6 studzienia ličycca dniom narodzinaŭ adnaho z ulubionych litaraturnych piersanažaŭ, łondanskaha detektyva Šerłaka Chołmsa. My ž vyrašyli vyśvietlić,
chto moh by być Šerłak Chołmsam u biełaruskaj ekranizacyi Konan-Dojla?Rasśledavańnie Lizy Kavalčyk.
 Ihar Zabara |
Chto ź biełaruskich aktoraŭ zmoh by syhrać Šerłaka Chołmsa?
Siarhiej Chareŭski, mastactvaznaŭca: Chto taki Šerłak Chołms? Heta prajdziśviet, machlar, sam trochi kryminalnik, jaki znajecca z adkidami hramadstva. A chto jak nie vykanaŭca roli ŭ rudaŭskaj «Kamiedyi», zasłužany čort Biełarusi Ihar Zabara, jaki bliskuča hraje prakavietnaha ašukanca i šantažysta čałaviectva, zdatny na takoje?!
Nie treba padładžvacca pad anhlijski aryhinał i savieckuju viersiju stužki — praźmierny arystakratyzm tut niedarečy. A dziela nadańnia łosku na rolu doktara Ŭotsana zaprasić aktora Kupałaŭskaha, vykanaŭcu roli Mikity Znoska ŭ śpiektakli «Tutejšyja» elehantnaha, iraničnaha Viktara Manajeva.
 Viktar Manajeŭ |
Doktar Maryjarci? Biez prablem: na hetuju hłabalnuju rolu padyduć kandydatury mnohich ajčynnych palitykaŭ, i z Baskiervilskaj pačvaraj pytańniaŭ nie budzie — u nas złobnych psiukoŭ u kožnaj vioscy jak sabak niarezanych.
Słava Bandarenka, kinascenaryst, aŭtar detektyŭnaha ramanu «Likvidacyja»: Kali zdymać Šerłak Chołmsa na biełaruski manier, dyk na hałoŭnuju rolu treba brać maładoha aktora Maksima Panimatčanku z Teatra biełaruskaj dramaturhii. Sa svaimi kudzierkami i vybitnym nosam jon byŭ by vielmi panadnym Chołmsam. I zrabić jaho šatłandcam ci irłandcam. «Fiška» zroblenaha ŭ Biełarusi Chołmsa: syščyk by pastajanna paciahvaŭ nie lulku, a viski z rylca, i akramia kryminalnych złačynstvaŭ zmahaŭsia b suprać anhlijskich akupantaŭ.
 Maksim Panimatčanka. Fota – Alaksandra Ružački, "Biełaruś Siehodnia" |
Andrej Kudzinienka, režysior: Na rolu Chołmsa Siarhiej Žuraviel, na rol Ŭotsana — Viktar Manajeŭ. Abo naadvarot. Kali Chołms — prahmatyk i, amal jak Švarcenehier, rašučy i mahutny, dyk Ŭotsan — dalikatny i vytančany spadar, mozh rasśledvańnia. Voś takaja rakiroŭka.
Jak by źmianiŭsia siužet Šerłaka Chołmsa, kali b jaho zdymali ŭ Biełarusi?
Siarhiej Chareŭski: Siužet taki: Šerłak Chołms i doktar Uotsan siadziać na Karł-Marks-stryt u kaviarni «Maja anhlijskaja babula» i čytajuć biełaruskuju kryminalnuju chroniku z usioj jaje biespraśviecicaj: rasčlanionka, niematyvavanyja zabojstvy. I potym biarucca za adnu sa spravaŭ.
Tut samaje hałoŭnaje — praŭdzivaja biełaruskaja faktura. Nie iści pa šlachu savieckaha kiniematohrafa, kali jeŭrapiejcaŭ hrali prybałty, a maŭraŭ — azierbajžancy i hruziny. Na maju dumku, hałoŭnaje, kab usio było aŭtentyčnaje, kožnaj historyja musić być źviazanaja ź biełaruskaj rečaisnaściu. Naprykład, pavinny hučać postsavieckija aniekdoty pra Šerłaka Chołmsa, a taksam musiać źjavicca kryminalnyja historyi ŭ postpierabudovačnam klučy pra nievierahodnyja afiory ź nieruchomaściu i zbrojaj, a taksama bajki pra kantrabandu na Zachad i Uschod.
Samaje hałoŭnaje pytańnie ajčynnaha «Chołmsa» — nie vybar hałoŭnych hierojaŭ, a chto z našych aktoraŭ druhoha płanu zmoža nie skryviŭšysia, z honaram i šykam skazać: «Aŭsianka, ser!». Bo z naturaj u nas poŭny paradak: zamiest Chiempšyrskaj dryhvy majem bałoty la Aśviei dy Čarei, a roŭniadź Dźviny — nu, čystaja Temza. A admietnyja zavułki Homiela i Hrodna — vydatnyja dekaracyi dla detektyvaŭ.
 Viktar Manajeŭ i Siarhiej Žuraviel |
Słava Bandarenka: Kali pieraniasiom dziei ŭ Minsk, dyk usio pačniecca z banalnaha zabojstva. Ale naš Chołms nie prosta raskrucić kryminałku, jon da taho ž natrapić na karupcyjnuju zmovu ŭ jakim-niebudź biełaruskim ministerstvie.
Andrej Kudzinienka: Pakolki ciapier kryzis, dziejańni karciny musiać adbyvacca niedalok ad stalicy, niedzie ŭ Smalavičach, maksimum u Babrujsku. Šerłak Chołms i doktar Ŭotsan zaniaty ahulnanacyjanalnaj, datul niavykananaj misijaj: šukajuć i znachodziać kryž Jeŭfrasińni Połackaj. Abo napaleonaŭskaje zołata. Abo ščaście biełaruskaha naroda.
Čytać jašče:
Z historyi zamachaŭ na vobraz Šerłaka Chołmsa ŭ suśvietnym kiniematohrafie.
