Jarasłaŭ Novikaŭ. Fota: express.am
Umovy ŭ kamiery «niadrennyja», zatrymańnie prajšło «spakojna»
Jarasłaŭ Novikaŭ źjechaŭ ź Biełarusi viasnoj 2023 hoda. Žyŭ u Hruzii i vyjechaŭ u Armieniju, kab zrabić bałharskuju vizu — u Hruzii jamu heta nie ŭdałosia. 2 lutaha pry ŭjeździe jaho zatrymali. Ciapier Novikava ŭtrymlivajuć u kryminalna-vykanaŭčaj ustanovie «Vanadzor» za 120 kiłamietraŭ ad Jerevana.
Biełarus raspavioŭ «Miedyjazonie», što zatrymańnie prajšło «vielmi spakojna»: biez kajdankoŭ i hrubaściaŭ.
— Razmaŭlali na ruskaj. Apieratyŭniki padbadziorvali: nie asudžali za toje, što źjechaŭ, a, naadvarot, kazali, što pravilna zrabiŭ.
Umovy ŭ kamiery, kudy Novikava źmiaścili, nazyvaje «niadrennymi»: čatyry spalnyja miescy, stoł, dźvie łaŭki, draŭlanaja padłoha, ablezłyja ścieny i «strašnieńki» tualetny pakoj. U kamiery jość televizar i chaładzilnik. Advakat biełarusa Araik Papikian zapeŭniŭ, što staŭleńnie ŭ «Vanadzory» da Jarasłava «narmalnaje», «z charčavańniem taksama ŭsio ŭ paradku — jon ni razu nie skardziŭsia».
— Pieršyja piać dzion ja pravioŭ adzin, ale potym padsialili Maksima, jaki trapiŭ u takuju ž situacyju. Maksim Vajtkiavičus pracuje teściroŭščykam, taksama skončyŭ MDŁU. Paśla vypusku źjechaŭ u Hruziju. U Jerevan Maksim jechaŭ na kancert, nie padazrajučy što niešta moža pajści nie tak, bo da hetaha jon užo byvaŭ u Armienii paśla pierajezdu. Paźniej my zrazumieli, što nas abodvuch abviaścili ŭ miždziaržaŭny vyšuk vosieńniu 2023, choć Maksim źjechaŭ viasnoj 2022, a ja — viasnoj 2023, — raspavioŭ Novikaŭ.
U bazie danych vyšuku MUS Rasii Jarasłava Novikava nie ŭdałosia znajści. Adnak «Miedyjazona» znajšła ŭ joj jaho sukamiernika Maksima. U bazie nie paznačany artykuł, pa jakim šukajuć 23-hadovaha biełarusa.
Siłaviki prychodzili da baćkoŭ u Biełarusi i prasili zrabić fotapryznańnie viny
— Źjazdžajučy, ja razumieŭ, što sprava budzie zaviedzienaja, ale pierśpiektyva žyć i pracavać mnie bližej, čym trapleńnie kali nie pad mabilizacyju, to pad vielmi cichuju, ale aktyŭnuju da jaje padrychtoŭku, jakaja, ja ŭpeŭnieny, siońnia maje miesca być.
Pradstaŭniki ambasady nie źviazvalisia z zatrymanymi biełarusami, choć jany znachodziacca ŭ «Vanadzory» ŭžo paŭtara miesiaca. Jarasłaŭ raspavioŭ, što ŭ Biełarusi da jahonych baćkoŭ «prychodzili»:
— Kazali: «Kali vaš syn vierniecca, ničoha strašnaha nie adbudziecca. Ci zrobić fatahrafiju, dzie pryznaje vinu (na papiercy prasili napisać), to vyšuk spyniać».
U liście «Miedyjazonie» Novikaŭ źviarnuŭsia «da ŭsich maładych ludziej, jakim pahražaje pachod u vajenkamat»:
— Kali łaska, padumajcie trojčy pierad pachodam tudy; i kali dumajecie, što ja lišni raz panikuju, to pahladzicie na ŭsie źmieny, źviazanyja z vojskam Biełarusi, za 2023 hod.
***
Advakat Papikian daviedaŭsia, što ŭ «Vanadzory» ŭtrymlivajucca čatyry biełarusy, jakich šukajuć u Biełarusi. U 2023 hodzie viadomy tolki adzin taki vypadak: paŭtara miesiaca nie vypuskali z Armienii Jaŭhiena Hucałava. U Biełarusi jon abvieščany ŭ vyšuk z-za abvinavačvańniaŭ pa artykule ab ździeku nad dziaržsimvałami.
Imiony astatnich zatrymanych u Armienii biełarusaŭ nieviadomyja.
— Usio pa adnoj i toj ža schiemie: pierasiekli miažu z Hruzii ŭ Armieniju i armianski bok zatrymlivaje, aryštoŭvaje, i ciapier idzie praces [vyniasieńnia rašeńnia] ab vydačy. Nikoha jašče nie vydavali, ale praces idzie poŭnym chodam, — kaža Papikian.
Abaronca vieryć, što situacyja ź Jarasłavam skončycca dobra. Na jahonuju prośbu ab dapamozie ŭ Ofis Śviatłany Cichanoŭskaj eks-ambasadar u Arhientynie Uładzimir Astapienka napisaŭ list u mihracyjnuju słužbu Armienii, biełaruskaja dyjaspara ŭ Armienii i niekalki pravaabarončych arhanizacyj rychtujuć svaje zajavy ŭ padtrymku Jarasłava.
Čytajcie taksama:
U Armienii z pačatku hoda zatrymali na zapyt prakuratury Biełarusi čatyroch biełarusaŭ
U Armienii zatrymali ŭchilista ad vojska ź Biełarusi. Jaho mohuć vysłać na radzimu
