Andrej Dźmitryjeŭ byŭ adnoj ź pieršych achviar «pakajalnych videa» i atrymaŭ za heta ad mnohich klajmo zdradnika. Siońnia HUBAZiK pradukuje takija videa ŭ pramysłovych maštabach i razumnyja ludzi viedajuć, što nie varta źviartać na heta asablivaj uvahi, bo ŭ pałonie hałoŭnaje vyžyć i nie naškodzić inšym.
U 2010 hodzie heta było navinkaj, tamu mnohija, asabliva z palityčnaj tusoŭki, nie pavieryli Dźmitryjevu, što pajści na heta jon musiŭ vyklučna tamu, što siłaviki šantažavali jaho svabodaj blizkaha čałavieka.
Ale kahości heta nie pierakanała, a kamuści nie spadabałasia forma jaho apraŭdańnia. I z tych časoŭ da jaho pryčapiłasia łatka «ahienta KDB».
Ale nie tolki za heta, jašče i za formu viadzieńnia palityki.
Palitykaŭ ja padzialaju na try hatunki:
1) tyja, chto adčuvaje realnaść, pracesy, nastroi ludziej i sprabuje iści ŭ nahu z hramadstvam, nie abhaniajučy jaho, ale sprabujučy chitra ź im pracavać;
2) tyja, chto adčuvaje realnaść, pracesy, nastroi ludziej i sprabuje ich źmianić, idučy nasupierak nastrojam;
3) tyja, chto žyvie ŭ iluzii i nie razumieje ani pracesaŭ, ani nastrojaŭ ludziej, i ničoha nie robić.
Jak žurnalist ja naziraju za Dźmitryjevym šmat hadoŭ i adnošu jaho, biassprečna, da pieršych. (Kab paźbiehnuć niepatrebnaj dyskusii, adrazu skažu, što jon nie moj kandydat, ale ja sprabuju pahladzieć na situacyju abjektyŭna).
Šmat kaho biesić, što jon udzielničaje ŭ vybarach, piša zajavy ŭ sielsaviety i rajvykankamy, chodzić tudy ź ludźmi na pryjomy z čynoŭnikami, da apošniaha karystaŭsia lehalnym polem dziejnaści (i nie asabliva, darečy, z hetym pijaryŭsia).
Dla adnych hetaha chapaje, kab ličyć jaho ahientam, bo jon dziejničaje ŭ rečyščy sistemy. Ale dla Dźmitryjeva heta adzinaja forma pracy, jakuju jon ličyć efiektyŭnaj. Tamu jon spakojna razmaŭlaje i ź jabaćkami, i z amatarami Pucina, bo heta taksama biełarusy, a ŭ budučyni — patencyjnyja vybarcy.
I ŭ biełaruskaj palitycy takich palitykaŭ budzie jašče vielmi šmat, bo heta prosta paśpiachovaja palittechnałohija. (Roŭna z takoj išoŭ na vybary Viktar Babaryka).
Chto byŭ, jość ahientam ci jašče im stanie, spadziajusia, my niekali daviedajemsia dziakujučy archivam i inšym dakumientam. Niechta, imavierna, pryznajecca i sam. Ale
siońnia ŭ biełaruskaj palitycy paniaćciami «ahient KDB» ci «ahient Maskvy» mocna złoŭžyvajuć. Im stanovicca ledź nie kožny, z kim nie pahadžajecca inšy bok.
Heta ŭžo i miem, i źjava, roŭnaja «zakonu Hodvina», jakaja praduhledžvaje biessensoŭnaść dalejšaj dyskusii, kali apanient siahaje ŭ joj da arhumienta pra Hitlera i nacyzm.
Čytajcie taksama:
Zatrymali Andreja Dźmitryjeva
