Siarhiej Hardzijevič raniej pracavaŭ u internet-vydańni «Pieršy rehijon», a letam 2021 hoda byŭ asudžany na paŭtara hoda pazbaŭleńnia voli. Jaho pryznali vinavatym pavodle troch kryminalnych artykułaŭ: u abrazie pradstaŭnikoŭ ułady ŭ suviazi z vykanańniem imi słužbovych abaviazkaŭ (art. 369 KK), paklopie (art. 188 KK) i publičnaj abrazie «prezidenta Respubliki Biełaruś» (č. 1 art. 368 KK).
Sam Siarhiej Hardzijevič u sudzie vinu nie pryznaŭ i adbyvaŭ pakarańnie ŭ papraŭčaj kałonii №17 u Škłovie. Letaś u kastryčniku były žurnalist vyjšaŭ na volu, a ŭ listapadzie 2022 hoda jon trapiŭ u «śpis ekstremistaŭ» Ministerstva ŭnutranych spraŭ.
Sioleta Siarhiej Hardzijevič atrymaŭ vizu i ŭ sakaviku vyrašyŭ źjeździć u Litvu, adnak pajezdka atrymałasia niaŭdałaj.
«Ja adčuŭ niešta niadobraje, kali pamiežnica vielmi doŭha razhladała moj pašpart. U vyniku jana patelefanavała, i pryjšoŭ jaje načalnik», — raspavioŭ Siarhiej Hardzijevič vydańniu «Hancavicki čas».
Pamiežniki paviedamili Hardzijeviču, što jamu zabaronieny vyjezd za miažu i pastavili ŭ pašpart adpaviedny štamp. Padčas hetaha raźbiralnictva aŭtamabil paprasili adahnać na śpiecyjalnuju stajanku, dzie zabłakavali admysłovymi aharodžami. Paźniej aŭto razbłakavali, i Siarhiej musiŭ pakinuć punkt pamiežnaha propusku ŭ zvarotnym napramku.
«Ja sprabavaŭ dabicca, kab viarnuli hrošy, što byli vypłačanyja jak zbory za pierasiačeńnie miažy, ale pamiežniki raźviali rukami: maŭlaŭ, hrošy ŭ vas nie brali, jedźcie ŭ bank», — kaža Siarhiej Hardzijevič.
Były žurnalist raspavioŭ, što nie maje nijakich niavypłačanych štrafaŭ. Paśla adbyćcia pakarańnia ŭ kałonii novych zapazyčanaściaŭ taksama nie było. Tamu ciapier Siarhiej Hardzijevič nakiravaŭ skarhi ŭ prakuraturu i Śledčy kamitet, kab daviedacca pryčyny zabarony na vyjezd za miažu.
