«Dahledžany i abnoŭleny haradski park płoščaj 18 ha — honar Žabinki. Ale čarody čornych ptušak, jakija taksama ablubavali hetaje ŭtulnaje miesca, prynosiać masu niazručnaściaŭ haściam parku i mnostva prablem kamunalnikam», — paviedamlaje vydańnie, padkreślivajučy, što nivodzin z vyprabavanych raniej rabotnikami ŽKH sposabaŭ nie daŭ vyniku.
Što tolki tyja kamunalniki ni rabili: jany i abrazali haliny dreŭ nad łaŭkami i inšymi abjektami ŭ parku, i pieryjadyčna zdymali hniozdy z dapamohaj aŭtavyški. Zaŭvažyŭšy, što varony čamuści nie lubiać hniezdavacca na miascovych lipach, zamiest starych i śsiečanych dreŭ jany zaraz imknucca vysadžvać mienavita lipu.
U minułym hodzie ŭ parku była vystaŭlena para hukavych adpužvalnikaŭ, jakija imitavali krumkańnie krumkača, kryk sokała i jastraba. Ale dziejničała heta tolki časova. «Viadoma, spačatku varańnio ŭ spałochu śpiešna pakidała nasiedžanyja miescy. Ale razumnyja ptuški chutka dapietryli, što za pahroźlivymi krykami nijakaj realnaj niebiaśpieki niama, a tamu bolš nie źviartali na adpužvalniki nijakaj uvahi. Chutčej niedaśviedčanyja naviedvalniki parku prykmietna naściarožvalisia i niervavalisia. I voś pryjšoŭ čas ciažkaj artyleryi», — piša hazieta.
Pieranasnaja prapanavaja hrom-harmata vydaje mahutny huk, jaki nahadvaje streł z harmaty ci raskat hromu — adsiul i nazva. Hučnaść huku dasiahaje 119 decybieł.
Usio dziakujučy tamu, što prapan zapampoŭvajecca ŭ kanał stvała i padpalvajecca z dapamohaj iskry.
Załp chałasty i nijakaj fizičnaj škody ptuškam nie nanosić, ale vielmi mocna pałochaje na płoščy da 1,5 ha, pry hetym dalnabojnaść hukavych chvalaŭ dasiahaje 1 km. Kali harmatu źmiaścić na śpiecyjalnuju stojku, to za košt kruhavoha abstrełu płošča abarony vyraście da 7 ha. «Tamu, dziakujučy mabilnaści pryłady, pad abaronaj harmaty zmoža akazacca ŭvieś park», — adznačaje vydańnie.
Žabinkaŭskaja ŽKH zahadzia papiaredžvaje žycharoŭ rajcentra, kab nie pałochalisia hučnych vopleskaŭ u haradskim parku i skviery kala vakzała. Pačać prymianiać «ciažkuju artyleryju» płanujuć užo ŭ sakaviku.
