Temaj čarhovaj prahramy «Pa sutnaści» stała pytańnie biaśpieki Biełarusi. Nie abyšłosia biez abmierkavańnia vierahodnaści ŭstupleńnia Biełarusi ŭ vajnu Rasii suprać Ukrainy.
Jak zaŭvažyŭ namieśnik staršyni pastajannaj kamisii pa nacyjanalnaj biaśpiecy Pałaty pradstaŭnikoŭ hienierał-major Rusłan Kasyhin, jaki ŭ 2020-2023 hadach uznačalvaŭ Hałoŭnaje raźviedvalnaje ŭpraŭleńnie Hienštaba,
«važna razumieć, što niahledziačy na toje, što my vyznačylisia, što Biełaruś nie pavinna ŭstupić u vajnu, bo dla našaj dziaržavy heta budzie vializny ŭdar, ale nas usio roŭna sprabujuć uciahnuć u hetu vajnu».
Deputat hienierał-major Rusłan Kasyhin. Skryn videa CTVBYvideo / YouTube
Na pohlad Kasyhina, Biełaruś u vajnu ŭciahvajuć «zachodnija partniory», jakija sprabujuć takim čynam atrymać jašče adzin ryčah, jaki možna vykarystać dla cisku na kiraŭnika našaj dziaržavy, na ŭsio naša kiraŭnictva i na ŭsiu našu krainu».
Tamu, ličyć deputat, «treba razumieć, što mety i zadačy zachodnich partnioraŭ, jak lubić paŭtarać ministr zamiežnych spraŭ Rasii Łaŭroŭ, adna — destabilizavać abstanoŭku. A heta zrabić možna ŭ tym liku za košt uciahnieńnia nas u vajnu. Što, zrazumieła, dla našaj dziaržavy niedapuščalna».
Dalej Kasyhin patłumačyŭ vykazany Łukašenkam tezis ab tym, što Biełaruś nie źbirajecca vajavać i «Rasii ciapier patrebnaja takaja Biełaruś»: «z boku Ukrainy na miažy ź Biełaruśsiu raźmiaščajucca vojski, jakija źjaŭlajucca vializnym vajennym patencyjałam … Heta siły terytaryjalnaj abarony — vajujučyja vojski. I Respublika Biełaruś zabiaśpiečvaje fłanh, tył našych stratehičnych vajennych sajuźnikaŭ — Rasijskaj Fiederacyi, strymlivajučy la našych miežaŭ hrupoŭku terytaryjalnych vojskaŭ, jakaja niepasredna kala miažy składaje 18 tysiač».
Kasyhina, jaki i raniej vykazvaŭsia ab tym, što ZŠA i ES nie chavajuć svajoj padrychtoŭki da ŭzbrojenaha sutyknieńnia ź Biełaruśsiu i Rasijaj, dapoŭniŭ palitołah Piatro Piatroŭski:
«Zhodna z tezisam našaha prezidenta, Rasija nie zacikaŭlenaja ŭ tym, kab Biełaruś udzielničała ŭ śpiecyjalnaj vajennaj apieracyi. Ciapier pierafrazujem: vorahi Rasii zacikaŭlenyja ŭciahnuć Biełaruś u bajavyja dziejańni».
Čytajcie taksama:
Piatroŭski zaklikaŭ da stvareńnia mabilizacyjnaha typu ekanomiki Biełarusi
Biełaruski Hienštab rychtujecca da vajny z Polščaj. Ale abhruntavać heta nie moža biez kanśpirałohii
