Supracoŭniki ŭpraŭleńnia pa baraćbie z arhanizavanaj złačynnaściu i teraryzmam Rumynii (DIICOT) zatrymali Tejta ŭ Buchareście 30 śniežnia.
Tejt — były baksior i ŭdzielnik brytanskaha realici-šou «Vialiki brat». Błohier viadomy svaimi žančynanienaviśnickimi vykazvańniami, za jakija jaho zabłakavała bolšaść sacsietak.
Supracoŭniki niekalkich rumynskich śpiecsłužbaŭ u čaćvier praviali pieratrus u asabniaku Tejta, padčas jakoha znajšli hrošy i zbroju. Razam z błohieram byŭ zatrymany jahony brat.
U zajavie DIICOT nie nazyvajucca imiony, tolki paviedamlajecca, što zatrymanyja dvoje hramadzian Vialikabrytanii i dvoje hramadzian Rumynii, jany padazrajucca va ŭdziele ŭ złačynnaj hrupie, jakaja zajmajecca handlem ludźmi.
Usiaho ŭ spravie — šeść paciarpiełych. Ich prymušali ŭdzielničać ŭ parnahrafičnych rolikach, jakija potym pradavali ŭ internecie. Jak miarkujecca, žančyny byli vebkam-madelami.
«Achviar vierbavali hramadzianie Vialikabrytanii, uvodzili ich u zman, kažučy pra namier uziać šlub i najaŭnaść ščyrych pačućciaŭ […] Jany padviarhalisia fizičnamu i psichałahičnamu hvałtu […] i seksualnaj ekspłuatacyi z boku členaŭ hrupy», — havorycca ŭ paviedamleńni.
U piatnicu pradstaŭnik DIICOT paćvierdziŭ Bi-bi-si zatrymańnie Tejta. Pieršapačatkova jaho zatrymali na 24 hadziny, zatym aryštavali jašče na 30 sutak pa chadajnictvie prakuratury.
Hreta Tunbierh i skrynka z-pad picy
Tejt — hramadzianin Brytanii, jon naradziŭsia ŭ ZŠA ŭ 1986 hodzie. U pačatku nulavych mužčyna pačaŭ prafiesijna zajmacca kikboksinham i zavajavaŭ suśvietnyja tytuły.
U 2016 hodzie jon staŭ udzielnikam brytanskaha realici-šou «Vialiki brat», ale nieŭzabavie byŭ vyklučany paśla źjaŭleńnia videa, na jakim jon bje žančynu ramianiom.
Sam Tejt kazaŭ, što videa było adredahavana, i nazvaŭ jaho «poŭnaj chłuśnioj, jakaja sprabuje vystavić jaho ŭ drennym śviatle».
U dalejšym jon nabyŭ papularnaść u internecie, dzie vystupaŭ z šakavalnymi vykazvańniami. U pryvatnaści, jon pisaŭ, što «achviary seksualnaha hvałtu sami niasuć adkaznaść za napady».
Paśla hetaha jaho zabłakavali ŭsie papularnyja sacyjalnyja sietki, u tym liku tvitar. Jaho profil byŭ razbłakavany paśla kupli sacsietki Iłanam Maskam.
Na hetym tydni Tejt u tvitary z sarkazmam paprasiŭ u ekaaktyvistki Hrety Tunbierh adras elektronnaj pošty, kab raskazać joj pra svaju kalekcyju aŭtamabilaŭ i ich škodnyja vykidy ŭ atmaśfieru. Tunbierh, taksama z sarkazmam, dała jamu adras [email protected].
Paśla hetaha, pačakaŭšy kala 10 hadzin, Tejt vykłaŭ dźviuchchvilinny rolik, u jakim palić cyharu i spračajecca z ekaaktyvistkaj. Prykładna ŭ siaredzinie rolika možna ŭbačyć, jak jamu pieradajuć picu. Karystalniki sacsietak pryjšli da vysnovy, što nadpis na skryncy moh paćvierdzić, što Tejt znachodzicca ŭ Rumynii, choć aficyjna heta nie paćviardžałasia.
«Voś što zdarajecca, kali vy nie adpraŭlajecie na pierapracoŭku skrynki z-pad picy», — napisała Hreta Tunbierh paśla zatrymańnia Tejta.