Śledčyja jašče vyśviatlajuć abstaviny zdareńnia.
Pavodle aficyjnaj viersii, kala 23:50 na kaladnuju kućciu nieviadomy adkryŭ ahoń pa ludziach, jakija stajali la ŭvachoda ŭ pab Lighthouse u rajonie Uołasi-viładž, a praź niekalki chvilin z parkoŭki paba vyjechała mašyna ciomnaha koleru (mahčyma, «Mersedes» S-kłasa).
Ciapier palicyjanty šukajuć kiroŭcu hetaha aŭtamabila. U rajonie paba viadziecca ŭzmocnienaje patrulavańnie.
Adna z kul trapiła ŭ hałavu 26-hadovaj žančynie. Jana pamierła ŭ balnicy.
Taksama było paraniena čaćviora mužčyn. Stan adnaho ź ich charaktaryzujecca jak ciažki.
«Chod rasśledavańnia budzie mocna zaležać ad taho, jakuju infarmacyju my atrymajem ad hramadskaści, i ja zaklikaju ŭsich, u kaho jość niejkaja karysnaja infarmacyja, źviazacca z nami, kab my zmahli pakarać adkaznych za heta žachlivaje zabojstva maładoj žančyny napiaredadni Kaladaŭ», — zajaviła na pres-kanfierencyi namieśnik šefa palicyi hrafstva Dženi Sims.
Uładalniki paba Lighthouse zajavili, što całkam šakavanyja tym, što adbyłosia, i nazvali napad trahiedyjaj, jakaja nie paddajecca apisańniu.
Letaś u hrafstvie Miersisajd, jakoje pobač ź Livierpulem, adbyłosia niekalki hučnych zabojstvaŭ z užyvańniem ahniastrelnaj zbroi. Urad inicyjavaŭ rehijanalnuju prahramu pa baraćbie z uzbrojenymi napadami, vyłučyŭšy na jaje bolš za 350 tys. funtaŭ.
Siarod zabitych u hrafstvie letaś była dzieviacihadovaja Alivija Pret-Korbieł. Jana była zabitaja ŭ svaim domie, dzie sprabavaŭ schavacca mužčyna, jakoha pieraśledavaŭ uzbrojeny čałaviek.
Za dzień da zabojstva dziciaci ŭ Livierpuli była zastrelenaja 28-hadovaja Ešli Dejł.
