Ministr achovy zdaroŭja Dźmitryj Pinievič raskazvaje studentam miedyčnaha ŭniviersiteta pra Dzień narodnaha adzinstva. Ilustracyjnaje fota: bsmu.by
Były kiraŭnik rajonnaj palikliniki Siarhiej (imia źmienienaje pa jaho prośbie) u abnoŭlenym zakonie «Ab achovie zdaroŭja» bačyć sprobu ŭłady zakłaści ŭ atrymańnie miedykami pahłyblenaj adukacyi pa kliničnych profilach — rezidenturu.
Pavodle jaho, taki padychod padrychtoŭki vuzkich śpiecyjalistaŭ dziejničaje ŭ jeŭrapiejskich krainach i Izraili.
«Naahuł heta dobraja tema, kab miedyki stanavilisia vuzkimi śpiecyjalistami na rezidentury. Ciaham piaci hadoŭ jany buduć vučycca, pracavać i zarablać. A ŭ vyniku stanuć kvalifikavanymi admysłoŭcami. Ale minus u adpracoŭcy», — adznačaje Siarhiej.
Ciapier ardynatura dazvalaje pahłyblena vyvučać śpiecyjalizacyju, pa jakoj lekar užo pracuje ci choča mieć inšy profil pracy. Vučycca treba dva-try hady. Pa jaje skančeńni doktar maje pieravahu ŭ pryznačeńni na kiroŭnuju pasadu, naprykład, zahadčyka adździaleńnia.
Ciapier śpiecyjalistam vuzkaha profilu možna stać i prajšoŭšy pieršasnuju prafiesijnuju pierapadrychtoŭku, jakaja doŭžycca ŭsiaho 4 miesiacy.
Pa słovach Siarhieja, u Polščy, dzie jon ciapier pracuje, sumniavajucca, što «piarvička» dazvalaje miedyku stać kvalifikavanym śpiecyjalistam za taki karotki termin.
Jon miarkuje, što z nabyćciom siły źmienienaha zakonu «piarvičku» skasujuć ci pierahledziać navučańnie na joj. Pakul ža jana isnuje, miedyki buduć vybirać jaje i paźbiahać ardynatury, kab nie trapić u zaležnaść ad dziaržavy.
Tamu, miarkuje jon, ułady mohuć jaje prybrać i ŭvieści tolki kliničnuju ardynaturu, jakaja jašče bolš stanie padobnaj na zachodniuju rezidenturu.
«Ardynaturu zrobiać biaspłatnaj ź piacihadovaj adpracoŭkaj. Miedykaŭ hetak zajakarać u Biełarusi i źmienšać adtok kadraŭ. Namier taki: chočaš vuzkuju śpiecyjalnaść, karjeru, zarobak, dyk idzi ŭ ardynaturu dy ciarpi adpracoŭku», — tłumačyć miedyk.
Jon dapuskaje, što pry pastupleńni ŭ ardynaturu buduć zvažać nie tolki na acenki ŭ dypłomie, najaŭnaść navukovych rabot, prafiesijnyja dasiahnieńni, ale i na ŭznaharody. Jany adyhrajuć vyrašalnuju rolu, kali ŭ achvotnika pastupić u ardynaturu nie budzie dastatkova prachadnych bałaŭ. Taksama dziaržaŭnyja ŭznaharodu mohuć uličvać u vypadku pastupleńnia na bolš prestyžnyja śpiecyjalizacyi, razvažaje doktar.
«U Polščy pry pastupleńni na rezidenturu treba dakazać svaju hatoŭnaść vučycca viedami. Uličvajucca navukovyja raboty. Nie łajalnaściu ŭładzie», — davodzić Siarhiej.
Na jaho pohlad, achvotnych pajści ŭ ardynaturu na umovach źmienienaha zakonu budzie niašmat. Miedyki, «bačačy treš u krainie, buduć imknucca zjechać z krainy, ci abyści normy zakabaleńnia na miescach: znachodzić sposaby paźbiehnuć adpracoŭki i atrymać vuzkuju śpiecyjalnaść u inšaj krainie».
Były kiraŭnik rajonnaj palikliniki ličyć, što pahodziacca z normami źmienienaha zakonu miedyki, jakija nie źbirajucca źjazdžać ź Biełarusi i buduć na radzimie rabić karjeru. Ich nie napałochaje termin adpracoŭki.
Zhodna z normami źmienienaha zakona, daktary, jakija prajšli padrychtoŭku ŭ ardynatury ŭ vočnaj i zavočnaj formie za košt biudžetu, buduć raźmierkavanyja ŭ dziaržaŭnyja balnicy i palikliniki z adpracoŭkaj abaviazkovaha terminu nie mienš za piać hadoŭ. Razam z dvuma hadami adpracoŭki paśla VNU nabiahajuć usie 7 hadoŭ. U vypadku admovy adpracoŭvać raźmierkavańnie ŭ miedyka zapatrabujuć pakryć košt vučoby ŭ 2,5-kratnym pamiery.
«7 hadoŭ možna skarystać u inšaj krainie i pracavać u zusim inšych, ludskich umovach. Staŭšy vuzkim śpiecyjalistam potym možna pajechać u lubuju krainu Jeŭropy i pracavać, i heta buduć zusim inšyja zarobki», — davodzić Siarhiej.
Jon ličyć, što miedyki, jakija zjechali, raskazvajuć kaleham, jak im pracujecca i ichnyja apoviedy nie na karyść taho, što majuć suajčyńniki ŭ Biełarusi.
Ministr achovy zdaroŭja Dźmitryj Pinievič zajaŭlaje, što «uvachod na niekatoryja śpiecyjalnaści budzie tolki praz ardynaturu».
«Dumaju, spraviadliva, kali ty atrymlivaješ vysokatechnałahičnuju śpiecyjalnaść za košt biudžetu i tabie dziaržava daje mahčymaść stać vysokaha kłasa śpiecyjalistam, jakim stanoviacca na Zachadzie za značna bolš doŭhi čas, adpracavać hety termin u toj ustanovie achovy zdaroŭja, kudy ciabie pašle Radzima, pa śpiecyjalnaści, jakuju abraŭ», — ličyć čynoŭnik.
Novyja pałažeńni zakonu raspaŭsiudžvacca tolki na tych, chto pačnie padrychtoŭku ŭ ardynatury paśla 1 lutaha 2024 hoda. Zakon nabudzie siłu praz try miesiacy. Miedyki salidarnyja ŭ tym, što novuju redakcyju zakona «Ab achovie zdaroŭja» pryniali, kab spynić adtok kadraŭ ź miedycyny.
Zhodna z nacyjanalnym bankam vakansij, u krainie šukajuć 6614 daktaroŭ-śpiecyjalistaŭ, 3975 miedsiaścior, 3054 sanitaraŭ.
«Naša Niva» — krynica jakasnaj infarmacyi i bastyjon biełaruščyny
PADTRYMAĆ «NN»Hladzicie taksama:
Jak pracuje i kolki zarablaje biełaruskaja doktarka ŭ Čechii
