Śviatłana Cichanoŭskaja. Fota: pres-słužba Ofisa Śviatłany Cichanoŭskaj
Śpiecyjalnaja karespandentka ŭpłyvovaha francuzskaha vydańnia raskazvaje čytačam pra svoj vizit u Ofis Śviatłany Cichanoŭskaj i pytańni, nad vyrašeńniem jakich pracuje biełaruskaja apazicyja. Sama francuzskaja žurnalistka Faścina Vensan (Faustine Vincent) ŭ svaim tvitary prezientuje artykuł nastupnym čynam: «Le Monde atrymała ŭnikalnuju mahčymaść trapić u serca biełaruskaha supracivu — u Vilni, dzie Śviatłana Cichanoŭskaja žyvie ŭ emihracyi pad strohaj achovaj, u miescy, jakoje trymajecca ŭ sakrecie».
Žurnalistka raskazvaje čytaču pra miery biaśpieki, jakich vymušana prytrymlivacca lidar biełaruskaj apazicyi ŭ krainie, ułady jakoj pryznali jaje zakonnaj pradstaŭnicaj Biełarusi i pradstavili status «dziaržaŭnaha hościa».
Aŭtarka adznačaje, što raniej lidarka biełaruskaj apazicyi była ŭ centry ŭvahi, ale ŭsio źmianiłasia z pačatkam vajennaj ahresii Rasii suprać Ukrainy. Niahledziačy na toje, što Śviatłana Cichanoŭskaja ź pieršaha dnia ŭvarvańnia zaklikała da salidarnaści suhramadzianaŭ z ukraincami i źmianiła svoj dyskurs u dačynieńni da Rasii, nazvaŭšy jaje ahresaram, jaje pierastali čuć.
U novych umovach, adznačajecca ŭ artykule, apazicyi daviałosia pierahledzieć svaju stratehiju. Na pieršym miescy — abarona niezaležnaści i suvierenitetu krainy. Aŭtar adznačaje, što apazicyja sprabuje źviazać svaju baraćbu z baraćboj z Ukrainaj, tłumačačy, što ŭ jaje «taja ž meta i toj ža vorah».
A sama Śviatłana Cichanoŭskaja imkniecca «rabić usio, kab vyzvalić palitviaźniaŭ» i tłumačyć zachodnim partnioram jak «važna vypracavać stratehiju pa Biełarusi ŭ kantekście vajny va Ukrainie, tamu što Łukašenka pa častkach pradaje našu niezaležnaść Rasiei».
Adnak, jak adznačaje aŭtar, ciažkaści ŭ atrymańni kankretnych vynikaŭ dla vychadu krainy z tupika padahravajuć rasčaravańnie biełarusaŭ.
Druhi važny momant — niežadańnie Kijeva naładžvać aficyjnyja znosiny ź Śviatłanaj Cichanoŭskaj. Tut žurnalist zhadvaje słovy daradcy prezidenta Ukrainy Michaiła Padalaka ŭ intervju Delfi ab «biessensoŭnaści» kantaktaŭ, bo «niezaŭvažnaja vidavočnaja antyvajennaja dziejnaść» z boku biełaruskaj apazicyi i jaho vykazvańnie ab tym, što «biełarusy horšyja za rasiejcaŭ. Maskva na nas napadaje, a vy ničoha nie robicie!». Ukraincy bačać tolki połk biełaruskich dobraachvotnikaŭ imia Kastusia Kalinoŭskaha, zaŭvažaje žurnalistka.
«Mond» piša, što biełaruskaja apazicyja ŭ vyhnańni z razumieńniem adnosicca da takoj pazicyi aficyjnaha Kijeva, bo razumieje jaho aściarožnaść i pryvodzić słovy daradcy Cichanoŭskaj Franka Viačorki ab tym, što Kijeŭ nie choča pravakavać Łukašenki, kab nie dać tamu padstavu ŭvieści vojski va Ukrainu.
Francuzskaja žurnalistka adznačaje, što i jeŭrapiejskija ŭłady praciahvajuć škadavać biełaruskaha lidara. Jana pryvodzić słovy jeŭrapiejskaha dypłamata, jaki va ŭmovach ananimnaści zajaviŭ, što «ŭsio jašče jość nadzieja, što Łukašenka nie pojdzie za Pucinym». Ale zhoda Łukašenki na raźmiaščeńnie taktyčnaj jadziernaj zbroi śviedčyć ad tym, što jon bolš i bolš pieratvarajecca ŭ maryjanietku Pucina, adznačaje žurnalist i cytuje słovy vysokapastaŭlenaha supracoŭnika ambasady ZŠA ŭ Minsku: «My vyrazna bačym, što Łukašenka bolš nie zjaŭlajecca faktaram stabilnaści, i što pieravažnaja bolšaść biełarusaŭ suprać niepasrednaha ŭdziełu ŭ hetaj vajnie».
Žurnalistka adznačaje, što Vašynhton praciahvaje padtrymlivać biełaruskija demakratyčnyja siły i robić staŭku na doŭhaterminovuju stratehiju.
«Mond» raskazvaje, što ŭ Biełarusi bolš za 1440 palitviaźniaŭ (pa apošnich dadzienych ich 1500), što ŭ krainie praciahvajucca biaźlitasnyja represii, što prosty «łajk» u sacyjalnych sietkach dvuchhadovaj daŭniny moža luboha pryvieści za kraty. Situacyja ŭ Biełarusi nahadvaje pieryjad stalinskich represij, piša «Mond».
Čytajcie jašče:
«Miescaŭ u samalocie na ŭsich nie chopić». Cichanoŭskaja źviarnułasia da paplečnikaŭ Łukašenki
Žachlivy los «prypynienaj revalucyi» ŭ Biełarusi — novaja kniha francuzskaha sacyjołaha Ranana Ervue
youtube.com/watch?v=aU-dKoFZT0A