Kihali — stalica Ruandy. Fota: Wikimedia Commons
Paśla niekalkich tydniaŭ abmierkavańniaŭ premjer-ministr Vialikabrytanii Ryšy Sunak prašturchnuŭ praz parłamient zakon ab departacyi mihrantaŭ u Ruandu, piša Bi-bi-si.
Miarkujecca, što prośbitaŭ prytułku, jakija zajechali na terytoryju Vialikabrytanii nielehalna, buduć aŭtamatyčna — niezaležna ad ich pachodžańnia — pieranakiroŭvać u hetuju ŭschodnieafrykanskuju krainu.
Pry hetym brytanski ŭrad taksama raźličvaje zabaranić mahčymaść asprečvać rašeńnie ab departacyi ŭ sudach.
Zakonaprajekt, jaki ŭchvaliła vierchniaja pałata brytanskaha parłamienta, aficyjna pryznaje Ruandu biaśpiečnaj krainaj.
Ciapier mihranty, jakija nielehalna trapili na terytoryju Vialikabrytanii, buduć dastaŭlacca ŭ Ruandu i zapytvać prytułak užo tam. Pry hetym mahčymaści viarnucca ŭ Vialikabrytaniju ŭ ich nie budzie. Takuju inicyjatyvu ŭpieršyniu jašče dva hady tamu vyłučyŭ premjer-ministr Barys Džonsan.
Krytyki zakonaprajekta źviartajuć uvahu na toje, što Vialikabrytanija budzie płacić Ruandzie sotni miljonaŭ funtaŭ sterlinhaŭ, pry hetym niezrazumieła, kolki nielehalnych mihrantaŭ sapraŭdy ŭdasca departavać.
Ryšy Sunak užo zajaviŭ, što kraina praihnaruje pazicyju Jeŭrapiejskaha suda pa pravach čałavieka, jaki asudziŭ damovu ab davańni prytułku ŭ Ruandzie. Pry hetym premjer-ministr Vialikabrytanii padkreśliŭ, što hety zakon nie supiarečyć mižnarodnamu pravu.
Čakajecca, što pieršych nielehalnych mihrantaŭ zmohuć pierapravić u Ruandu ŭžo praz try-čatyry miesiacy.
***
Ruanda — kraina na poŭdzień ad Sachary (samaja zachodniaja častka Uschodniaj Afryki), u rajonie Vialikich Afrykanskich azior. Nie maje vychadu da mora. Terytoryja składaje 26,3 tysiačy kvadratnych kiłamietraŭ (krychu bolej za Hrodzienskuju vobłaść), ale nasielnictva naličvajecca 14,3 młn čałaviek, što amal u paŭtara raza bolej, čym u Biełarusi.
Aficyjnych moŭ čatyry — ruanda, anhlijskaja, francuzskaja i suachili. Pasadu prezidenta z 2000 hoda bieśpierapynna zajmaje Pol Kahamie. Ruanda miažuje z Demakratyčnaj Respublikaj Konha na zachadzie, Uhandaj na poŭnačy, Tanzanijaj na ŭschodzie i Burundzi na poŭdni.
Ruanda — ahrarnaja kraina z adnosna chutka rastučaj ekanomikaj. Abjom VUP pa parytecie pakupnickaj zdolnaści na 2020 hod — 43 miljardy dalaraŭ (kala 3136 dalaraŭ na dušu nasielnictva).
U 1990 pačałasia hramadzianskaja vajna, jakaja pryviała da adnaho z najbujniejšych hienacydaŭ u historyi i źniščeńnia narodnaści tutsi.
Čytajcie taksama:
Zasnavalnik ruandyjskaha «Radyjo tysiačy pahorkaŭ» zastaniecca biespakaranym
Hieroju filma «Hatel «Ruanda» dali 25 hadoŭ turmy za suviazi z terarystami
