Ryhor Kastusioŭ u sudzie. Fota: BiełTA
Palitviazień, były staršynia BNF Ryhor Kastusioŭ druhi miesiac znachodzicca ŭ pamiaškańni kamiernaha typu, tamu pazbaŭleny telefanavańniaŭ rodnym. Ale napiaredadni Novaha hoda ad jaho pryjšoŭ list ź vieršami i vinšavańniami. Pra źmiest lista Svabodzie raskazaŭ ziać palityka Źmicier Antončyk, jaki ź siamjoj žyvie ŭ Polščy.
«Spadar Ryhor prysłaŭ cełuju paemu. Tam 40 słupkoŭ pa 4 radki, pryśviečanyja jahonym najlepšym siabram. Z navahodnimi vinšavańniami. Napisaŭ, što heta jašče pałova», — padzialiŭsia svajak Kastusiova.
Padčas źniavoleńnia ŭ Kastusiova vyjavili ankałahičnaje zachvorvańnie, uletku jamu rabili čarhovaje daśledavańnie, ale vyniku tak i nie paviedamili. Pavodle Źmitra Antončyka, jahony cieść nieachvotna zakranaje ŭ listach temu lačeńnia.
«Napisaŭ tolki, što abiacajuć zrabić analiz kryvi, ale kali heta budzie, nie paviedamiŭ. Pra samaadčuvańnie piša, što narmalnaje, na ŭmovy nie skardzicca. Ton lista, jak zaŭsiody, badziory», — raskazaŭ surazmoŭca.
- Kandydata ŭ prezidenty na vybarach 2010 hoda, byłoha staršyniu partyi BNF Ryhora Kastusiova ŭ 2022 hodzie asudzili na 10 hadoŭ źniavoleńnia praz abvinavačańnie ŭ zmovie z metaj zachopu ŭłady.
- Praz try miesiacy Ryhoru Kastusiovu spoŭnicca 67 hadoŭ.
- Pakarańnie palityk adbyvaje ŭ kałonii «Voŭčyja nory» pad Ivacevičami.
- U listapadzie minułaha hoda Ryhora Kastusiova jak parušalnika režymu źmiaścili na paŭhoda ŭ pamiaškańnie kamiernaha typu z bolš žorstkimi, čym u atradzie kałonii, umovami ŭtrymańnia.
Čytajcie taksama:
«Samaadčuvańnie lepšym nie robicca». Ad Ryhora Kastusiova pryjšoŭ pieršy list z PKT
Ryhor Kastusioŭ vyjšaŭ z ŠIZA, ad jaho chavajuć vyniki ankałahičnaha daśledavańnia
«Režym jaho zabivaje». 66-hadovaha Ryhora Kastusiova znoŭ źmiaścili ŭ ŠIZA
