Pad horadam Bachmutam Danieckaj vobłaści, jaki na praciahu niekalkich miesiacaŭ sprabujuć uziać «vahnieraŭcy», u akružeńnie patrapiła hrupa dobraachvotnikaŭ z Hruzii, u vyniku byŭ paranieny kamandzir, a piaciora bajcoŭ — zahinuli.
Pra heta ŭ efiry hruzinskaha apazicyjnaha telekanała «Mtavary» paviedamiŭ dobraachvotnik Ramea Parułava, pieradaje «Jeŭrapiejskaja praŭda».
Pavodle jaho słoŭ, zahinułyja słužyli ŭ 57-j bryhadzie z sakavika 2022 hoda. «Kamandzir paranieny. Astatnija chłopcy razam z našymi bratami-ŭkraincami akružanyja. Praciahvajecca baraćba, kab vyvieści tych, chto zastaŭsia žyvy, i vynieści cieły našych zahinułych», — skazaŭ Parułava.
U subotu prezident Hruzii Sałame Zurabišvili vykazała spačuvańni ŭ suviazi z hibiellu dobraachvotnikaŭ. «U hetyja ciažkija chviliny prynošu svaje spačuvańni siemjam, siabram i svajakam usich hruzinskich bajcoŭ, jakija zahinuli va Ukrainie», — napisała Zurabišvili ŭ Facebook.
Na baku Ukrainy ciapier vajuje da 1500 hruzinskich bajcoŭ. Častka žyła va Ukrainie, častka — pryjechała paśla pačatku vajny jak dobraachvotniki. Pieršy hruzin-dobraachvotnik zahinuŭ 18 sakavika. Pa stanie na 4 śniežnia ŭ bajach na baku USU zahinuli 33 hruziny.
