Rasijski fatohraf Siarhiej Amielin źniaŭ paškodžanyja budynki i zrezanyja drevy, ź jakimi pierad samaj avaryjaj sutyknuŭsia TU-154 prezidenta Polščy. Z analizu dakumientacyi, vykładzienaj u internet, vynikaje, što samalot za 1,1–1,2 km ad aeraporta znachodziŭsia na adlehłaści niekalkich mietraŭ nad ziamloj, pa-za linijaj uźlotna-pasadkavaj pałasy, nie paškodziŭ radyjołakacyjnuju viežu, a da krenu na levaje kryło, vierahodna, pryviało sutyknieńnie ź vialikim drevam.
Pahladzieć fota ŭ vialikim razroźnieńni
Amielin pravioŭ rekanstrukcyju apošnich siekund palotu prezidenckaha samalota. Jon sfatahrafavaŭ darohu, pa jakoj lacieŭ Tu-154, apisaŭ svaju pracu i raźmiaściŭ apisańnie ŭ interniecie. Na zdymkach vidać častki zrezanych drevaŭ. Dreva na zdymku № 1, jakoje znachodzicca pryblizna za 1,1–1,2 km ad aeraporta, śviedčyć, što samalot lacieŭ tut na vyšyni niekalkich mietraŭ. Vierchavina dreva chutčej za ŭsio zrezanaja kryłom (zrez roŭny). Na fota № 2 – radyjomajak, raźmieščany pa linii ŭźlotna-pasadkavaj pałasy. Paškodžańniaŭ na im nie bačna (raniej paviedamlałasia, što samalot jaho začapiŭ). Hetyja vyjavy, a taksama fota 3, 4, 5 dazvalajuć mierkavać, što samalot padčas zachodu na pasadku znachodziŭsia pa-za linijaj uźlotna-pasadkavaj pałasy. Pavodle raźlikaŭ časopisa "Skrzydłata Polska", adchileńnie składała kala 40 mietraŭ.
Vialikaje dreva
Klučavoje fota – №6. Na im bačnaje vialikaje dreva, zrezanaje pasiaredzinie. Chutčej za ŭsio, samalot začapiŭsia za jaho levym kryłom, paśla čaho adchiliŭsia ad linii palotu ŭleva. "Sutyknieńnie z takim vialikim drevam, u vyniku čaho byŭ zrezany davoli toŭsty stvoł, pavinna było pryvieści da adchileńnia trajektoryi samalota. Bieručy pad uvahu kirunak, u jakim raźlacielisia abłomki samalota, možna mierkavać, što jon začapiŭsia za dreva levym kryłom – adsiul i adchileńni trajektoryi ŭleva. Dadatkovym paćvierdžańniem hetaj hipotezy źjaŭlajecca toje, što kaniec levaha kryła – zrezany, vierahodna, u vyniku sutyknieńnia z drevam – lažaŭ niedaloka ad dreva, adlustravanaha na fota №6” (pahladzieć).
Nakolki vialikim było adchileńnie, pakazvajuć zdymki 7, 8, 9 i 10. Z dvuch apošnich možna zrabić vysnovu, što ŭ momant pierad padzieńniem na ziamlu samalot mieŭ vielmi vialiki nachił. "Apornaja siła pravaha kryła nie była roŭnaja apornaj sile levaha, što mahło pryvieści da abarotu samalota vakoł padoŭžnaj vosi ŭleva. Ekipaž nijak nie moh źmianić situacyju", – piša internet-resurs Skrzydłata Polska.
