Volha Dziemka. Fota: volya.weebly.com.
Pra historyju Volhi raniej pisali miedyja: pamiž sieansami žorstkaj chimijaterapii za apošnija dva hady Vola paśpieła stvaryć katałoh «Biełaruski stroj» i vialiki albom «Tradycyjnyja stroi Biełarusi», paŭdzielničać u Metropolitan Fashion Week u Sietle z pakazami aŭtentyčnych ukrainskich kaściumaŭ kalekcyi VOLYA. Adnak chvaroba nie choča sychodzić.
Volha adznačyła ŭ svaich sacsietkach, što, na žal, sieansy chimijaterapii nie dajuć čakanaj remisii.
«Ź ciaham času pastupova stanovicca horš. Usio bolš času idzie na toje, kab adnavicca paśla chimijaterapii— dva tydni z kožnaha miesiaca možna prosta vykraślić, ale, zvyčajna, bolš, bo vyłaziać niejkija ŭskładnieńni, jakich nichto nie čakaŭ», — pryznałasia režysiorka.
U pryvatnaści, adnym z asnoŭnych pabočnych efiektaŭ praciahłaj imunasupresiŭnaj terapii źjaŭlajecca strata kaścianoj tkanki i ciažkija infiekcyi. Za apošni hod Voli daviałosia pieranieści dźvie terminovyja stamatałahičnyja apieracyi: infiekcyja prajadała kość ažno da levaha voka.
Terapija nie tolki ciažkaja dla cieła, ale jana taksama supravadžajecca vialikimi rachunkami.
Na ščaście, strachoŭka pakryvaje značnuju častku, pakidajučy kala 10 tysiač dołaraŭ z ułasnaj kišeni na chimijaterapiju i leki. Ahulny košt ekstranych stamatałahičnych apieracyj skłaŭ kala 12 tysiač dołaraŭ.
Kab dapamahčy Volzie Dziemka spravicca z hetymi vydatkami, abjaŭleny novy zbor.
Dziaŭčyna kanstatuje, što choča trapić na ekśpierymientalnuju terapiju, bo bolš mietadaŭ u jaje pakul nie zastałosia.
Nahadajem, što Volha Dziemka — składalnica vialikaj kalekcyi biełaruskich nacyjanalnych strojaŭ, jakuju źbirała na praciahu 10 hadoŭ, kuplajučy elemienty adzieńnia ŭ roznych ludziej. Jana źniała dakumientalnuju stužku «Pieśni staroj Jeŭropy» pra biełaruskija narodnyja pieśni — u film jana ŭkładała, u tym liku, ułasnyja srodki. Albom «Tradycyjnyja narodnyja stroi», stvorany Volhaj, heta jašče adzin krok na šlachu da muzieja biełaruskaj tradycyjnaj kultury, jaki dziaŭčyna maryć adkryć u Sietle.
«Usio biełaruskaje — heta patreba serca. Kali jano nie robicca, značyć treba rabić, kali jaho niama — značyć treba stvarać», — ličyć biełaruska.
Padtrymać mužnuju Volhu Dziemka možna tut.
Čytajcie taksama:
Kalekcyju aŭtentyčnych strojaŭ Voli Dziemki pakažuć na Metropolitan Fashion Week u Łos-Andželesie
