U pieradśviatočnyja i śviatočnyja dni ŭ Biełarusi było pradadziena jołačnych cacak i ŭpryhažeńniaŭ, karnavalnych kaściumaŭ, jołak, inšych navahodnich tavaraŭ na ahulnuju sumu 18,8 młrd. rubloŭ.
Pra heta paviedamiła namieśnik ministra handlu Iryna Narkievič 13 studzienia na pres-kanfierencyi ŭ Minsku.
Pavodle jaje słoŭ, z 19 pa 23 śniežnia ŭ Biełarusi pracavali 875 jołačnych kirmašoŭ (dla paraŭnańnia: u 2008 hodzie — 769). Za śniežań 2009 hoda było realizavana 208 tys. žyvych jołak na sumu 2,2 młrd. rubloŭ. Akramia taho,
47,2 młrd. rubloŭ atrymana za kulinarnyja kandytarskija i mučnyja vyraby, paŭfabrykaty, jakich było vypuščana 4,3 tys. ton.
Jak adznačyła Narkievič, arhanizacyi «Biełdziaržcharčprama» taksama padrychtavali 1 młn. 662,8 tys. štuk navahodnich padarunkaŭ. U čaćviortym kvartale 2009 hoda na ŭnutrany rynak krainy było pastaŭlena 4 młn. 408,3 tys. butelek šampanskaha, što na 7,3% bolš, čym za anałahičny pieryjad 2008 hoda.
Pavodle słoŭ Narkievič, na Centralnym kaladnym kirmašy, što prajšoŭ 25—26 śniežnia ŭ Minsku, było realizavana tavaraŭ bolš čym na 280 młn. rubloŭ. U ich liku — aharodnina i sadavina, miasnyja i małočnyja pradukty, pradukcyja ptuškahadoŭli, ryba, kandytarskija vyraby, cacki, jołačnyja ŭpryhažeńni, šviejnyja vyraby i hałaŭnyja ŭbory.
Jak zajaviła namieśnik ministra, u pieradśviatočnyja i śviatočnyja dni ŭ arhanizacyjach handlu byŭ zabiaśpiečany «vielmi šyroki asartymient charčovych i niecharčovych tavaraŭ, najpierš ajčynnaj vytvorčaści». Pry hetym, niahledziačy na libieralizacyju cen u kancy hoda, ich rezkaha pavieličeńnia nie adznačałasia.
