Pra heta zajaviŭ žurnalistam 28 śniežnia va Uładzivastoku vice‑premjer RF Ihar Siečyn, paviedamlaje RIA Novosti.
Biełaruska‑rasijskaje pahadnieńnie ab časovych pastaŭkach nafty ŭ 2010 hodzie moža być padpisanaje ŭ Maskvie 30—31 śniežnia. Pra heta zajaviŭ žurnalistam 28 śniežnia va Uładzivastoku vice‑premjer RF Ihar Siečyn, paviedamlaje RIA Novosti.
Ciapier baki praciahvajuć pieramovy na hety kont. Jak zajaviŭ 23 śniežnia na pres‑kanfierencyi ŭ Minsku pasoł Rasii Alaksandr Surykaŭ, «staić zadača kali nie padpisać mižuradavaje pahadnieńnie, to chacia b padpisać pratakoły, jakija harantavali b pastaŭku nafty z 1 studzienia». «Pahadnieńnie moža być padpisanaje i paźniej», — dadaŭ pasoł.
Pry hetym Surykaŭ zapeŭniŭ, što pastaŭki nafty ŭ Biełaruś spynienyja nie buduć, navat kali adpaviednaje pahadnieńnie bakam nie ŭdasca padpisać da kanca 2009 hoda. Zatrymka z padpisańniem dakumienta, patłumačyŭ dypłamat, moža ŭźniknuć z‑za taho, što bakam nieabchodna padličyć bałans abjomu nafty, jakaja budzie pastaŭlacca ŭ Biełaruś biaspošlinna dla ŭnutranaha karystańnia. Surykaŭ nahadaŭ, što nazyvalisia roznyja ličby abjomu biaspošlinnych pastavak: ad 5—6 da 8—9 młn. ton.
Pasoł adznačyŭ, što nafta dla ekspartu budzie pastaŭlacca ŭ Biełaruś pa biržavych cenach. «Košt rasijskaj nafty marki Urals na ŭčarašni dzień składała 77,80 dalara za barel», — skazaŭ Surykaŭ. Jon padkreśliŭ: «Treba stvaryć i dla rasijskich pastaŭščykoŭ, i dla biełaruskich pierapracoŭčych pradpryjemstvaŭ uzajemavyhadnyja ŭmovy».
Pry hetym dypłamat abvierhnuŭ infarmacyju pra toje, što Maskva źviazvaje košt pastavak nafty ŭ Biełaruś z dostupam rasijskich kampanij da pryvatyzacyi biełaruskaha naftavaha kompleksu «Naftan‑Palimir».
Nahadajem, z pačatku 2010 hoda spyniaje dziejnaść panižajučy kaeficyjent na pastaŭki nafty i naftapraduktaŭ u Biełaruś, praduhledžany biełaruska‑rasijskim pahadnieńniem ad 12 śniežnia 2007 hoda.
Sioleta kaeficyjent składaŭ 0,356 da standartnaj rasijskaj ekspartnaj pošliny na naftu.
Minsk zacikaŭleny ŭ jaho zachavańni, ale Maskva z takim padychodam nie zhodna, matyvujučy heta tym, što rasijskaja naftapierapracoŭčaja pramysłovaść znachodzicca ŭ mienš spryjalnych umovach.
«Nielha budavać ekanamičnaje supracoŭnictva za košt adnaho partniora. Takoha ŭ biźniesie nie byvaje, kab adzin zaŭsiody vyjhravaŭ, a druhi ŭvieś čas prajhravaŭ. Možna pazbavicca partniora», — zajaviŭ Ihar Siečyn žurnalistam u Sankt‑Pieciarburhu 18 śniežnia, kamientujučy chod biełaruska‑rasijskich pieramoŭ pa nafcie.
Vice‑premjer nahadaŭ, što ŭ 1990‑ch hadach usia rasijskaja nafta pastaŭlałasia ŭ Biełaruś biaspošlinna, u suviazi z čym rasijski biudžet pačaŭ nieści straty. U 1995 hodzie było padpisana dvuchbakovaje pahadnieńnie ab umovach pastaŭki nafty i padziele ekspartnaj pošliny pry eksparcie naftapraduktaŭ. «Hetaje pahadnieńnie praduhledžvała ŭviadzieńnie režymu kampiensacyi vypadzieńnia mytnych pošlin našamu biudžetu ŭ praporcyi 15 da 85», — skazaŭ Siečyn. Pavodle jaho słoŭ, u 1995 hodzie Rasija atrymała ŭ vyhladzie kampiensacyj 6,8 młn. dalaraŭ, za 10 miesiacaŭ 1996 hoda — 1,7 młn., a ŭ pieryjad z 1997 pa 2001 hady ŭvohule nie atrymlivała nijakaj kampiensacyi. Biełaruski bok denansavaŭ pahadnieńnie ŭ adnabakovym paradku.
U 2006 hodzie Maskva inicyjavała ŭviadzieńnie 100‑pracentnaj vypłaty pošliny, suprać čaho kateharyčna piarečyŭ Minsk. Kampramis byŭ znojdzieny ŭ studzieni 2007 hoda — baki padpisali trochhadovaje pahadnieńnie ab supracoŭnictvie ŭ naftavaj śfiery, dziejańnie jakoha zakančvajecca ŭ 2009 hodzie.
Pavodle słoŭ Siečyna, śpiecpošlina na pastaŭki nafty ŭ Biełaruś na samaj spravie nikoli nie była pošlinaj u kłasičnym razumieńni. Heta, chutčej, miechanizm padziełu prybytku ad ekspartu naftapraduktaŭ, vyrablenych z rasijskaj nafty na biełaruskich NPZ.
Vice‑premjer RF papiaredziŭ, što dakumienty ab biaspošlinnych pastaŭkach pavinny być padpisanyja da kanca hoda — inakš uvieś abjom pastavak nafty na biełaruskija NPZ Rasija budzie abkładać pošlinaj u poŭnym abjomie.
