścić Ŭels i Šatłandyju na asobnych vyspach).
Na miesca Vialikabrytanii varta raźmiaścić Polšču, jakaja dastatkova paciarpieła, znachodziačysia pamiž Rasijaj i Hiermanijaj, i zasłuhoŭvaje taho, kab atrymlivać asałodu ad badziorlivych viatroŭ Paŭnočnaj Atłantyki i być abaronienaj moram ad usich patencyjnych zachopnikaŭ.
Niezrazumiełyja fłamandska-francuzskija moŭnyja sprečki ŭ Bielhii vielmi nahadvajuć Centralnuju Jeŭropu ŭ najhoršym sensie, asabliva tuju łuchtu, jakuju Słavakija prydumlaje dla svajoj vienhierskamoŭnaj etničnaj mienšaści. Tamu Bielhija pavinnaja pamianiacca miescami z Čechijaj. Flehmatyčnyja, dobra arhanizavanyja čechi vydatna pasiabrujuć sa svaimi novymi susiedziami – niderłandcami, i naadvarot.
Biełaruś, jakaja ciapier nie maje vychadu da mora i sprabuje vypaŭźci z-pad rasijskaha bota, značna vyjhraje ad upłyvu skandynaŭskaha rehijonu – bałtyjskim krainam heta vielmi dapamahło pazbavicca ad savieckaj spadčyny. Značycca, Biełarusi treba ruchacca na poŭnač da Bałtyjskaha mora i zaniać miesca Estonii, Łatvii i Litvy.Try apošnija krainy musiać dysłakavacca dzieści kala Irłandyi. Jak i Smarahdavaja vyspa, jany buduć vymušanyja źmirycca z suvoraj nieabchodnaściu "ŭnutranaj devalvacyi", adnaŭleńnia kankurentazdolnaści za košt skaračeńnia zarobkaŭ i cenaŭ zamiest taho, kab abrać lohki šiałch abiasceńvańnia hrošaj abo nierazvažlivych pazykaŭ, jak Hrecyja. Prybałtyka budzie ščaślivaja, znachodziačysia dalej ad Rasii i bližej da Amieryki. Siarod inšaha, Kalininhradskuju vobłaść možna zrušyć uvierch pa ŭźbiarežžy ŭ bok Rasii, pakłaŭšy kaniec jaje nienarmalnamu statusu spadčynnaha ankłavu Druhoj suśvietnaj vajny i papiaredziŭšy lubyja mahčymyja ŭ budučyni intryhi Rasii što da čyhunačnaha tranzitu.
Miesca, vyzvalenaje Polščaj i Biełaruśsiu, musiać zaniać zachodniaja i centralnaja častki Ukrainy. Hiermanija, jakoj budzie da ŭkrainskaj miažy tolki 100 kiłamietraŭ ad Bierlina, zmoža ŭrešcie surjozna paspryjać intehracyi Ukrainy ź Jeŭropaj. Pieramiaščeńnie Ukrainy dazvolić Rasii pasunucca na zachad i poŭdzień, kab vyzvalić Sibir dla kitajcaŭ, jakija jaje ŭsio adno rana ci pozna zojmuć.
Taksama varta krychu pieraŭparadkavać Bałkany. Makiedonii, Ałbanii i Kosavu treba pierahrupavacca, kab Makiedonija zaniała miesca Kosava pobač ź Sierbijaj, Kosava pierajechała na ŭźbiarežža na miesca Ałbanii, a Ałbanija pieramiaściłasia ŭ siaredzinu krainy. Paranaidalnyja fantazii hrekaŭ pra terytaryjalnyja pretenzii z boku padmanutych słavianskich iredentystaŭ źniknuć. Bośnija zanadta kvołaja dla pieramiaščeńnia, tamu chaj zastajecca na miescy.
Šviejcaryju i Šviecyju časta błytajuć. Tamu maje sens Šviejcaryju pieramiaścić na poŭnač, dzie jana dobra stanie pobač sa skandynaŭskimi krainami.Jaje niejtralitetam buduć całkam zadavolenyja finy i šviedy, a Narviehija budzie radaja mieć u susiedziach inšuju krainu (a nie Rasiju), što nie ŭvachodzić u ES.
Hiermanija moža zastavacca tam, dzie jość, jak i Francyja. Ale Aŭstryju možna pierasunuć na zachad, na miesca Šviejcaryi, dazvoliŭšy Słavienii i Charvatyi taksama ruchacca na paŭnočny zachad*. Jany mohuć złučycca z paŭnočnaj Italijaj u novy rehijanalny sajuz (jakim u ideale musili b kiravać vieniecyjanskija dožy). Astatniaja častka Italii, na poŭdzień ad Ryma, adździelicca i abjadnajecca ź Sicylijaj u novuju krainu, jakaja aficyjna budzie nazyvacca Karaleŭstva Abiedźviuch Sicylij (mianuška – Bardeła). Hetaja kraina zmoža stvaryć finansavy sajuz z Hrecyjaj, ale bolš ni z kim.
* Pryjemny pabočny efiekt hetych źmienaŭ – vyzvaleńnie miesca dla krainaŭ, vydumanych raniej, takich jak Rurytanija Entani Choŭpa, Sildavija i Barduryja Erže i Vulharyja, što słužyła zadnikam dla filma “Chitty Chitty Bang Bang”.
