Hrupa francuzskich katalikoŭ, jakija pracujuć u telekamunikacyjnaj kampanii, zapuścili płatnuju «haračuju liniju», z dapamohaj jakoj vierniki mohuć pakajacca ŭ hrachach. Košt chviliny razmovy składaje 0,34 jeŭra.
Patelefanavaŭšy na «haračuju liniju» čałavieku prapanoŭvajuć nacisnuć knopku «1», kab atrymać kansultacyju nakont spoviedzi, «2», kab paspaviadacca, i «3» — słuchać čužyja spoviedzi. Pry hetym klijentaŭ papiaredžvajuć, što takim čynam možna spaviadacca tolki ŭ drobnych hrachach. Z surjoznymi hrachami rekamiendujecca źviartacca da śviatara.
Klijenty linii nie atrymlivajuć adpuščeńnia hrachoŭ.
Asnoŭnaja meta servisu — dać ludziam mahčymaść pryznacca ŭ drobnych hrachach. Z karystalnikami nie razmaŭlajuć žyvyja apieratary: tyja, chto telefanujuć na liniju, mohuć tolki pasłuchać zapisanyja na aŭtaadkazčyk malitvy. Klijenty sami vybirajuć, zmohuć inšyja ludzi pačuć zapis ich spoviedzi abo nie.
Zapusk «haračaj linii» było prymierkavany da pačatku Vialikaha postu. Za pieršy tydzień servisam skarystalisia niekalki sotniaŭ čałaviek. Bolšaja častka sabranych takim čynam hrošaj idzie na dabračynnaść.
Francuzskija katalickija biskupy ŭžo vypuścili aficyjnuju zajavu, u jakim havorycca, što Rymskaja katalickaja carkva nie maje dačynieńnia da hetaha servisu. Biskupy zaklikali katalikoŭ nie błytać mahčymaść pahavaryć z tajamnicaj spovieździ, jakaja patrabuje abaviazkovaj prysutnaści śviatara.
