Mikoła Dziemidzienka. Skrynšot sa stryma PKK
U telehram-kanale Pałka Kalinoŭskaha źjaviłasia paviedamleńnie pra toje, što bajec z pazyŭnym «Mikoła» byŭ vyklučany sa składu Pałka rašeńniem ahulnaha schodu:
«U hałasavańni ŭdzielničała bolšaja častka vajaroŭ Pałka, kolkaść hałasoŭ za vyklučeńnie skłała 84% ad tych, chto prysutničaŭ pry hałasavańni». (Hetamu piarečyć PKK, pa ich słovach, jany nie mohuć paćvierdzić hetuju infarmacyju — «NN»)
Ale praz paru chvilinaŭ dopis byŭ vydaleny. Nijakich inšych padrabiaznaściaŭ na resursach Pałka nie źjaviłasia.
Nastupnym, chto vykazaŭsia z hetaj nahody, staŭ błohier Maksim Šabucki. U svaim videa jon raskazaŭ, što Mikoła byŭ vyklučany «radaj Pałka» za toje, što bolšaści asabistaha składu była niezrazumiełaja jahonaja pazicyja ŭ Pałku, a taksama za «pakaznuju fanaberystaść». Maŭlaŭ, Dziemidzienka pavodziŭ siabie jak «važnaja šyška».
Taksama błohier zajaviŭ, što «dla Mikoły pryhody nie skončylisia i jaho čakaje finansava-karupcyjny praciah, ale ŭ kryminalna-pravavym aśpiekcie».
Šabucki nazyvaje heta «ŭzoram demakratyi» i «pieramohaj».
Nieŭzabavie na byłym sajcie PKK, jaki zabraŭ sabie adzin z administrataraŭ, źjaviłasia infarmacyja pra toje, što adbyŭsia «ahulny schod PKK». Zhodna ź infarmacyjaj na sajcie, na im, akramia vyklučeńnia «Mikoły», byccam dazvolili bajcam udzielničać u vybarach u Kaardynacyjnuju radu i sfarmiravali «pracoŭnuju hrupu» z roznych padraździaleńniaŭ PKK.
U Pałku imia Kastusia Kalinoŭskaha «Našaj Nivie» skazali, što ahučać svaju aficyjnuju pazicyju 24 krasavika da 16:00 pa kijeŭskim časie. My budziem sačyć za aktualnaj infarmacyjaj niepasredna ad kiraŭnictva PKK i apublikujem jaje adrazu paśla publikacyi.
Mikoła Dziemidzienka paśla vyzvaleńnia z aryštu ŭ 2012-m. Fota «Našaj Nivy»
Mikoła Dziemidzienka — 35-hadovy ŭradženiec Rečycy, jaki ŭ dziacinstvie pierajechaŭ u Viciebskuju vobłaść. U nulavyja staŭ aktyvistam «Maładoha frontu», u jakim prabyŭ kala dziesiaci hadoŭ. Pravioŭ bolš za 150 sutak za kratami pa administracyjnych spravach.
Padtrymaŭ Revalucyju hodnaści va Ukrainie. U 2016-m źjechaŭ žyć u Kijeŭ razam z žonkaj i dvuma dziećmi, dzie adkryŭ svaju jurydyčnuju firmu. Na samym pačatku rasijskaha ŭvarvańnia ŭvajšoŭ u Połk Kalinoŭskaha.
«Naša Niva» — krynica jakasnaj infarmacyi i bastyjon biełaruščyny
PADTRYMAĆ «NN»Čytajcie taksama:
Kanadziec z pałka Kalinoŭskaha: «Svajoj rodnaj adzinkaj liču bataljon «Lićvin»
