Polski dobraachvotnicki korpus. Krynica: PolskiKorpusOchotniczy / Telegram
«Polski dobraachvotnicki korpus braŭ udzieł u vykanańni bajavoj zadačy razam z Ruskim dobraachvotnickim korpusam. Nas źviazvajuć nie tolki poviazi braterstva pa zbroi, ale i asabistaje siabroŭstva i tavarystva», — skazana ŭ paviedamleńni polskich vajskoŭcaŭ.
U dokaz vajary apublikavali šerah videa z apieracyi, pa ichnich słovach, z terytoryi Biełharodskaj vobłaści ŭ pryharadzie Šabiekina, paviedamlaje «Biełsat».
Paviedamlajecca, što ŭ boj ustupiła pieršaja šturmavaja hrupa korpusa. Usie viarnulisia cełymi, nichto nie paciarpieŭ, pastaŭlenaja zadača paśpiachova vykanana. Taksama źviartajecca ŭvaha, što jany pieršymi razam z adnoj z bajavych hrup RDK dasiahnuli miesca pryznačeńnia.
«Dla našaha filijała było honaram udzielničać u apieracyi takoha kštałtu chacia b z-za histaryčnaj značnaści apieracyi takoha kštałtu. Pryvitańnie našym siabram z Ruskaha korpusa za vydatnuju padrychtoŭku da apieracyi, za dapamohu, jakuju my atrymali ŭ padrychtoŭcy našaj hrupy, prafiesijanalizm va ŭčynkach i mužnaść na poli boju», — dapoŭnili ŭ PDK.
Infarmacyja ab udziele polskich vajskoŭcaŭ u apieracyi była śpiecyjalna apublikavana ź vialikaj zatrymkaj ź mierkavańniaŭ biaśpieki, paviedamlajuć bajcy.
Paźniej Ruski dobraachvotnicki korpus raspaŭsiudziŭ aficyjnuju zajavu nakont Polskaha dobraachvotnickaha korpusa. Jany śćviardžajuć, što Polski korpus miažu Ukrainy i Rasii nie pierasiakaŭ.
«Našy paplečniki z Polščy sapraŭdy nie pieršy miesiac vajujuć z nami poruč za svabodu i niezaležnaść Ukrainy. My ŭžo paśpieli pravieści sumiesna šerah apieracyj na arechaŭskim, zaparožskim i bachmuckim napramkach. Chłopcy vydatna prajavili siabie i pakazali vysoki ŭzrovień matyvacyi i padrychtoŭki.
Što tyčycca bajavych dziejańniaŭ na terytoryi Rasijskaj Fiederacyi, bajcy PDK zabiaśpiečvajuć kanvoj pałonnych, vajskovuju i miedycynskuju łahistyku, ale tolki ŭ miežach dziaržaŭnaj hranicy Ukrainy.
Niahledziačy na takija abmiežavańni, my ŭsio adno ščyra dziakujem im za nieacenny ŭkład u ahulnuju spravu, zaŭsiody ŭklučajem ich u płanavańnie i dzielimsia ź imi našymi trafiejami», — zajavili ŭ RDK.
Paviedamleńnie ab tym, što va Ukrainie pačaŭ vykonvać bajavyja zadańni Polski dobraachvotnicki korpus, źjaviłasia 10 maja 2023 hoda. Tady śćviardžałasia, što pieršaje zadańnie PDK vykanaŭ kala Arechava na zaparožskim kirunku. Strat pry hetym korpus nie panios. Zadańnie jon vykonvaŭ razam z Ruskim dobraachvotnickim korpusam i padraździaleńniami USU. Častka bajcoŭ Polskaha dobraachvotnickaha korpusa taksama biare ŭdzieł u bajach kala Bachmuta.
