Papiarednija źviestki pierapisu nasielnictva Biełarusi pakazali, što na 14 kastryčnika 2009 hoda jaho kolkaść składała składała 9 młn. 489 tys.
Pra heta paviedamiŭ 21 studzienia na pres-kanfierencyi ŭ Minsku staršynia Nacyjanalnaha statystyčnaha kamiteta Uładzimir Zinoŭski.
Pavodle źviestak pierapisu 1999 hoda, u Biełarusi pražyvali 10 miljonaŭ 45 tysiač čałaviek. Takim čynam, za 10 hadoŭ nasielnictva krainy skaraciłasia na 5,5 pracenta.
Ekanamist Alaksandr Čubryk źviazvaje takoje rezkaje skaračeńnie kolkaści biełaruskaha nasielnictva z vysokim pracentam emihracyi,jaki statystyčna vyličyć vielmi ciažka, bo daloka nie ŭsie emihranty rehistrujuć svoj pierajezd u inšuju krainu.
«Roźnica pamiž biahučaj statystykaj i źviestkami pierapisu ŭ 1999 hodzie skłała 133 tysiačy čałaviek, a ŭ 2009 hodzie — 175 tysiač čałaviek.
Vidavočna, što heta tak zvanaje «čystaje salda mihracyi» za 1990-1999 i 2000-2009,
— kaža Alaksandr Čubryk. — Ale kali pamiž pierapisami 1989 i 1999 hadoŭ z tych, chto źjechaŭ, było davoli šmat rasijskich vajskoŭcaŭ, jakija raniej žyli ŭ Biełarusi, to ŭ 2000-2009 hadoŭ źjazdžali inšyja płasty nasielnictva. Zbolšaha źjazdžali ŭ Rasiju, bo pamiž našymi krainami niama miažy».
Niepakoić toje, što tempy adjezdu nasielnictva z krainy paskorylisia.
Akramia emihracyi, pryčyny skaračeńnia nasielnictva ŭ Biełarusi ŭ asnoŭnym takija ž, jak i ŭ vysokaraźvitych krain, jakija taksama pakutujuć ad demahrafičnaha kryzisu. Uzrost ludziej, jakija biarucca šlubam, pavialičvajecca, i suadnosna,
pavialičvajecca i ŭzrost, u jakim žančyny naradžajuć dziaciej.
Kolkaść dziaciej, jakuju žančyna naradžaje ciaham žyćcia, pamianšajecca. Kaeficyjent fiertylnaści (siaredniaja kolkaść dziaciej, jakuju narodzić kožnaja žančyna ciaham svajho žyćcia) u Biełarusi składaje ŭsiaho tolki kala 1,4 dziciaci na adnu žančynu ŭ repradukcyjnym uzroście (15—49 hod). Vynik — naturalnaje skaračeńnie nasielnictva.
Cikava, što
skaračeńnie kolkaści nasielnictva ŭ krainie nazirajecca ad 1994 hodu, a heta značyć — ad pačatku kiravańnia Alaksandra Łukašenki.
Jon, u svaju čarhu, nie adnojčy adznačaŭ, što demahrafija źjaŭlajecca najbolš pryjarytetnym nakirunkam va ŭnutranaj palitycy krainy. Z čym źviazany pravał hetaj palityki?
«Kraina tolki pačała vychodzić z kryzisu ŭ 2003 hodzie. Prykładna tady i pačali pavyšacca pakazčyki naradžalnaści. Ale, viadoma, demahrafičnaja palityka -- nadta składanaja reč. Jak prymusić ludziej mieć bolš dziaciej? Ludzi musiać być upeŭnienyja ŭ budučyni, ale ja b nie skazaŭ, što biełarusy nadta ŭžo ŭ joj upeŭnienyja», — vykazaŭ svajo mierkavańnie ekśpiert.
Pierśpiektyvy, jak i sioletnija ličby, taksama niesuciašalnyja.
Pavodle apošniaha prahnozu AAN, da 2050 hodu nasielnictva Biełarusi źmienšycca na 13—34%. Pavodle aptymistyčnaha varyjantu (skaračeńnie adbudziecca «ŭsiaho» na 13%), uzrovień fiertylnaści ŭ krainie musić vyjści na 2.11 dziciaci na adnu žančynu ŭ repradukcyjnym vieku. Ale sučasnyja tendencyi kažuć chutčej pra bolšuju vierahodnaść «siaredniaha» scenaru, pavodle jakoha ŭ 2050 h. nas budzie na 24% mieniej, čym u 2010 hodzie.
Da hetaj pierśpiektyvy dadajecca prablema «pasivieńnia» nasielnictva.
Pavodle «siaredniaha» prahnozu AAN, u 2050 hodzie u Biełarusi budzie 35% nasielnictva, starejšaha za 60 hod, i 26% u vieku 65 i vyšej. Dola ludziej ŭ pracazdolnym vieku (15—64 hadoŭ) upadzie z 72% u 2010 h. da 61%. Takija demahrafičnyja tendencyi lahuć vialikim ciažaram na piensijnuju sistemu krainy, na rynak pracy i na pierśpiektyvy doŭhaterminovaha raźvićcia naohuł.
