Jakubu (u sinim) suprć Lichtaroviča i Šytava.
Na zaklučny matč hrupavoha etapu Lihi Jeŭropy suprać BATE trenier «Eviertana» vystaviŭ dublujučy skład. Jasnaja sprava, brytancy ŭžo zabiaśpiečyli sabie vychad z hrupy, a tamu vyrašyli pabierahčy lideraŭ.
Niekatoryja hulcy jašče nikoli nie źjaŭlalisia ź pieršych chvilin u aficyjnym matčy livierpulskaha kłubu. Asabliva ŭ abaronie anhlijskaj kamandy vyjšli zusim maładyja chłopcy pa 16‑17 hadoŭ.
Tym nie mienš, bukmiekiery ŭsio adno addavali pieravahu «Eviertanu». Zazirnuŭ pierad matčam na sajty bukmiekierskich kantor. Kaaficyjent na pieramohu BATE składaŭ 1 da 4,75.
Asablivaj cikavaści ŭ Livierpuli matč kamand nie vyklikaŭ. Trybuny byli napałovu pustyja. Navat padčas tranślacyi było čuvać, jak časam hrupka z 50‑60 biełarusaŭ pierakrykvała anhielcaŭ.
BATE ŭsio ž ź pieršych chvilinaŭ zavałodaŭ inicyjatyvaj. Ale da realnych pahrozaŭ varotam vieterana Neša sprava nie dachodziła. Chiba Vaładźko zdalok dobra trapiŭ pa miačy, ale varatar byŭ na miescy.
U «Eviertana» ŭ atacy atrymlivałasia jašče mieniej. Nihiryjec Jakubu tak i nie moh začapicca za miač. U našych u atacy asabliva staraŭsia Siarhiej Kryviec, a voś Maksim Skavyš byŭ zusim niezaŭvažny.
Tym nie mienš, uražańnie, što BATE ŭ hety viečar svajho nie ŭpuścić nie pakidała. Na 62‑oj chvilinie Pavieł Niachajčyk biŭ užo ŭ pustyja varoty, ale svoječasova paśpieŭ abaronca Dafi.
Nu a adziny hoł u hulni atrymaŭsia na 75‑aj chvilinie. Była pieradača z fłanhu, jakuju śpinaj da varot pryniaŭ Siarhiej Sasnoŭski. Jon i skinuŭ miač pad udar Alaksandru Jureviču. Udar u abaroncy atrymaŭsia dobry — 0:1.
«Eviertan» mieŭ šaniec adyhracca za piać chvilin za da skančeńnia asnoŭnaha času, ale Ahard pasłaŭ miač u niekalkich santymietrach ad štanhi.
Balelščyki «Eviertana» pasunulisia z trybun zadoŭha da finalnaha śvistka.
Praź dziesiać hadoŭ mała ŭžo chto ŭzhadaje ŭ jakim składzie hulali livierpulcy, a voś lik zastaniecca. BATE atrymaŭ histaryčnuju pieramohu nad anhlijskim kłubam.
U subotu ŭ Barysavie adbudziecca ŭhanaravańnie BATE załatymi miedalami pieršynstva, a potym kamanda sydzie ŭ adpačynak. Siezon dla kłuba Viktara Hančarenki atrymaŭsia dosyć udałym.
***
U inšym matčy hrupy lisabonskaja «Bienfika» doma pieramahła hrečaski AJEK 2:1.
Takim čynam vynikovaja turnirnaja tablica hrupy I vyhladaje nastupnym čynam: «Bienfika» — 15 punktaŭ, «Eviertan» — 9, BATE — 7, AJEK — 4.
Zaŭtra adbudziecca losavańnie dalejšych etapaŭ Lihi čempijonaŭ i Lihi Jeŭropy.
