Prezident Polščy Lech Kačyński zaprasiŭ na sustreču staršyniu nieaficyjnaha Sajuza palakaŭ na Biełarusi (SPB) Anžaliku Borys. Pra heta lider arhanizacyi paviedamiła ŭ intervju BiełaPAN.
Pavodle słoŭ Borys, prezident taksama vykazaŭ salidarnaść z hramadskim abjadnańniem palakaŭ.
Kamientujučy kanflikt vakoł Doma polskaha ŭ Iviancy, Anžalika Borys adznačyła, što situacyja nahadvaje joj padziei 2005 hoda, kali śpiecnaz siłaj zachapiŭ Dom polski ŭ Hrodnie. «Hetyja padziei śviedčać ab praciahu palityki cisku biełaruskich uład na niezaležny Sajuz palakaŭ na Biełarusi», — pierakanana Borys.
Dziejańni čynoŭnikaŭ suprać niezarehistravanaha SPB jana razhladaje ŭ kantekście ahulnaj palityki biełaruskich uład, jakija parušajuć pravy čałavieka. Heta palityka, pavodle słoŭ Borys, «vyjaŭlajecca ŭ cisku na niezaležnyja arhanizacyi i ludziej ź niezaležnymi pohladami». U jakaści prykładu jana ŭzhadała takija fakty, jak praciahłaje ŭtrymańnie pad vartaj biez suda pradprymalnika z Vaŭkavyska Mikałaja Aŭtuchoviča, cisk na žurnalistaŭ niezaležnych ŚMI, u tym liku polskaha telekanała «Biełsat», i niezarehistravany Sajuz palakaŭ.
Anžalika Borys vykazała padziaku «demakratyčnaj hramadskaści Biełarusi i ŭsim ludziam dobraj voli» za salidarnaść ź nieaficyjnym Sajuzam palakaŭ.
***
8 lutaha ŭ Dom polski ŭ Iviancy prybyli sudovyja vykanaŭcy ŭ supravadžeńni supracoŭnikaŭ milicyi. Jany pamianiali ŭ budynku ŭsie zamki, zajavili, što kiraŭnictva doma niezakonna zavałodała čužoj majomaściu, i zapatrabavali ad usich prysutnych pakinuć budynak dla praviadzieńnia vopisu majomaści. Aktyvisty miascovaj arhanizacyi nieaficyjnaha SPB na čale z Teresaj Sobal vymušany byli vyjści z doma. Sobal nazvała toje, što adbyłosia, «zachopam».
U aficyjnym SPB, u svaju čarhu, zajaŭlajuć, što pavodle statusu abjadnańnia ŭsio 16 biełaruskich Damoŭ palakaŭ, u tym liku ŭ Iviancy, źjaŭlajucca ŭłasnaściu zarehistravanaha Sajuza.
Situacyja ŭ Iviancy stała pryčynaj dypłamatyčnaha skandału — pasoł Polščy ŭ Biełarusi Chienryk Litvin adklikany dla kansultacyj u Varšavu.
