Skrynšot videa
«U Łukašenki niama šancaŭ admovicca ad rašeńnia Pucina, kali toj jaho prymie»
Kiraŭnik NAU Pavieł Łatuška adznačaje, što Pucin i Łukašenka zaŭsiody sutrakajucca pierad Novym hodam. Takija sustrečy pravodziacca ŭ ramkach tak zvanaj Sajuznaj dziaržavy i nosiać rehularny charaktar. Tamu ŭ samoj sustrečy niama ničoha novaha.
«Ale toj fakt, što padčas vizitu Pucina ŭ Biełaruś na našaj terytoryi znachodziacca rasijskija vojski, technika, mabilizavanyja i pravodziacca vajskovyja vučeńni, vyklikaje zaściarohi. Faktyčna my bačym realizacyju pahrozy prymianieńnia siły suprać Ukrainy», — ličyć Łatuška.
Palityk ličyć, što pahroza paŭnavartasnaha ŭdziełu režymu Łukašenki ŭ vajnie suprać Ukrainy pavialičvajecca.
«Nakolki nam viadoma z našych krynic, padčas niečakanaha vizitu Siarhieja Šajhu ŭ Minsk byli padpisanyja dakumienty, zhodna ź jakimi ŭ situacyi pierafarmatavańnia «śpiecyjalnaj vajennaj apieracyi» ŭ vajnu kiravańnie abjadnanaj hrupoŭkaj vajskoŭcaŭ pierachodzić u ruki Rasii.
Łukašenku patrebien farmalny dakumient, bo jon choča, kab byli «papierki».
Ale Łukašenka nie choča prosta vyjści i abjavić, što zaŭtra vajna. Tamu jon robić usio pastupova, kab nie paŭtaryć pamyłki Rasii. Pra rost pahrozy napadu z terytoryi Biełarusi dniami kazaŭ i hienierał Załužny», — adznačaje Łatuška.
U dziejańniach Łukašenki Pavieł Łatuška chutčej bačyć sprobu jak maha lepiej padrychtavacca da napadu, čym sprobu adciahnuć čas, kab u vyniku nie prymać niepasredny ŭdzieł u vajnie.
Fota: AP
«Palityki, jakija ličać, što Łukašenku treba dać čas, kab jon zmoh vykrucicca, robiać vialikuju pamyłku. Jany takim čynam faktyčna dajuć Pucinu i Łukašenku čas, kab lepiej padrychtavacca.
U Łukašenki niama nijakich šansaŭ adkrucicca ad Pucina. Usia ekanamičnaja sistema, usie pradpryjemstvy, pastaŭki praduktaŭ — usio skiravana na Rasiju. U jaho niama šancaŭ admovicca ad rašeńnia Pucina, kali jon jaho prymie, pačać ahresiju z boku Biełarusi», — upeŭnieny Łatuška.
«Napružvańnie situcyi vakoł Biełarusi — elemient cisku na Ukrainu»
Što tyčycca mienavita biahučaj situacyi, to, na dumku Łatuški, Pucin sprabuje vykarystoŭvać jaje dla taho, kab z damamohaj Łukašenki pavialičyć cisk na Ukrainu i pasprabavać prymusić jaje sieści za stoł pieramovaŭ na svaich umovach.
«Pahroza druhoj sproby napadu z terytoryi Biełarusi prymušaje ŭkrainski bok zasiarodžvać na paŭnočnych miežach značnuju kolkaść vajskoŭcaŭ i techniki. Heta vyhadna dla Rasii.
Pakul jany sprabujuć cisnuć mienavita takim čynam. Adnak Ukraina nie pahodzicca na takija pieramovy, bo tut staić pytańnie terytaryjalnaj cełasnaści krainy. Jany majuć poŭnaje jurydyčnaje i maralnaje prava adstojvać svaje intaresy i nie pahadžacca siadać za stoł pieramovaŭ na ŭmovach Maskvy. Treba razumieć, što Ukraina ciapier zmahajecca nie tolki za siabie, ale i za nas i ŭsiu Jeŭropu ŭ cełym.
Praz heta imaviernaść napadu z terytoryi Biełarusi z udziełam łukašenkaŭskaj armii budzie raści. Heta moža adbycca, jak kažuć roznyja krynicy, toj ža hienierał Załužny, naprykancy lutaha abo ŭ pačatku sakavika nastupnaha hoda», — ličyć Łatuška.
Palityk upeŭnieny, što mienavita pytańni ŭdziełu Biełarusi ŭ vajnie i buduć klučavymi na sustrečy ŭ Minsku.
«Na ŭzroŭni ŭradaŭ, kaniešnie, buduć abmiarkoŭvać i inšyja pytańni, ale kali my kažam pra takija prajekty, jak impartazamiaščeńnie, to pa našym analizie ŭsia ekanomika Biełarusi zaraz budzie pierachodzić na rejki militaryzacyi. Usie hetyja impartazamiaščalnyja prajekty źviazany mienavita z vytvorčaściu dadatkovaha ŭzbrajeńnia.
Pa našaj infarmacyi, iduć aktyŭnyja finansavyja ŭkładańni, kab naładzić u Biełarusi vytvorčaść dronaŭ. U Iran lotaŭ jašče Makiej, paśla premjer Hałoŭčanka. Tudy lotaje delehacyja za delehacyjaj. Idzie padrychtoŭka da praciahłaj vajny, dzie ŭ patrebny Pucinu momant musiać padklučycca i Uzbrojenyja Siły Biełarusi», — ličyć palityk.
«Heta chutčej revierans z boku Maskvy»
Palityčny ahladalnik Alaksandr Kłaskoŭski miarkuje inakš. Jon razvažaje, što Pucin naŭrad ci lacić u Minsk, kab załamać ruki Łukašenku i prymusić jaho ŭvieści svaje vojski va Ukrainu. Sam fakt takoha vizitu analityk chutčej nazyvaje revieransam z boku Maskvy, choć i nie admaŭlaje, što ad Kramla možna čakać čaho zaŭhodna.
«Ale najchutčej Pucin takim čynam prosta padkreślivaje, što jon cenić svajho faktyčna apošniaha chaŭruśnika.
Fota: Dmitry Azarov, Sputnik, Kremlin Pool Photo via AP
Ciapier tak zvanyja «vorahi režymu» šmat pišuć, što Łukašenka staŭ maryjanietkaj, što Biełaruś akupavanaja, što jon nie maje nijakaj samastojnaści, rehularna jeździć na pakłon da Pucina ŭ Sočy i Maskvu. A tut užo sam maskoŭski «car» vyrašyŭ pryjechać, takim čynam jon vykazvaje pavahu i padkreślivaje farmalnaje raŭnapraŭje», — ličyć ahladalnik.
Na dumku Kłaskoŭskaha, nie varta hipierbaliziravać mierkavańnie, što Pucin pastajanna prymušaje Łukašenku adpravić svajo vojska va Ukrainu, a toj hieraična adbivajecca.
«Takaja mifałohija vielmi časta raskručvajecca ŭ miedyja, u tym liku ŭ niezaležnych. Heta navat hraje Łukašenku na ruku, bo takim čynam u niejkim sensie vyhladaje, što jon zmahajecca za niezaležnaść i źjaŭlajecca samastojnym hulcom», — kaža Kłaskoŭski.
Ahladalnik miarkuje, što kali palityki pamiž saboj i spračalisia na hetu temu, to, vierahodna, Łukašenku ŭdałosia pierakanać Pucina, što Biełarusi nie varta hetaha rabić z šerahu pryčyn.
«Mahčyma, Łukašenka pierakanaŭ jaho, što biełaruskim vajskoŭcam lepiej zastavacca na svaich pazicyjach, kab abaraniać zachodnija miežy ad NATA, kab tyja nie strelili ŭ śpinu ruskim.
Fota: AR
Vieryć Pucin u heta ci nie — dakładna nie viadoma, ale jon, jak čałaviek kanśpirałahičnaha myśleńnia z antyzachodnimi stereatypami, sapraŭdy moža pahadzicca z takoj pazicyjaj. Całkam vierahodna, što jon moža dumać, što lepiej nie ŭciahvać hetuju žmieńku biełaruskich vajskoŭcaŭ va Ukrainu, kab nie budzić licha».
Na dumku Kłaskoŭskaha, inšy važny momant, jaki strymlivaje Łukašenku i Pucina ad paŭnavartasnaha ŭdziełu biełaruskich vojskaŭ, zaklučajecca ŭ tym, što ŭ biełaruskich vajskoŭcaŭ niama vyraznaha nastroju iści vajavać suprać Ukrainy.
«Aproč hetaha, Łukašenka viedaje, što hetyja idei nie padtrymlivajucca bolšaściu hramadstva. Praz heta vynikaje, što škody ad uciahvańnia ŭ vajnu biełaruskich vojskaŭ moža być našmat bolš, čym karyści. Tym bolš, što navat sam Łukašenka kazaŭ, što moža, kali što, pasłać 35—40 tysiač čałaviek na front, ale sensu ŭ hetym niama. Bo vidavočna, što heta nie taja krytyčnaja masa, jakaja moža źmianić situacyju na froncie. A voś destabilizavać situacyju ŭnutry Biełarusi taki krok moža», — adznačaje Kłaskoŭski.
Analityk nie vyklučaje, što ŭ pryvatnych razmovach Łukašenka kazaŭ Pucinu pra heta.
Tamu, na dumku Kłaskoŭskaha, ciapier niama śviedčańniaŭ taho, što Pucin lacić u Minsk, kab prymusić Łukašenku adpravić svaich vajskoŭcaŭ na vajnu.
«Navat kali jany dyskutujuć na hetuju temu, to Pucin uzvažvaje ŭsie «za» i «suprać» i razumieje, što, napeŭna, lepiej praciahvać vykarystoŭvać Biełaruś jak płacdarm i krynicu tyłavoha zabieśpiačeńnia svajoj armii», — ličyć ekśpiert.
Aproč hetaha nie treba zabyvacca pra toje, što navat sam fakt stvareńnia napružanaści na miažy Biełarusi i Ukrainy daje plon Rasii. Ukraina vymušanaja trymać vojski na paŭnočnych miežach, kab być hatovaj da paŭtornaha napadu z terytoryi Biełarusi.
Taksama na karyść taho, što Pucin nie maje namieru schilać Łukašenku da adpraŭki vajskoŭcaŭ va Ukrainu, havorać i pavodziny ŭ ekanamičnaj halinie.
«Zvyčajna, kali Rasii treba było schilić Biełaruś da pryniaćcia peŭnych rašeńniaŭ, pamiž krainami pačynalisia tak zvanyja «hazavyja», «naftavyja» ci «małočnyja» vojny. Pucin cisnuŭ na Łukašenku ekanamična, kab schilić jaho pryniać patrebnaje dla jaho rašeńnie. Siońnia my nie bačym takoha», — adznačaje Alaksandr Kłaskoŭski.
Što tyčycca siońniašniaj zajavy Łukašenki pa hazavaj temie, to analityk nie vyklučaje, što padčas vizitu Pucina ŭ Minsk hetaje pytańnie budzie vyrašana na karyść Łukašenki.
«Čynoŭniki nie damovilisia, tamu pasprabujuć damovicca «pravadyry». Pucin moža zrabić šyroki žest, daŭšy tanny haz na 2023 hod, kali Łukašenka, u svaju čarhu, zhodzicca na tyja ci inšyja ŭmovy Kramla (ekanamičnyja, palityčnyja, vajskovyja)», — miarkuje Kłaskoŭski.
«Naša Niva» — krynica jakasnaj infarmacyi i bastyjon biełaruščyny
PADTRYMAĆ «NN»Čytajcie taksama:
Vajskovyja vučeńni ŭ Biełarusi praciahnuli da 26 śniežnia
ZŠA nie bačać prykmiet padrychtoŭki rasijskaha nastupu na Kijeŭ
U Haazie eks-kamandzira armii Kosava asudzili na 26 hadoŭ turmy za katavańni
