Biełaruska-polskaja miaža ŭ rajonie pamiežnaha pierachoda «Kuźnica» — «Bruzhi». Fota: AP Photo / Michal Dyjuk, File
Ranicaj 12 žniŭnia łukašenkaŭski ekśpiert Alaksiej Dzierman ahałomšyŭ čytačoŭ svajho telehram-kanała: nibyta isnujuć płany palakaŭ pa zachopie zachodniaj častki Biełarusi. Pytańnie, na dumku Dziermana, u tym, jak aficyjnaja Biełaruś musić na heta adkazać.
Prapahandyst bačyć dva varyjanty. Pieršy — kanviencyjny: abaraniać «kožny horad na našaj terytoryi, jaki niepaźbiežna pieratvorycca ŭ ruiny sa šmatlikimi achviarami siarod mirnych žycharoŭ».
Najbolš efiektyŭnym Dziermanu zdajecca varyjant nie z abaronaj, a z «previentyŭnym» napadam: «Abo my pavinny praduhledzieć mahčymaść previentyŭnaha ŭdaru, u tym liku taktyčnaj jadziernaj zbrojaj pa terytoryi Polščy, nie čakajučy, pakul bot polskaha pana pierastupić našu miažu?»
Praŭładny analityk taksama vykazvaje nadzieju, što ŭ biełaruskaj daktrynie ab taktyčnaj jadziernaj zbroi budzie prapisanaja mahčymaść prymianić previentyŭny ŭdar.
Karystalniki tvitara, kudy trapiŭ post Dziermana, nie padtrymali jaho vajaŭničaha nastroju. U kamientarach da publikacyi adna tolki krytyka.
«Što zdarycca ź vialikim palitołaham i lidaram mierkavańniaŭ, kali jon daviedajecca, što palaki i biełarusy płanujuć zachapić i ŭschodniuju častku Biełarusi, kab adbyłosia doŭhačakanaje histaryčnaje ŭźjadnańnie biełaruskaha naroda?»
«To-bok jon prapanuje krainie z nasielnictvam 9 młn+ pieršaj udaryć TIAZ pa krainie-členie NATA?»
«U himnie jašče jość radok «My, biełarusy, mirnyja ludzi»?»
«Dyk voś chto Miadźviedzievu teksty piša».
«A heta nie artykuł KK RB ab raspalvańni i bła-bła-bła ci heta inšaje?»
Dzierman — nie adziny z prapahandystaŭ, chto pužaje niebiaśpiekaj z Polščy. Pra jaje piša i Alaksandr Špakoŭski. Jon sprabuje razvažać pra kancentracyju polskaj armii la biełaruskaj miažy, i ciapierašnija padziei padajucca Špakoŭskamu padobnymi da časoŭ Druhoj suśvietnaj: «Apošni raz padobnyja pracesy naziralisia ŭ červieni 1941 hoda. Tady niedaacenka kiraŭnictvam krainy faktaru zasiarodžvańnia vojskaŭ praciŭnika pablizu miežaŭ SSSR pryviała da katastrafičnych nastupstvaŭ dla Čyrvonaj Armii na pačatkovym etapie Vialikaj Ajčynnaj vajny».
Špakoŭski taksama adkazaŭ na tezis Dziermana pra previentyŭny ŭdar pa Polščy. Jon kaža, što kali stanie viadoma pra padrychtoŭku ahresii suprać Biełarusi, naniasieńnie previentyŭnaha ŭdaru «nie tolki nie supiarečyć Kanstytucyi, ale i praduhledžana vajennym płanavańniem».
Dalej Špakoŭski vykazvaje mierkavańnie, što taktyčnaja jadziernaja zbroja nie adroźnivajecca ad luboj inšaj, a Biełaruś «treba abaraniać lubymi najaŭnymi siłami i srodkami», u tym liku i «nanieści previentyŭny ŭdar pa Varšavie, Krakavu, lubym inšym nasielenym punkcie dziaržavy-ahresara».
Telehram-kanał «Vajenna-palityčny ahlad», jaki aśviatlaje ŭ prarasijskim farmacie padziei ŭ Jeŭropie i śviecie, vydaŭ post pad zahałoŭkam «U palakaŭ usio hatova da praviadzieńnia stratehičnaj nastupalnaj apieracyi». Takuju vysnovu aŭtary resursu zrabili na padstavie zajavy polskaha ministra abarony Marjuša Błaščaka pra płany pierakinuć da biełaruskaj miažy 10 tysiač sałdat dla achovy (nahodaj dla hetaha stali ataki mihrantaŭ na miažy i pryjezd vahnieraŭcaŭ u Biełaruś).
Prapahandysty navat malujuć kartu mierkavanaha ruchu polskaj armii pa Biełarusi i pradkazvajuć: «Z terytoryi Ukrainy nastupleńnie polskich sił mohuć padtrymać bandfarmiravańni ź liku najmitaŭ i bajevikoŭ biehłaj apazicyi. Kančatkovaj metaj polskich vojskaŭ moža stać vychad na miažu Lida — Baranavičy — Pinsk».
Karta ad prapahandystaŭ z prydumanym imi płanam napadu Polščy na Biełaruś
Anałahičny post raźmiaściŭ i telehram-kanał «Nievalfovič», jaki prezientuje siabie jak resurs pra siłavyja struktury Biełarusi. Hety tekst pierapościŭ sabie ŭ kanał Ryhor Azaronak.
Akramia apoviedu pra toje, što «polskaja hrupoŭka moža atakavać z troch kirunkaŭ», prapahandysty pracytavali polskaha hieapalityka Juljuša Mirašeŭskaha. Hety dziejač viadomy tym, što raspracavaŭ «ideju ULB» — tezis ab prymireńni i sajuzie Polščy ź niezaležnymi Ukrainaj, Litvoj i Biełaruśsiu. Adnak «Nievalfovič» z dapamohaj vyrvanaj z kantekstu cytaty robić ź Mirašeŭskaha adepta polskaha impieryjalizmu.
Pra niebiaśpieku, jakaja byccam idzie z Polščy, rehularna pišuć i «Žoŭtyja źlivy». U kanale abmiarkoŭvajuć, naprykład, ideju polskich palitykaŭ raspačać nazirańnie za ŭschodniaj miažoj na vajskovych aerastatach i pavieličeńnie polskaha kantynhientu na miažy da 10-ci tysiač, a samu krainu nazyvajuć «hijenaj Jeŭropy».
Praŭładnyja śpikiery jašče i napisali zvarot da polskaha naroda — mahčyma, jon musić pamienšyć niebiaśpieku. Tekst zvarotu na pasiadžeńni štaba patryjatyčnych sił Biełarusi začytaŭ Vadzim Hihin. Voś niekalki jarkich cytat.
«My dobra pamiatajem, što na biełaruskaj ziamli naradzilisia mnohija vialikija dziejačy polskaj kultury. Ale heta zusim nie daje padstaŭ hladzieć na našy ziemli jak na słavutyja «kresy ŭschodnija». Biełarusy — vialiki, hanarlivy i samastojny słavianski narod».
«Spadziajomsia, što ŭ vas, braty-palaki, chopić mudraści ŭtrymacca ad spaŭzańnia va ŭzbrojenaje supraćstajańnie. Chaciełasia b vieryć, što vy nie daście adurmanić siabie ahresiŭnaj prapahandzie».
«U vypadku ž luboha zamachu na našu śviatuju Radzimu viedajcie, što my poŭnyja rašučaści abaraniać svoj dom, svaje siemji. Historyja viedaje niamała prykładaŭ taho, jak biełarusy davali adpor našeściu z zachadu. Nie śpiašajciesia pieražyć heta na svaim dośviedzie».
«Naša Niva» — krynica jakasnaj infarmacyi i bastyjon biełaruščyny
PADTRYMAĆ «NN»Čytajcie taksama:
MZS Polščy raskazała, što pavinna zdarycca dla palapšeńnia adnosin Varšavy i Minska
Polskuju miažu z boku Biełarusi parušajuć mihranty z rasijskimi vizami
