«Takim čynam, što ž da hetaha času ŭtrymlivaje mianie «na płyvu»? Kachańnie? Pačućcio humaru? Niaŭtolnaja praha žyćcia? Mabyć, usie hetyja faktary razam.
Iścina ŭ tym, što, jak mnie padajecca, ja naležu da typu ludziej, zdolnych pieražyć amal usio. Nie biez vydatkaŭ — i ja sama ŭśviedamlaju i pryznaju, jakoha kštałtu dapamoha mnie patrebnaja.
Ale jašče viedaju, što ŭsio roŭna spraŭlusia. Hetkaja babula ŭ kalje ad Cifani, jakaja zatulaje marščynistyja zapiaści elehantnaj sukienkaj, kab padściortyja ličby nie kidalisia ŭ vočy haściam, pakul unuki nalivajuć vino ŭ kielich na čarhovy Piesach. «Dzie jano ŭsio? Usio adyšło. A ja — voś jana!» I ŭśmichajecca ŭśmieškaj Džakondy», — napisała Kaciaryna.
Pavodle padlikaŭ Ihara, 15 maja minuła 2,5 hoda ad momantu zatrymańnia Kaciaryny Andrejevaj. Jaje razam ź videaapieratarkaj Darjaj Čulcovaj schapili 15 listapada 2020-ha ŭ Minsku padčas aśviatleńnia mirnaj vuličnaj akcyi ŭ pamiać pra zabitaha aktyvista Ramana Bandarenku.
Spačatku abiedźviuch žurnalistak pakarali administracyjnym aryštam, ale nieŭzabavie spravu pierakvalifikavali ŭ kryminalnuju pavodle art. 342 KK (arhanizacyja i padrychtoŭka dziejańniaŭ, što hruba parušajuć hramadski paradak, albo aktyŭny ŭdzieł u ich).
18 lutaha 2021 hoda sudździa Frunzienskaha rajona Minska Natalla Buhuk padtrymała patrabavańnie prakurorki Aliny Kaśjančyk i pakarała dziaŭčyn 2 hadami pazbaŭleńnia voli z nakiravańniem u papraŭčuju kałoniju ahulnaha režymu.
Darja Čulcova całkam adbyła prysudžany termin źniavoleńnia i letaś 3 vieraśnia vyjšła na volu. Ciapier jana ŭ biaśpiecy za miažoj.
Kaciarynie ž vystavili novaje abvinavačańnie — «zdrada dziaržavie» (č. 1 art. 356 KK). Na pačatku lipienia spravu ŭ zakrytym režymie pačaŭ razhladać sudździa Homielskaha abłasnoha suda Aleh Charoška, jaki ŭ vyniku prysudziŭ Kaciarynie Andrejevaj 8 hadoŭ i 3 miesiacy kałonii va ŭmovach ahulnaha režymu.
