Upieršyniu amal za 80 hadoŭ isnavańnia Arhanizacyi Abjadnanych Nacyj pradstaŭnik Rasii pazbavicca miesca ŭ hałoŭnaj sudovaj instancyi. Sudździa Kirył Hievarhian nie zmoh pieravybracca ŭ skład Mižnarodnaha suda AAN, jaki byŭ zasnavany ŭ 1945 hodzie, kab vyrašać pravavyja sprečki pamiž dziaržavami i davać zaklučeńni pa pravavych pytańniach dla arhanizacyi, piša The Moscow Times.
Hievarhian, jaki pracavaŭ u sudzie AAN z 2015 hoda, a ŭ 2021-m staŭ jaho vice-staršynioj, atrymaŭ tolki 77 hałasoŭ na Hienieralnaj Asamblei AAN, zaniaŭšy pieradapošniaje miesca siarod usich kandydataŭ i apiaredziŭšy pa ŭzroŭni padtrymki tolki pradstaŭnika Konha.
Savieckaha abo rasijskaha sudździ ŭ składzie Mižnarodnaha suda nie budzie ŭpieršyniu ŭ historyi: kandydat ad RF nabraŭ mienšaść hałasoŭ u abodvuch hałasujučych orhanach (Saviet biaśpieki, i Hienieralnaja asambleja), i heta nahladna adlustroŭvaje sapraŭdny ŭzrovień padtrymki Rasii ŭ AAN, zaznačaje mižnarodny juryst Siarhiej Hałubok.
Jon padkreślivaje, što nievybrańnie rasijskaha sudździ niasie nie tolki simvaličnyja, ale i realnyja nastupstvy: u Rasii nie budzie harantavanaha hołasu ŭ spravach suprać jaje.
«Padtrymka kandydataŭ u Mižnarodny sud — heta nie pustyja rezalucyi, — skazaŭ Hałubok The Moscow Times. — Heta asnoŭny sudovy orhan, u jakoha šmat spraŭ na razhladzie».
