Jak źniacca z rehistracyi čałavieku, jaki nie moža pryjechać u Biełaruś?
Źniacca z rehistracyjnaha ŭliku ŭnikudy pa svajoj voli niemahčyma. Kab «vypisacca», treba stać na rehistracyjny ŭlik u inšym žyłym pamiaškańni — tady sa staroha miesca čałavieka zdymuć aŭtamatyčna.
Kali, naprykład, hramadzianin vyjechaŭ za miažu, viartacca nie źbirajecca, a kvateru pradać treba, to ŭ hetym vypadku padychodzić tolki sudovy paradak.
Situacyja: kvatera naležyć svajakam, jany chočuć jaje pradać, ale nie mohuć hetaha zrabić, bo tam zarehistravany čałaviek, jaki nie znachodzicca ŭ krainie. Što rabić?
Ułaśnik abo asoba, jakaja vyjechała, pavinny źviarnucca da jurysta, advakata abo ŭ prajekt LegalHub z prośbaj ab składańni pazova ŭ sud ab vysialeńni na padstavie č. 2 art. 89 ŽK Respubliki Biełaruś («Vysialeńnie pa patrabavańni ŭłaśnika žyłoha pamiaškańnia»).
«Da zajavy prykładajecca kopija paśviedčańnia ab pravie ŭłasnaści na žyłoje pamiaškańnie, kopija asabovaha rachunku z ukazańniem zarehistravanych hramadzian, kvitancyja ab apłacie dziaržpošliny (3 bazavyja vieličyni) i inšyja dakumienty, kali heta nieabchodna (pra heta skaža juryst). U nazvanym pazovie ŭłaśnik budzie istcom, a zarehistravanaja asoba — adkazčykam. Pazoŭ možna padać jak asabista ŭ sud, tak i nakiravać pa pošcie», — tłumačać jurysty.
Paśla taho, jak stanie viadoma, u jakoha sudździ ŭ vytvorčaści znachodzicca hramadzianskaja sprava, adkazčyku nieabchodna nakiravać zajavu ŭ sud z paviedamleńniem, što jon pryznaje iskavyja patrabavańni i prosić razhladać spravu ŭ jaho adsutnaść, bo znachodzicca za miažoj i nie moža asabista prysutničać u sudovym pasiadžeńni.
«Možna nakiravać na e-mail, možna zakaznym listom. My rekamiendujem zakazny list.
Dalej sud pryznačaje pasiadžeńnie, na jakoje prychodzić tolki iściec. Jamu nieabchodna padtrymać pazoŭ. Sudździa začytaje zajavu ab tym, što adkazčyk pazoŭ pryznaje i prosić razhladać spravu ŭ jaho adsutnaść.
Jak praviła, za adno pasiadžeńnie razhladajecca takaja sprava. Sud vynosić rašeńnie ab vysialeńni», — kažuć u LegalHub.
Praz 15 dzion nieabchodna zabrać rašeńnie suda i pieradać jaho adpaviednym orhanam, jakija zdymuć z rehistracyjnaha ŭliku.
Situacyja: kvatera naležyć na pravie ŭłasnaści asobie (u hetaj ža kvatery jana zarehistravana), jakaja vyjechała ź Biełarusi i nie moža viarnucca ŭ krainu. Što rabić?
«Tut isnuje tolki adzin varyjant — spačatku źmianić ułaśnika, potym vykarystoŭvać ałharytm, jak u pieršaj situacyi», — kažuć jurysty.
Chutčej za ŭsio, biez dapamohi ryełtara abo davieranaj asoby nie abyścisia.
U Biełarusi pavinien być čałaviek, jaki budzie sustrakacca z pakupnikami i tłumačyć situacyju, a mienavita toje, čamu kvatera pradajecca z zarehistravanymi asobami.
«Jość ludzi, jakija razumiejuć, jość tyja, chto kateharyčna admaŭlajecca albo prosić źnižku, — raskazvajuć jurysty. — Kali kansensus znojdzieny, davieranaja asoba ad imia ŭłaśnika afarmlaje ździełku. Paśla dakumientalnaj źmieny ŭłaśnika, jon moža padać u sud pazoŭ na papiaredniaha ŭłaśnika z patrabavańniem ab vysialeńni».
Jak vypisać z kvatery dziaciej?
«Dzieci zdymajucca z rehistracyjnaha ŭliku pa takim ža pryncypie, jak i darosłyja. Kali havorka idzie pra toje, što dzicia pavinna być zarehistravana pa inšym miescy žycharstva, to na heta patrebnaja zhoda dvaich baćkoŭ, pašparty dziaciej», — raskazvajuć u LegalHub.
Zhoda abaich baćkoŭ nie patrabujecca, kali jość rašeńnie suda ab tym, što dzicia pastajanna žyvie z adnym z baćkoŭ (nazvanaje rašeńnie nieabchodna pakazać pry rehistracyi na novym miescy).
Ci treba dla vypiski z kvatery pieradavać pašpart u Biełaruś? Nakolki heta biaśpiečna i možna rabić u ciapierašnich umovach?
«Dla rehistracyi na novym miescy nieabchodnyja pašparty. Dla vysialeńnia ŭ sudovym paradku nieabchodnaja prysutnaść u sudzie abo istca asabista z pašpartam, abo jaho pradstaŭnika z davieranaściu (blizkaha svajaka ci advakata).
Adkazvajučy na pytańnie, ci biaśpiečna pieradavać pašparty — nie, tamu što addavać adziny dakumient — heta zaŭsiody niebiaśpiečna. Niahledziačy na heta, mnohija ludzi tak robiać, tamu što tak praściej, hatovy ryzyknuć.
Pierad pieradačaj pašparta rekamiendujem zrabić jaho zavieranuju kopiju. Kali na miažy znojduć vašy pašparty, ich, biezumoŭna, zabiaruć, tamu varta padumać, što vy budziecie rabić u takoj situacyi. Sudovy paradak minimizuje ryzyki z pašpartami», — padsumoŭvajuć jurysty.
Čytajcie taksama:
Vy za miažoj, a vas šukajuć z vajenkamata. Što rabić?
Što budzie, kali nie pryjści ŭ vajenkamat pa poźvie? A pa zvanku? Ci možna nie nazyvać svaje danyja dla źvierki?
Pryznali «ekstremisckimi» adrazu 12 knih pa historyi: Taras, Dzieružynski, Łyč, Suvoraŭ…
