Suprać aktyvistki niepryznavanaha ŭładami Sajuza palakaŭ Taresy Sobal ŭzbudžana kryminalnaja sprava pavodle častki II artykuła 210 kryminalnaha kodeksa Respubliki Biełaruś.
Supracoŭniki Vałožynskaha RAUSa abvinavačvajuć žančynu ŭ złoŭžyvańni, jakoje palahaje na tym, što ŭ 2004 hodzie pavodle zahada tahačasnaha kiraŭnika Sajuza palakaŭ Tadevuša Kručkoŭskaha, Dom polski ŭ Iviancy atrymaŭ materyjalnuju dapamohu, što faktyčna i stała padstavaj dla ŭzbudžeńnia kryminalnaj spravy suprać Teresy Sobal.
Spadarynia Sobal prakamientavała situacyju ŭ razmovie z karespandentam «NN»: «Zaprasili mianie ŭ milicyju i pryčapilisia da hetych dakumientaŭ, što ŭ Hrodnie afarmlali. Tady kiraŭnikom Sajuza Tadeuš Kručkoŭski byŭ. Usio ž u Hrodnie rabiłasia, usie dakumienty tam afarmlali. My ŭ Iviancy tolki atrymoŭvali srodki dla dziejnaści Domu polskaha.
Hety cisk na nas daŭno pačaŭsia. Ale ja aptymistyčna staviłasia da rečaisnaści. Dumała, hod novy pryjšoŭ – usio źmienicca. Chočacca, kab Dom byŭ simvałam supracoŭnictva, siabroŭstva. Ale zaraz mnie dali zrazumieć, što ničoha hetaha nie budzie. Voś tolki što patelefanavali z padatkovaj inśpiekcyi – patrabujuć ksierakopii ŭsich staronak pašparta. Majho i muža. Skazali, što chočuć pahladzieć na maje polskija vizy. Raniej my ŭžo nasili svaje pašparty ŭ harsaviet – tam byli pierakananyja, što my raźviedzienyja i pravodzim niejkija machinacyi…
Zdaroŭje nie vytrymlivaje. Nam z mužam užo siomy dziesiatak. Nie chočacca tolki z apuščanaj hałavoj sychodzić. Chočacca zmahacca. U mianie ŭnutry spakoj. Ja ŭpeŭnienaja, što zmahu ŭsio pieranieści».
Aktyvist SPB Andrej Pačobut ličyć, što pieraśled T.Sobal – adzin z elemientaŭ cisku na polskuju mienšaść u Biełarusi:
«My nazirajem abvastreńnie, uzrastaje cisk na siabroŭ SPB. Na praciahu minułaha hoda 122 polskija nastaŭniki byli dapytanyja. U aficyjnych dziaržaŭnych ŚMI ŭźniałasia antypolskaja chvala. Viartajecca mova nianaviści. I hetaja kryminalnaja sprava nadumanaja. Jana supiarečyć pracesualnamu kodeksu. Heta ŭsio prajavy adzinaj kampanii».
