Ilustracyjny zdymak. Fota: telehram-kanał «Varšavka Hranica Briest-Tieriespol»
Zakon nie zabaraniaje
Žychar Bresta za 150 dalaraŭ pradaŭ miesca ŭ čarzie padatkaviku, za što atrymaŭ štraf 30 bazavych vieličyń za niezakonnuju pradprymalnickuju dziejnaść. Kab paźbiehnuć pakarańnia, mužčynie treba było zarehistravacca ŭ jakaści indyvidualnaha pradprymalnika.
Jak rastłumačyli ŭ padatkovaj, pakolki asobna takoha vidu ekanamičnaj dziejnaści, jak «prodaž miescaŭ u čarzie», u kłasifikacyi niama, achvotnym zarablać na hetym treba abrać kod 96090 — «Pradastaŭleńnie inšych indyvidualnych pasłuh, nie ŭklučanych u inšyja hrupy».
Takim čynam, stajać u čarzie za inšych ludziej i atrymlivać za heta ŭznaharodu možna całkam lehalna.
Taksama taki varyjant zarobku moža pasavać i tym, chto budzie prasoŭvać pa čarzie hruzavyja aŭtamabili, čerhi ź jakich raściahnulisia na dziasiatki kiłamietraŭ. Darečy, padobnyja vakansii ad firm-pieravozčykaŭ pačali źjaŭlacca jašče letam 2022 hoda. Praŭda, u takim vypadku firma pracaŭładkoŭvaje čałavieka da siabie. Ale padobnyja pasłuhi možna akazvać i ŭ jakaści IP.
Jakija vydatki čakajuć pradprymalnika?
Za adkryćcio IP treba zapłacić 0,5 bazavaj (20 rubloŭ). Taksama indyvidualny pradprymalnik musić adkryć asobny rachunak u banku.
Kali pradprymalnik choča pracavać z najaŭnymi, to daviadziecca nabyć kasavy aparat. Ceny na ich pačynajucca z 200 rubloŭ, u dadatak daviadziecca płacić za jaho absłuhoŭvańnie, a heta jašče kala 20 rubloŭ u miesiac.
Prymać najaŭnyja biez kasavaha aparata nielha, ale pracavać bieź jaho možna. Alternatyŭny sposab — prymać hrošy praz ARIP. Dla hetaha IP treba zarehistravacca ŭ servisie. Na kožnym płaciažy praz ARIP ipešnik budzie stračvać 3% ad sumy, bo svoj pracent biare jak apieratar, tak i bank.
Padatki i FSAN
Padachodny padatak dla IP u Biełarusi składaje 20% ad prybytku. Kali pradprymalnik nie budzie vieści ŭlik vydatkaŭ, to jon maje prava pa zmoŭčvańni adličyć da 20% ad sumy na vydatki, jakija nie treba paćviardžać.
Aproč padatkaŭ, IP musić rabić adličeńni ŭ FSAN u pamiery 35% ad minimalnaha zarobku pa krainie. Na ciapierašni momant heta kala 220 rubloŭ na miesiac.
Ilustracyjny zdymak. Fota: «Naša Niva»
Vyhladaje, što kali čerhi na miažy zastanucca, a patencyjny pradprymalnik hatovy zajmacca hetym rehularna, a nie 1-2 razy na miesiac, to pradavać miescy ŭ čarzie moža być całkam prybytkovaj spravaj.
Mužčyna, jakoha niadaŭna aštrafavali ŭ Breście, pradaŭ miesca ŭ čarzie za 150 dalaraŭ, što składaje kala 500 biełaruskich rubloŭ.
Navat paśla adnoj takoj ździełki IP vyjdzie ŭ plus. Padatak składzie 80 rubloŭ, adličeńni ŭ FSAN — 220. Pakolki adličeńni ŭ FSAN fiksavanyja, to vydatki na abaviazkovyja płaciažy z nastupnych ździełak nie buduć utrymlivać hetuju sumu.
Čytajcie taksama:
U Breście kiroŭca pradaŭ miesca ŭ čarzie na miažy i atrymaŭ vializny štraf
Ad dźviuch hadzin da sutak. Jak doŭha ciapier stajać u čerhach na miažy?
Minskija padatkaviki anansavali maštabnuju pravierku pryvatnych stamatałohij
