Kanfierencyja Pałka Kalinoŭskaha ŭ Kijevie 29 listapada 2023 hoda. Fota: pres-słužba Pałka Kalinoŭskaha
Kalinoŭcy z 21 studzienia pa 1 lutaha pabačacca ź biełarusami ŭ 12 haradach Polščy, Čechii, Niamieččyny i Litvy.
U anonsie pajezdki adznačajecca, što bahata biełarusaŭ, jakija apynulisia na čužynie z-za palityčnaha pieraśledu, uskładajuć na Połk Kalinoŭskaha svaje nadziei na viartańnie.
«Ale vyzvalić našu krainu my možam tolki razam!» — padkreślivajecca ŭ im.
Namieśnik kamandzira Pałka Vadzim Kabančuk kaža, što jamu nie chaciełasia b nazyvać biełarusaŭ na čužynie emihrantami, bo heta aznačaje, što jany pakinuli radzimu na doŭhi čas.
«Viadoma, treba hladzieć na situacyju realistyčna, ale ŭsie našy dziejańni pavinny być nakiravanyja na viartańnie ŭ Biełaruś. Dla hetaha nam treba kansalidavacca, kab skarystacca tymi mahčymaściami, jakija pierad nami abaviazkova zjaviacca. I mienavita pra toje, jak nam usim razam źmianić situacyju ŭ našaj krainie, kab usie achvotnyja mahli viarnucca, my b chacieli parazmaŭlać na sustrečach ź biełarusami», — davodzić jon.
Kabančuk kaža, što za amal dva hady vajny Pałku dapamahła vializnaja kolkaść biełarusaŭ.
«Heta mienavita tyja biełarusy, jakija chočuć viarnucca i nie siadziać skłaŭšy ruki. My chočam im asabista padziakavać za dapamohu i vypracavać miechanizmy dalejšaj sumiesnaj pracy», — adznačaje jon.
Niadaŭna Vadzim Kabančuk vykazaŭsia za stvareńnie biełaruskich vajskovych farmavańniaŭ u samoj Jeŭropie. Na jaho dumku, novyja farmavańni mahli b ulicca ŭ polska-ŭkrainska-litoŭskuju bryhadu imia Kanstancina Astrožskaha. Achvotnych, raźličvaŭ jon, buduć sotni.
Letaś u listapadzie ź biełarusami sustrakalisia palityki Vadzim Prakopjeŭ, Valeryj Sachaščyk, Andrej Jahoraŭ. Ich turnie było pa troch polskich haradach: Urocłavie, Poznani i Varšavie.
Jany havaryli pra nieabchodnaść abjadnańnia biełarusaŭ u masavuju arhanizavanuju strukturu, jakaja pavinna stać apiryščam dla demakratyčnych pieramienaŭ u Biełarusi biez Łukašenki, a taksama pra vybary ŭ Kaardynacyjnuju radu.
Vadzim Kabančuk nastojvaje, što pajezdka kalinoŭcaŭ nie źviazanaja z pajezdkami inšych ludziej.
Pavodle jaho, sustrečy biełaruskich dobraachvotnikaŭ z suajčyńnikami rehularna pravodzilisia jašče da poŭnamaštabnaj vajny. Ich inicyjataram byŭ adzin sa stvaralnikaŭ Pałka Jan Mielnikaŭ, jaki vajuje za Ukrainu z 2014 hoda, a taksama inšyja biełaruskija dobraachvotniki.
Padraździaleńnie sistemna padtrymlivaje kantakty ź biełarusami ŭ zamiežžy, ale sustreč ź imi nie było apošnija dva hady. Zapyt na ich isnuje.
«Ad pačatku poŭnamaštabnaj vajny biełaruskim dobraachvotnikam stała ciažka vyjazdžać z Ukrainy. Heta źviazana jak i ź ich udziełam u bajavych dziejańniach, tak i z tym, što vyjechać nie tak i prosta z krainy, jakaja vajuje», — tłumačyć Vadzim Kabančuk.
Pavodle jaho, u Pałka Kalinoŭskaha jość płany pa vyzvaleńni Biełarusi na vypadak zjaŭleńnia «vakna mahčymaściaŭ».
***
Połk Kalinoŭskaha — vajennaja farmacyja ŭ składzie Uzbrojenych sił Ukrainy, sfarmavanaja ź biełaruskich dobraachvotnikaŭ. Padraździaleńnie stvoranaje ŭ sakaviku 2022 hoda. U jaho składzie bataljony «Vołat» i «Litvin».
Misija Pałka: «Vyzvaleńnie Biełarusi praz vyzvaleńnie Ukrainy». Pavodle kalinoŭcaŭ, vyzvaleńnie Ukrainy ad rasijskich zachopnikaŭ nieminuča pryviadzie da pasłableńnia i navat krachu pucinskaha režymu, što daść «mahčymaść pastavić kropku ŭ historyi isnavańnia režymu Łukašenki ŭ Biełarusi».
U 2022 hodzie kalinoŭcy zajavili pra palityčnyja ambicyi. Stała viadoma pra isnavańnie palityčnaha sojmu Pałka.
U 2023 hodzie Połk sabraŭ kanfieriencyju «Šlach da Voli», na jakoj pasprabavaŭ abjadnać usie demakratyčnyja siły i raspracavać stratehiju vyzvaleńnia Biełarusi.
«Naša Niva» — krynica jakasnaj infarmacyi i bastyjon biełaruščyny
PADTRYMAĆ «NN»Hladzicie taksama:
Połk Kalinoŭskaha paviedamiŭ pra adnaŭleńnie rekrutynhu ŭ svaje šerahi
Połk Kalinoŭskaha pradstaviŭ spravazdaču ź niezaležnaha aŭdytu
