Michaił i Ksienija adrazu paśla pakupki chaty na Błakitnych aziorach
Pra Błakitnyja aziory dy čornavałosuju dziaŭčynku
— Michaił, jak tak atrymałasia, što ŭ čałavieka, jaki mieŭ lecišča, źjavilisia jašče i dźvie chaty za horadam?
— Naša lecišča z retraramontam, jaki my z žonkaj Ksienijaj rabili sami, mieścicca ŭ sadovym tavarystvie za 10 kiłamietraŭ ad Minska. Ale duša prahnuła sapraŭdnaha viaskovaha doma padalej ad stalicy, dzie-niebudź u malaŭničym miescy. Ja nie raz ujaŭlaŭ, jak prymaŭ by tam turystaŭ, vaziŭ ich pa vakolicach, pakazvaŭ miascovyja admietnaści.
My trymali hetuju dumku ŭ hałavie. Ksienija čas ad času skidała niejkija abjavy. A minułym letam dasłała fota žoŭcieńkaj chatki ŭ vioscy Staraja Miadzielskaha rajona. Ja zacikaviŭsia, bo tam pobač maje lubimyja Błakitnyja aziory. I košt byŭ nievysoki, tysiača dołaraŭ u ekvivalencie. My tut ža sieli ŭ mašynu i pajechali na ahledziny.
Pryjechali ŭ viosku amal nočču, śviatła ŭ chacie niama, tamu hladzieli ź lichtarykam. Na ścianie Ksienija ŭbačyła karcinu: na joj — čornavałosaja dziaŭčynka, vielmi padobnaja da jaje dački… Vyrašyli, što heta znak, i ŭ vyniku nabyli tuju chatu.
Pieršy čas paśla pakupki žonka praciahvała pa zvyčcy dasyłać mnie fota viaskovych damoŭ. Siarod ich była chata na chutary ŭ Hłybockim rajonie. Jana znachodzicca za 90 kiłamietraŭ ad Błakitnych azioraŭ. Za jaje prasili navat mienš za tysiaču dołaraŭ. Ja padumaŭ: za takija hrošy lepš hety dom uziać, čym jon zhnije. Usio atrymałasia spantanna. Voś ciapier paralelna adnaŭlajem dźvie chaty.
Pierš čym prystupić da ramontu, Michaił i Ksienija pačali šukać tematyčnyja supołki ŭ internecie, dzie možna było b atrymać praktyčnyja parady pa adnaŭleńni viaskovaj chaty. U vyniku, nie znajšoŭšy taho, čaho šukali, stvaryli svaju staronku ŭ Instagram VioSka Life. Jana karystajecca papularnaściu: prajšło tolki paŭhoda, a tam užo bolš jak dziesiać tysiač padpisčykaŭ — tych, chto lubić viosku i maje ci jašče tolki maryć pra svajo miesca siły ŭdalečyni ad horada.
Pra stahadovy zrub dy šaloŭku
— Što možacie paraić ludziam, jakija jašče tolki šukajuć svajo miesca siły? Na što treba źviarnuć uvahu pry pakupcy viaskovaj chaty?
— Ja raiŭ by prajechacca pa vioskach, dzie chacieli b žyć, pahavaryć ź miascovymi žycharami, bo vielmi časta abjavy ab prodažy damoŭ nie vystaŭlajucca ŭ internecie. Taksama možna dać abjavu ŭ miascovuju hazietu — dumaju, prapanoŭ budzie šmat.
Znachodki ŭ domie na chutary
Pry pakupcy staroha viaskovaha doma moža być dosyć niuansaŭ. Kab nie nabyć kata ŭ miašku, treba pastaracca maksimalnuju kolkaść pytańniaŭ abmierkavać da afarmleńnia ździełki.
Adnym z takich pytańniaŭ moža być adsutnaść elektryčnaści. Pravodzić jaje z nula i rabić novy prajekt — niatannaje zadavalnieńnie, pryjdziecca zapłacić niekalki tysiač rubloŭ. Niezaležna ad taho što kaža vam pradaviec, patelefanujcie sami ŭ rajonny ŭčastak enierhazbytu. Tam skažuć, ci znachodzicca dom u bazie, ci niama zapazyčanaści. Jość taksama słužba «Adno akno» rajonnych elektrasietak, dzie možna atrymać kansultacyju.
Kali pa vynikach zvankoŭ u vas niama pieraškod dla padklučeńnia doma da elektrazabieśpiačeńnia, acanicie stan staroj pravodki. Jak praviła, jaje treba całkam i biez škadavańnia zamianić, bo heta vaša biaśpieka. U pryvatnaści, choć naš dom byŭ adklučany ad linii elektrapieradačy z 1990-ch hadoŭ, u bazie mieŭsia. Tamu padklučeńnie śviatła abyšłosia nam usiaho ŭ 20 rubloŭ plus košt bienzinu, bo pryjšłosia niekalki razoŭ jeździć u Miadzieł.
Majcie na ŭvazie, što kali vy prapišaciesia ŭ viaskovaj chacie, to možacie raźličvać na lhotny taryf na aciapleńnie.
U asnoŭnym u vioscy pradajucca damy davajennaj ci paślavajennaj pabudovy. Prynamsi, našaj chacie na Błakitnych aziorach sioleta spoŭnicca sto hadoŭ. I choć raniej vykarystoŭvali jakasny zimovy les, usio adno za hety čas biarvieńni mahli padhnić u niekatorych miescach, dzieści ich padtačyŭ šašal.
Tamu pieršaje, što treba zrabić, — ahledzieć sam zrub. Prastukajcie jaho tupym pradmietam: kali huk mocny i dakładny — biarvieńni dobryja. Kali zrub zvonku abšyty šaloŭkaj, a znutry abklejeny špalerami — nie saromiejciesia: paprasicie haspadara adadrać u niekalkich miescach paru došak i kavałkaŭ špaleraŭ, kab pahladzieć, u jakim jon stanie. Kali ŭsio ž taki kupicie hetuju chatu, pry jaje ramoncie źniešniuju abšyŭku treba zdymać całkam, kab pierakanacca, što ŭsio ŭ paradku.
Piečka na chutary da rekanstrukcyi
Piečka na chutary paśla rekanstrukcyi
Źviarnicie ŭvahu na piečku, pasprabujcie jaje pratapić, u vioscy heta asabliva važna.
Paznajomciesia i parazmaŭlajcie z susiedziami. Jany mohuć vam raskazać pra stan doma, bo žyli pobač ź im. Vysłuchajcie niekalki mierkavańniaŭ, tamu što zaŭsiody znojducca tyja, chto vam nie vielmi rady ci choča pakazać svaju značnaść, raskazvajučy, što jany chacieli kupić i «parezać» hety dom na drovy.
— Moža, kab acanić stan doma, lepš uziać z saboj čałavieka, jaki raźbirajecca?
— Kali jość taki na prykmiecie, možna. Ale pytańnie: kolki hrošaj jon paprosić za svaju pasłuhu? Viedaju vypadak, kali śpiecyjalist jašče nie paśpieŭ zajści ŭ dom, a ŭžo vynies vierdykt: «Praściej źnieści hety dom i pabudavać novy».
U našym vypadku takoje navat nie razhladałasia. My ž nie ad skvapnaści skupili tyja chaty. Nam chočacca dać im druhoje žyćcio, zachavać kałaryt i duch taho času. My z Ksienijaj atrymlivajem asałodu ad restaŭracyi starych rečaŭ. Heta jak styl žyćcia, chobi.
Ja pierakanany: stajała chata sto hadoŭ i jašče stolki ž prastaić. Novaje pabudavać, moža, i praściej, ale heta ŭžo budzie zusim nie toje… Nam časam pišuć: «Dy kamu patrebny hetyja razvaluchi, vioska pamiraje…» Ale ž mienavita ad nas zaležyć, pamre jana ci nie…
— Kupili dom: a što rabić dalej? Jakija raboty treba vykanać u pieršuju čarhu? Z čaho pačać?
— Paśla pakupki supakojciesia i na ćviarozy rozum acanicie stan vašaha doma. Užo pryjdziecca pracavać z tym, što kupili.
Treba adrazu razumieć, što praces ramontu patrabuje niamała sił i hrošaj. Dakładnaj sumy nielha raźličyć zahadzia, bo ŭ pracesie mohuć vyjavicca siurpryzy. Ale z našaha dośviedu i dośviedu znajomych ukłaści ŭ adnaŭleńnie pryjdziecca ŭ try razy bolš, čym zapłacili za dom, — dzieści 3-5 tysiač dołaraŭ u ekvivalencie.
Z čaho pačać? Pačnicie sa špaleraŭ. Praces ačystki ścien vielmi supakojvaje.
Kali padmurak pakasiŭsia i prasieŭ, dom pryjdziecca «padymać». Toje ž samaje ź viankami: kali nižnija biarviony patrabujuć zamieny, to heta nieabchodna zrabić adrazu, a nie paśla taho, jak pastavicie, naprykład, novyja vokny.
My pry dapamozie «viaskovaha radyjo» znajšli ludziej, jakija pryjechali z damkratam i padniali naš dom za 500 rubloŭ. Nam pačali pisać, što ŭ ich za hetyja raboty budaŭniki prasili kala 8 tysiač rubloŭ.
Na maju dumku, u apłacie treba aryjentavacca na siaredniuju zarpłatu pa krainie. Nie zamykajciesia na adnym varyjancie, šukajcie inšyja i abaviazkova znojdziecie.
Dom na Błakitnych aziorach da pakupki. I paśla taho, jak źniali šaloŭku.
Pra zialonuju šafu dy cehłu z historyjaj
— A na čym možna aščadzić u pracesie adnaŭleńnia viaskovaj chaty?
— Pa-pieršaje, na rabotnikach. Pryjezd budaŭnikoŭ z horada — nie tannaje zadavalnieńnie. Tamu pierš-napierš prajdziciesia pa vioscy, spytajcie: ci jość u vakolicy ludzi z rukami, jakija mohuć dapamahčy z ramontam. Susiedzi mohuć padkazać kantakty piečnika i inšych śpiecyjalistaŭ. Heta samy prosty i chutki varyjant.
Akramia taho, možna raskleić abjavy ŭ sielsaviecie, rajcentry. Heta vielmi dobra pracuje ŭ hłybincy. Kupicie miascovuju rajonku. Tam jość abjavy, dy i vy zmožacie padać tudy svaju. Znajści adkaznaha i niedarahoha rabotnika składana, ale možna.
Nam pašancavała: my i ŭ adnoj, i ŭ druhoj vioscy takich znajšli. Jany pahadzilisia ŭziacca za ciažkija brudnyja raboty: piečku razabrać, padłohu padniać, źnieści stary chleŭ. Heta toje, z čaho treba pačynać.
Vykanańnie rabot abaviazkova treba kantralavać. I płacić tolki za realna i jakasna vykananuju pracu. Tyja raboty, jakija možacie, vykonvajcie sami. Tak sekanomicie. Dy i hladzieć na toje, što zrabili svaimi rukami, paviercie, kudy bolš pryjemna.
Pa-druhoje, možna aščadzić na materyjałach. Raźbirajučy staryja pabudovy, jakija vam nie patrebnyja, piečki, źniaćcie šaloŭki, padłohavych došak, dźviarej, voknaŭ starajciesia rabić akuratna. Raniej materyjały byli vielmi dobraj jakaści, asabliva draŭnina, tamu ich možna skarystać paŭtorna.
U domie na Błakitnych aziorach my źnieśli staruju piečku, bo jana była ŭ vielmi drennym stanie. Niechta sa staroj cehły robić barnyja stojki, barbiekiušnicu, darožki. My ž ź jaje vykłali padłohu z padahrevam na kuchni. Jak akazałasia, pieč była zroblena napałovu z cehły z byłoj siadziby Chaminskich u Alševie.
Padłohavuju došku, paśla taho jak dom padniali i zrabili ściažku, viarnuli na miesca, bo jana była ŭ dobrym stanie. Kali ŭ kaho vokny nie zhnili, ich možna adrestaŭravać i pastavić nazad.
Meblu taksama raju nie vykidać, a adšlifavać dy pafarbavać. Prynamsi, u nas u chacie na chutary staić zialonaja šafa 1930-ch hadoŭ minułaha stahodździa, jakuju pryvieźli kaliści z Paŭdniovaj Amieryki, u domie na Błakitnych aziorach — staryja dźviery z aryhinalnym polskim škłom.
Ad byłych haspadaroŭ nam zastalisia ažno try kufry, draŭlanyja stały. My ŭsio heta budziem restaŭravać. A kolki cikavaha časam u chlavach, na haryščy! My, naprykład, znajšli draŭlany dziciačy łožačak, dva matacykły, jakija taksama jość žadańnie adrestaŭravać.
Cehła ad piečki atrymała druhoje žyćcio na «ciopłaj» padłozie
Nabudźcie i karystajciesia źnižkavymi kartkami budaŭničych hipiermarkietaŭ, adsočvajcie akcyi. U niekatorych kramach naličvajuć bonusnyja bały, jakija možna patracić na nastupnuju pakupku. Kuplajcie budmateryjały na barachołkach.
Nie viadziciesia na naviaźlivuju rekłamu, asabliva ŭ sacsietkach, što, naprykład, dla abšyŭki ścien vam padydzie vahonka vyklučna hatunku A. Pa ŭłasnym dośviedzie, skažu, što hatunak S, jaki tańniejšy minimum u dva razy, nikolki nie horšy. Sučki, jakija vypali, možna zakleić z unutranaha boku malarnaj stužkaj, a połaść zapoŭnić silikonam, akryłavym hiermietykam ci špakloŭkaj pa drevie ŭ ton.
Darečy, što tyčycca došak, zvanicie ŭ lashasy, tam možna natrapić na vielmi pryjemnyja ceny. Pamiery mohuć być niestandartnyja, ale vyhada ŭ šmat razoŭ. My kupili kub abrezanaj doški pa 150 rubloŭ. U Minsku ž nieabrezanaja kaštuje bolš jak 400.
Praviercie bałkony, haražy na dačy. Mahčyma, tam pylacca zabytyja reštki plitki, farby, špaleraŭ, jakija zastalisia ad papiarednich ramontaŭ. Časta ich addajuć u supołkach nakštałt «Addam darma». Možna spytacca ŭ svajakoŭ, znajomych, mahčyma, u ich zastalisia niejkija budmateryjały, jany z radaściu ad ich pazbaviacca biaspłatna ci za simvaličnuju canu.
Nie raju ekanomić na antysieptykach dla draŭniny, antykarajedzie, farbie, jakaja achoŭvaje ad ultrafijaletu. Bo vielmi važna abaranić zrub zvonku ad uździejańnia pryrodnych faktaraŭ. Akramia taho, pakłapaciciesia pra vadaścioki, admostku, padakońniki, kab vada nie traplała na zrub, kab jon nie hniŭ.
I, samaje hałoŭnaje, nie treba bajacca ramontu. Svaja chata na vioscy moža być absalutna ŭ kožnaha biełarusa.
