Na sajcie Fiederacyi prafsajuzaŭ źjaviŭsia kamientar staršyni FPB z nahody adličeńnia z univiersiteta studentki II kursa, pres-sakratara mižnarodnaj moładzievaj arhanizacyi «Małady front» Taćciany Šapućka. Lider prafsajuzaŭ paličyŭ heta «kłasičnym žyćciovym vypadkam».
«Za čas, što minuŭ paśla zaviaršeńnia Foruma ŭ Bruseli, ja nasłuchaŭsia šmat čaho, u tym liku i pramych čutak i kazak pra manifiestacyi i vyłučeńni, – cytuje słovy Leanida Kozika sajt FPB. – Zrešty, dla publiki, jakaja raspaŭsiudžvaje takoha rodu infarmacyju heta zvyčajnaja sprava – heta ich zarobak».
Adznačym, što kamientar Leanida Kozika źjaviŭsia na sajcie tolki paśla šmatlikich patrabavańniaŭ žurnalistaŭ rastłumačyć situacyju. Jak viadoma, kiraŭnik FPB jašče ŭ Bruseli paabiacaŭ u vypadku adličeńnia Taćciany Šapućka z VNU piersanalna arhanizavać manifiestacyju ŭ centry Mienska. 3 śniežnia administracyja jurydyčnaha fakulteta Biełaruskaha dziaržaŭnaha univiersiteta paviedamiła aktyvistcy, što jana adličanaja, adnak nijakich dziejańniaŭ pa jaje abaronie FPB nie raspačała.
Bolš za toje ŭ Fiederacyi naadrez admaŭlalisia kamientavać hetuju situacyju: pres-sakratar Volha Zujonak kidała słuchaŭku, a telefon lidera FPB nie adkazvaŭ.
Vyklučanaja z VNU Taćciana Šapućka ŭžo napramuju źbirałasia źviarnucca da Leanida Kozika pa abiacanuju dapamohu, jak na sajcie prafsajuzaŭ źjaviŭsia jaho adkaz.
Praŭda, z kantekstu jasna vynikaje: raźličvać na padtrymku staršyni ŭžo dakładna nie varta.
«Što tyčycca Taćciany Šapućka, to heta kłasičny žyćciovy vypadak, – adznačaje Leanid Kozik. – Kali jana adličanaja z univiersiteta za toje, što brała ŭdzieł u pracy Foruma, to heta nie adpaviadaje zakanadaŭstvu Respubliki Biełaruś.
Kali ž jana adličana za toje, što jana biez dazvołu administracyi prahulała zaniatki i nie naviedvała VNU, to administracyja maje prava ŭžyć dziejučyja ŭ VNU praviły.
Kali b jakoj-niebudź supracoŭnik ŭstanovy ES nie prychodziŭ na słužbu, to, upeŭnieny, jon byŭ by zvolnieny adrazu ž. Forum całkam prajšoŭ by z takimi ž vynikami pa-za zaležnaści ad taho, była b tam Taćciana Šapućka ci nie».
Sapraŭdy «kłasičny žyćciovy vypadak»: u Bruseli čynoŭniki FPB kažuć adno, a tut, u Biełarusi, užo zusim inšaje.
